今日星期一，好彩返一日聽日又放假，所以心情都冇以往星期一咁壞。

琴日橫風橫雨後，今日顯然涼左，大家都要小心冷親，
好似我都似乎中左ｄ招，有時都涼下鼻水，好在聽日又可以訓返晏ｄ攰下。

今日好顯然又係冇心機做野啦，隔離分行秘書放假就更加靜，
有時襯冇乜人時又上網玩一陣。

晏晝收到之前心急老闆電話，佢打黎問我一ｄ關於電腦問題，
之後我問佢近況如何，佢話佢已經遞左信準備返黎，不過叫我要保守秘密。
咁都明白ｏ既，因為返黎仲有好多野要傾，遲ｄ睇下咩情況啦。

話說完心急老闆會回巢，冇耐細佬老闆透露，我男老闆應該稍後都會返黎，
好似好多野都夾埋一齊咁，但唔知之後會點，會唔會有機會幫埋心急老闆手，
但若果真係，可能又要變成服待四個人，咁我工作量又會多返，
不過都唔諗咁多住，ｄ野唔係我一個人控制，到時等ｄ老闆們傾完再算ｌｕ∼∼

可能太耐冇行街，琴日行左大半日就攰到飛起，今日訓到接近十二點先捨得起身。
不過朝早已經落好大雨兼好大風，因為ｄ雨ｏ係咁打到落玻璃窗。

起身之後去左飲茶，依家屋企隔離有間酒樓，人流唔算太多，
冇以前華強北去開果間咁多，不過因為近關口，去ｏ既人都係以香港人居多，
而口味亦都好貼近香港口味，價錢對我地黎講唔算貴，咁依家放假就依然可以繼續飲茶喇。

飲完茶怪獸先生話想去華強北買野，於是一齊坐車過去，
我順便去買埋餸，因為依家住果度入伙都唔夠半年，暫時冇一個正式ｏ既街市。
今日經過舊居，應該都仲未租出去，但依家慶幸個舊業主加租迫我地要搬，
若果再住ｏ係度又要捱貴租不單止，仲要捱惡劣ｏ既環境，
因為舊居樓下起緊地鐵，ｄ路掘到爛晒，又成日半夜先整野鬼咁嘈，
所以話有時世事ｏ既野，真係『塞翁失馬焉知非禍』，依家新居平左租景色又好左，
不過唔知可以ｏ係度住幾耐呢？係就係好怕搬屋，但有ｄ野都控制唔到，到時先算咯。

聽日返一日工又放假，希望返工果陣唔好落咁大雨啦。

琴日都冇乜心情做野，因為呢兩個星期多假放。
今朝唔係訓得好晏，因為要去銀行入錢交租，之後先再去元朗。

只從搬左黎新居，生活又改變左，因為呢度就ｏ係新關口旁邊，
行路過關之後坐一程車就到元朗，所以返工放工都會經元朗，
星期六放假仲會好似ｄ內地人咁過元朗買野添，因為貪佢又多野買又平，
尤其係街市添。

今個星期怪獸先生長週，所以我可以一個人先去元朗慢慢行街之後先再join 佢，
其實每次都總覺得太多野想買，一次過拎太多野又比較辛苦，
仲有ｄ野要偷偷運過關，所以每次都買得太多。

難得今日一個人行街，可以睇自己鍾意睇ｏ既野，
首先買左兩把遮，因為兩把短遮都壞左，怕黎緊有雨落冇遮用，
跟進去睇衫，不過冇乜心水，之後再去吉豬島十央店，不過去之前去買左ｄ內衣，
然後再慢慢行十蚊店，真係太多太多野想買喇，但一時間都唔可以太放縱，
行完十蚊店先再去食個下午茶再行下街市，買左涼粉諗住自己整甜品，
後尾join埋怪獸先生先再去街市買海鮮，因為元朗好多海鮮檔，價錢又唔太貴，
只少平過食牛肉，所以通常星期六過親去都會買ｄ魚呀、蝦呀、東風螺又或者帶子咁，
然後又偷運過境，咁又可以食到一餐海鮮餐喇，嘻嘻！

好似好耐冇好好咁行街shopping，今日有收穫實在太開心喇∼∼呵呵！！

不過今日行左成日都幾攰，同埋我覺得行街好似比人傳染感冒，好似有丁丁鼻水，
為免打敗仗，今晚都係早ｄ訓為妙∼∼∼