琴日有批去完杜拜o既同事今日返工，其中一個就係我個心急老闆，
佢都好早返到黎，雖然唔係九點鐘，我問佢好唔好玩，佢話今次公司攪得幾好又好抵玩，
果ｄ本來要自費玩ｏ既如沙漠越野車都由公司比錢，所以今次行程幾正，
住ｏ既酒店又好正，佢話覺得好過住帆船酒店，因為間酒店好有中東特式媧
而且今次遊行可以徹徹底底咁放底兩個女可以有覺好訓，
不過佢話買比我個手飾盒今日唔記得拎返黎，其實我一件手飾都冇，
分行秘書話叫我同老闆講，將個手飾盒裝滿手飾先拎比我，呢個主意又唔錯媧，呵呵∼

另一個今日返工ｏ既係前細佬老闆，今日佢秘書女王ｏ係我呢個壞人ｏ既教唆下請左假，
因為我覺得女王唔舒服好有放假抖下ｏ既必要，冇秘書一日半日唔駛死ｏ既，
由得佢地自己攪掂啦。不過因為女王冇返，成日都好似好靜咁，唔係話因為女王平時好嘈，
而係佢ｄ老闆今日返黎有ｄ玩自閉咁，自己拎埋房度做野，所以唔會聽到女王電話響爆，
又或者聽到佢地出黎呼喚女王ｏ既聲音，我同分行秘書講話不如叫女王放多ｄ假，
咁就可以靜ｄ喇∼哈哈∼

前老闆個靚仔景點一號晏晝先返黎，都預左佢懶，佢返黎問女王係咪冇返，
我答佢女王比佢激病左，佢立即笑得好牽強，兩隻耳都紅晒，
我仲叫佢好快ｄ買多幾支人參比女王補返氣添，之後我同分行秘書講，
佢做乜面又紅耳又紅，十足比我講中咁，好攪笑，我諗佢比我激死。

另外，前細佬老闆今日返黎冇乜聲氣，成日呢ｏ係房，我都同佢冇咩講野，
淨係問過佢好唔好玩，佢又係話今次攪得幾好，我估佢都係因為最近比人投訴事情煩緊，
因為今日聽到分行女經理同佢講仲未聯絡到投訴ｏ既客，我諗佢仲有排煩，
後尾我見細佬老闆個乖仔同事放左隻佢結婚相ｏ既CD o係女王張枱，
但張CD 係比細佬老闆O既，於是我拎住封信走去同細佬老闆講，
係女王比佢Ｏ既『大信封』，見佢個樣好似呆左呆，
不過我好快話佢知其實係佢個downline比佢，佢隻衰野立即扁扁咀笑，
十足ｄ細佬撒嬌樣，咁我都想試下佢若知女王唔做會唔會好驚訝，
但見到佢個樣時又懶慘懶嗲咁又玩佢唔落，真係衰人黎架∼
總之希望佢醒目體諒下女王啦。

聽日輪到家姐老闆由泰國返香港，佢一返黎又冇依家咁得閒，可以好似今日咁，
打破紀錄一日就scan 晒一個Box file，攪到隔離分行秘書又話要唔啋我，哈哈∼

唔知女王今日抖成點呢？希望抖完快ｄ好返啦∼

星期一喇，今日心急老闆會返香港喇，而家姐老闆則飛左去泰國玩多兩日先返，
但兩個老闆分別都有客人揾我問問題，但有ｄ條款ｏ既野怕答錯，
晏晝check 過老闆email，發現心急老闆ｄ電郵已經開過，証明佢已幾返左屋企，
唔知聽日會唔會返工呢？

呢兩日女王病病地，我地都提議佢聽日不如請日假休息下，
因為唔舒服返工已經辛苦，比人扯到盡仲慘，因為近來因為前細佬老闆好想快ｄ入人升分行，
所以要女王幫手做埋兩個downline o既野，仲要幫手RM同事做好多好高質素ｏ既powerpoint，
攪到女王近來都好有微言唔多開心，因為變相由以前淨係幫一個人做野，
變成依家幫四個人做野，而且好多野都好急急急，呢樣野我地做同一個post，
完全會明白當中感受，尤其最慘係其中一個前細佬老闆主力ｏ既新同事，
同埋RM同事，佢地ｄ要求真係極高，不但止樣樣野好急，又要求高，
想樣樣好pro 兼完美，女王已經好叻咁自學左好多本來唔識ｏ既野，
但佢地ｏ既要求真係無窮無盡，幾乎要識埋flash 先可以達到佢地要求，
依家越來越偏離佢做秘書ｏ既職務，可以話變左一個IT support 兼打雜，
真係好明白女王感受，比著我可能一早走去話左老闆，雖然女王曾經同老闆講過，
但似乎問題冇乜得到解決，難怪佢有想走ｏ既念頭，比著我我諗都會咁，
見到佢依家情況，曾經當初有ｄ唔捨得細佬老闆呢個唔錯的老闆，
但依家郤變得有ｄ慶幸甩左佢，我並唔係幸災樂禍，但的確有呢種感覺，
因為佢O既範疇太廣兼幾煩下，當然我同女王交情唔錯，仲成日笑佢係我一手揍大，
交情上唔想佢走，不過，有ｄ野唔係我控制，若果以依家情況發展落去，
我都覺得留低會幾辛苦，我都希望細佬老闆識得珍惜一ｄ，唔係話誇口，
佢依家都真係幾執到，當然日後點要睇佢做化喇∼

無啦啦ｏ係度up 左女王ｄ野添，希望女王唔好見怪呀，
仲要記住好好養病休息添呀∼∼ ^+++^"

呢兩日個server 非常唔穩定，一係就慢過龜速，一係直頭上唔到網，
琴晚想上網真係太慢，慢到好眼訓，所以都好出奇地星期六會十一點訓教。

講返之前個星期五放工約左ｄ舊秘書聚舊，難得今次豹紋同事冇反對，
不過即使反對我都話之佢喇，今次我book 左間其實我都未去過ｏ既日式餐廳『百ｘ咖啡』，
最主要諗住餐廳傾偈好過酒樓，而呢間餐廳坐位亦唔錯，同隔離間住自成一角，
再加上我想食下日本野，唔想次次打邊爐嘛，當時唔知係咪好肚餓，見親咩都好想食，
於是大家一齊叫黎夾份食，之後邊食邊慢慢傾到九點幾走，果陣原來剛掛三號風球冇耐，
ｄ風真係大左好多。

琴日訓醒去左飲茶，同埋兩個大學畢業朋友仔女，
今次呢個朋友女好開心話比我地聽佢揾到野做喇，仲可能會ｏ係我住果區添，
都好丫，希望係一個好開始。

琴日天氣非常唔穩定，雖然隻『浣熊』已經登錄，不過就好大雨，仲掛住黑色暴雨添，
但真係雨大到望出街都望唔到，好彩唔係要返工咋，唔係就狠狽喇，
睇黎又係時侯開始買定ｄ輕便雨鞋同『士啤』鞋放ｏ係公司，以備大雨之用。

而今日就非常平淡咁過，只係出去食下飯打下機，咁又過左一日喇。
聽日心急老闆就由杜拜飛返香港喇，幾日就咁過左，希望嘆埋聽日啦。