假期o既第二日，依然好享受，今日算早起身，十點幾就起左身，
不過就見外面天都陰晒，話口未完就狂風爆雨，丫∼唔知點解，
話家姐老闆招風，因為佢出親去旅行都會打風，而我有時放假放長少少，
就咁ｏ岩會落大雨，好似今次又係，聽講仲會落多一兩日添，
不過對我黎講影響不大ｏ既，反正冇話去邊樣玩，係要返工就煩ｄ囉，
所以今日除左落街食晏仔都冇出過去，靜靜咁ｏ係屋企上下網，
睇下聽日天氣如何啦，若唔落雨都可能出去行下ｏ既∼

唔知係咪琴日要不停工作，所以夜晚覺得好眼訓，想夜ｄ訓都頂唔順，
十二點幾已經要爬上床，雖然今朝十點幾醒左，不過跟住又繼續訓，
一直到接近一點先起身，一個期待已久ｏ既假期，當然要好好咁訓返飽。

起身之後去左飲茶，硬係覺得『他他條條』咁去飲下茶先似放假，
之後本來諗住天氣熱熱返屋企攰下，不過又腳痕痕想去行下街，
於是走左去個外貿市場度行下，估唔到咁又買兩條裙褲同一條短褲，
可能因為好熱，要準備定夏天衣著，而且今日個sales 都算幾好，
介紹比我ｏ既野又幾ｏ岩我但又唔會hard sell，所以一口氣買左三樣野，
都係百幾蚊唔算貴，雖然果度都仲有ｄ長褲都幾鍾意，不過都要自己忍下先，
又唔可以一之過咁放緃，因為都仲想買下鞋，唔想咁快大出血，
今日先第一日放假，怕放完幾日假返工已經破左產∼∼ ^^|||

返到屋企上網將早兩日幫心急老闆執好左ｏ既client email address list send 比佢，
順便同佢交帶埋琴日收到ｏ既文件同埋我幫佢follow 左ｄ乜，
雖然我今日其實係放緊假，而且幫佢follow O既野都應該告一段落，
返工後都唔係我跟架喇，不過，覺得都應該好來好去，而且六年黎大家都合作得好好，
都唔介意盡力幫佢幫到最後，今日仲係佢ｏ係公司last day，
所以返工後都唔會再ｏ係公司遇到佢，除非第日佢返黎探班啦。

之前煩煩老闆個肥downline 話我提起心急老闆走時有眼泛淚光，
我明明都冇，但都唔知點解佢會見到咁，仲話比心急老闆聽添，
我仲同女王講笑話唔知佢係咪睇左我有眼屎，嘻！
不過今日ｏ係send 比心急老闆ｏ既email 度除左報告左ｄ公事外，
同佢臨別在即，心血來潮都好想同佢講幾句心底話同祝福話，反而真係有少少感觸
六年時間話長唔長，話短亦唔算短，呢六年剛好睇住佢做左兩任媽咪，
而且心急老闆一向都對我好好，成日驚死我work load 太重，呢種老闆真係好難得，
所以真係幾唔捨得佢，但人生無不散之筵席，佢希望將來有更好ｏ既發展我都會好支持佢，
而心急老闆回覆我ｏ既電郵亦已經收到，我都會留返佢作為留念ｏ既。

下個月我同佢都會有一個新開始（我會有一個新老闆），
寄望大家都同樣ｏ係一個好開始啦。

終於到喇，終於捱埋今日可以攰返幾日喇，一直到下星期一先返工，
真係不知幾咁期待，不過我都預左今日會好多野做，
雖然身邊個個都話我好，有咁多日假放，以前通常我會話放完返黎就做死，
正所謂『有咁耐風流就有咁耐折墜』，不過我依家往往覺得係『未風流先折墜』，
因為Ｄ老闆實係果句：『襯你仲Ｏ係度幫我整埋Ｄ乜乜物物．．．』，
其實都只係幾日之嘛，塞咁多野比我反而唔可以比我準備定Ｄ物資比佢地，
到時一返唔到又出黎大叫：『個秘書放左假好慘呀．．．．』，
有時我成日笑都幾鬼失禮，人地唔知仲估我呢個秘書做野唔妥當，
好在依家有女王同分行秘書分別幫我手頂住佢地，咁放假都放得安落。

上個星期成個星期都唔多舒服，成個人都冇乜精神，對住心急老闆Ｄ野就眼訓到飛起，
今日係last day 終於的起心肝埋晒尾佢，都總算有所交待，係佢間房冇時間清理，
都唔理得咁多喇，今日我都要罰留堂多半粒鐘先叫清好ｄ野，終於可以安心放假喇。

因為今日怪獸去左元朗，聽日放假可以夜ｄ，所以心血來潮去元朗join 佢，
而因為我未坐過西鐵，所以今日想去試下。去到中港城ｋ１６站見好多人，
可能因為先前落雨好多人唔出街又怕塞車所坐港鐵，等我去到站頭望來望去，
諗緊坐k bus 好定係坐小巴去九龍站再轉車之際，突然發現長長人龍中有三對眼望住我，
原來係同事仔、２４９４同埋心急老闆上司秘書，比佢地發現我好似大鄉里出城咁添，
因為知道同事仔都係住元朗，所以跟埋佢去坐車。

阿２４９４係住屯門，反而心急老闆上司秘書住落馬洲真係令我幾驚奇，
我同佢幾乎只隔一河，雖然我住得比佢遠，但佢絕對用時間多過我兼好轉折，
對比起黎雖然我車費係貴ｄ，原來都叫做好方便。
去到朗屏站同同事仔分手後跟住心急老闆上司秘書行去元朗，
原來佢坐間小巴係我坐去落馬洲管制站果一架，真係我比佢遠少少愚了。

因為本來今日冇打算出元朗，所以冇乜心水去邊樹食野，只係去左Ｂ仔涼粉果度，
不過依家Ｄ野好貴，都只係食左普通甜品同小食就走喇。

聽日開始放假喇，真係開心，聽日第一件事一定要訓返夠本先∼∼