呢幾日開始要為搬屋準備比較多野諗，雖然都可以訓得好好但訓唔晏，
依兩日應該係ｏ係呢間屋過ｏ既最後一個星期日，下星期會搬左喇，
所以都諗住去飲餐『告別茶』，因為搬左之後唔會好似依家咁個個星期去間酒樓飲茶，
好難得今日十點幾已經去到，平時冇十二點幾都冇唔會出現。

飲完餐茶後坐巴士去新關口附近睇樓，其實一早都有留意關口附近租價，
對香港人黎講唔算貴，所以都諗住考慮下，尤其一個樓盤早兩個月先入伙，
ｄ野應該比較新淨。

第一次揾到一個好懶ｏ既地產經紀，帶我地睇左兩個單位後猛問我地諗住咩價位，
人地勤力果ｄ實唔理三七廿一帶你去睇左先，希望多ｄ盤希望有ｏ岩客心水ｏ既，
可能我地著得太寒酸人家睇唔起卦，於是去揾果第二間地產，
同第二間講左我地想揾ｄ開揚同樓層高ｏ既，佢地立即揾到幾ｏ岩我地心水ｏ既，
雖然比先前睇果ｄ價位多左少少，不過就大ｄ同埋ｏ係單邊好開揚，
望正新口岸ｏ既橋同埋米埔，雖然係西斜曬少少，但日頭都返左工好少ｏ係度，
所以覺得比琴日的ｏ岩心水，雖然係比預算貴左少少，但講緊ｏ既少少係幾日蚊，
都應該ｏｋｏ既，所以今日先落左訂，聽日揾怪獸再同業主攪埋其他手續，
拎左鎖匙就搬得架喇。

黎緊近左新關口，行五分鐘左右已經可以過關，話唔定我會改用呢個關口過關，
不過可能要轉多次車，但又可以慳返ｄ車錢媧，等搬左入去之後再研究下先。

睇黎搬屋計劃應該可以ｏ係去北京前完成，到時忙完後就可以去玩抖下喇。

上個星期家姐老闆去完北海道返黎，成隻開籠雀咁好興奮咁講今次旅行ｏ既行程，
仲撩男老闆出年一齊過去自駕遊，一向鍾意玩鍾意食ｏ既RM同事聽到當然又話要去埋一份啦，
不過佢地都冇理我地感受呀，人家聽到都好想去家嘛，所以我同家姐老闆講，
不如出年佢地出發前等我同女王一齊先過去探路啦，其實係我地想一齊去玩，
家姐老闆當話冇晒秘書好慘，但佢地有得一齊去玩我地冇得去會唔制呀，
一於大家努力儲下錢先得。

唔經唔覺ｏ係呢間屋又住左兩個年頭，好快又租約期滿，
其實應該係十月先到期，不過黎緊怪獸會返香港做野未必咁多時間ｏ係呢邊處理野，
而到期一定會加租，依家呢度ｄ租實在太貴，初時租ｏ既時候港幣都仲未眨值，
但依家港幣越來越眨值，所以相對一早變相加左錢，所以再加都會幾吃力。
其實大家有諗過搬返香港住，往左過呢邊三年，諗住搵返ｄ近返工ｏ既地方，
不過尖沙咁ｄ豪宅住唔起，佐敦果ｄ又太舊，所以諗過下旺角，
琴日放工去旺角行過下，但發現都真係幾貴，可以負擔到ｏ既價錢只可以揾三、四佰呎左右，
之後又諗過住遠ｄ如元朗、屯門、天水圍，租金只係平少少，但車費又貴返，
諗諗下不如都暫時諗返深圳，但就揾近口岸果ｄ，比依家住果ｄ平三分一，
但就近左唔駛坐多程車先到關口，於是今日走左去睇樓。

可能依三年ｏ係呢邊住慣左，鍾意呢邊地方闊落ｄ冇香港咁迫，大部份樓都有露台，
浪衫都好ｄ，今次去睇ｏ既地方，係配音王子租緊ｏ屋苑，舊年去佢屋企睇過都覺ｏｋ，
今日有個單位幾鍾意，樓層又高又幾開揚，暫時係有少少問題傾得ｏ岩，
同埋唔太鍾意佢ｄ傢俬，所以要再考慮下。聽日打算去新關口果邊睇下，
因為最近有新屋苑落成，上網睇佢租價好似唔太貴，所以聽日去睇下。

因為今個月下旬要去北京，所以會ｏ係出發前攪掂晒，應該仲要好快攪掂果隻添，
黎緊呢應該會好忙，大家若唔見我出現一排都唔駛太擔心住，因為可以未上得網，
等我一搬左攪掂電腦之後，自不然就會再出現架喇∼

呢幾日天氣真係熱到殺死人，十足吽風但又唔係媧，
真係悶熱到抖唔到氣咁，真係配服ｄ著西裝返工的人兄們，
比著我可能已經死左喇∼

家姐老闆琴日返香港，今朝一早就黎電話喇，當然要講下佢ｏ既行程啦，
聽到真係好想去，不過去日本好貴，唔夠彈藥好難攪。

講開旅行今日終於訂好北京之旅ｏ既火車飛喇，
星期日ｏ係深圳呢邊問過，因為奧運關係，只可以５日前訂飛，
聽講依家縮到３日前添，仲唔可以訂由北京返黎ｏ既車飛要ｏ係北京買，
因為國內ｏ既制度一向好混亂，怕到時唔可以如期返黎，
都係唯有ｏ係香港中旅社諗下方法喇，本來想訂『京九』，但回程日已經full 晒，
而呢班車間日先有，所以又要諗下第二個方法。正路都係諗坐返深圳ｏ既，
但時間唔係咁好，最終訂左由北京坐去廣州，返深圳都好快，
唯有係價錢比ｏ係國內訂貴左四份一，不過就可以confirm 一定訂到位，
只好比貴少少啦，攪掂左車飛呢一part 都覺得輕鬆左ｄ，
跟住要諗係住宿問題，其實最壞打算係做下流浪漢去麥記坐通宵，
之前曾問過大學畢業朋友仔女會唔會有同學或朋友ｏ係北京可以借宿，
今日就朋友仔電話，可能幫我地安排去佢北京同學屋企借宿，
但詳細都仲要再問先覆到，若果可以去佢朋友仔度暫住，
咁就唔駛咁頭痕出去租地房比人斬一頸血。

今日似乎好多野都好似幾順利咁，只少有ｄ眉目，同埋想訂到自己想訂ｏ既野，
真係好喇，不過，依家就超級眼訓，打完日記要立即去揾周公子了，
本來都想懶唔打住，但又覺得幾開心想上黎講下∼∼嘻嘻∼

好喇∼去訓lu~~