又到星期一喇，好似都仲未放夠假咁。朝早襯大家開緊會，
又同女王同埋分行秘書傾左陣偈先開工。

今日工作量唔算多，晏晝家姐老闆見完客返黎終於有機會同我傾偈，
其實我都幾想早ｄ傾，因為件事遲早都要處理，早ｄ傾早ｄ諗嘛。

家姐老闆話星期五同煩煩老闆講左心急老闆離職ｏ既事，
煩煩老闆都覺得幾驚訝，咁呢個反應都係正常ｏ既，之後佢都照講心急老闆有提議，
不過煩煩老闆聽左覺得唔係太可行，因為都有唔少問題牽涉，
例如若心急老闆一個人食唔晒咁多客，有可能分比佢地下線，
咁我咪變左要同好幾人有接觸？牽涉ｏ既人咪變得多左同複雜？
另外通常呢類客慢慢會跟心急老闆走，ｄ單會越變越少，對我黎講係咪又長遠呢？
咁我都覺得呢ｄ問題都係要考慮ｏ既問題。

跟住佢地又諗到揾人加入ｏ既問題，首先佢地會諗到依家我地分行有能力又需要秘書ｏ既人，
其實唔係太多，因攪事秘書好快唔做，佢ｄ老闆有可能會黎問津，
其中佢地諗左賤男同埋煩煩老闆一個好數ｏ既downline，但呢兩個人我都唔鍾意，
原來家姐老闆唔鍾意之餘，煩煩老闆更唔鍾意自己同個downline 加入，
令我有ｄ愕然，原來家姐老闆話佢兩個有心病，始終個downline 唔係煩煩老闆請返黎，
但個downline 又好數，唔太將煩煩老闆放ｏ係眼內，真係家姐老闆唔講我唔知，
因為一直以黎同煩煩老闆冇乜溝通。

另外仲有一個人選，係我先前都有估到ｏ既，就係前細佬老闆新請ｏ既downline，
因為呢個人本身係家姐老闆朋友，前細佬老闆好又器重佢，黎緊佢會行中小企路線，
雖然依家由女王暫時幫佢手做野，但長遠黎講係需要秘書，所以我都曾有諗過呢個人，
家姐老闆話本來佢都冇諗過，係佢個八卦細佬提出ｏ既，
或者因為之前同細佬老闆都叫合作過，佢都叫做滿意我啦，
家姐老闆都問過個果個同事，佢話請我冇問題，家姐老闆都想睇下我反唔反對，
雖然我都知日後幫呢個人手，路線會同女王依家相近，可能都雖要做下Powerpoint同電腦野，
但相對同賤男同埋煩煩老闆downline 相比，都寧願選擇呢個，
因為佢同家姐老闆熟，係前細佬老闆downline，日後都係同女王多機會接觸，
呢幾個都係我一直夾慣ｏ既人，照計大家style都相近又同女王感情好，
第日好多野可以互相幫忙冇乜計，好過夾ｄ唔鍾意ｏ既人囉，不過暫時傾左先，
仲要成最後決定同埋點reject 心急老闆果個方案，因為怕佢唔開心。

其間都同老闆講下少少是非，同埋乘機幫下女王口講下佢依家ｏ既情況同心情，
等家姐老闆轉返比前細佬老闆聽囉。不過點都好，日後應該唔會好似依家咁清閒喇，
希望最終可以揀到一條依家最係完美的配搭啦。

今晚放工突然落好大雨，好在都差不多到屋企，若果唔係實濕晒，
最緊要返工唔好落雨就好喇。

<<今日買o既戰利品~~cheap cheap 膠鞋三大對>＞

<<呢款透明膠鞋舊年都想買, 諗住買黎落雨時著, 貪佢濕左水都唔怕"up"壞對鞋>>

＊　＊　＊　＊　＊

返左一日工好在又放假，琴晚雖然攰，但都忍唔住打機，所以到訓時真係超級攰。

今日晏晝得自己，所訓醒起身去醫左肚之後就坐地鐵去左羅湖城，
好似好多個月都冇去過喇，近來人民幣不斷升值，大大打消左好多港人北上購物意慾，
感覺上冇以前咁多人，尤如行去布城時，人客並唔似以前咁多，佢地依家真係生意淡泊左。
今日去其實想去買下鞋，因為天氣開始熱雨季又就快黎，
雖然我已經有水靴，不過我都仲想買輕便膠鞋，都係諗住落雨著同埋放定ｏ係公司，
結果一口氣買左三對，總共六十八蚊，全部都係膠鞋，貪佢地平平地唔駛咁就住著，
又可以滿足左我購物ｏ既慾望，另外先有對返工鞋個鞋踭甩左，
拎左去屋企附近間修鞋鋪幫我整，結果只係五蚊雞攪掂晒兩隻鞋踭，
家陣仲整得好過未爛前，果個女人仲讚我對鞋靚添，所以我都答佢可以整到就整，
唔想咁浪費，以往ｏ係香港幾十蚊ｏ既鞋爛左都唔會要，因為拎去整仲貴過買過對，
但依家幾蚊就可以整返，不但唔駛浪費仲可以慳錢，依家乜都貴喇，人工又冇得加
真係慳得就慳喇。

今日係奧運聖火o係香港境內傳送o既日子，可惜天宮不造美，朝早仲落仲雨添，
因為傳送起點係尖沙咀文仛中心，而我又ｏ係尖沙咀返工，都有ｄ驚影響交通，
好在我比朝早返工。

因為今日係星期五同同事仔食早餐，排隊買緊早餐時已經聽到後面位人兄話彌敦道已經好多人喇，
而隔離分行秘書ｏ係尖東站坐ｋ巴返黎，已經受到人多ｏ既影響遲廿分鐘先返到，
好在佢不嬲都好早返工，所以都冇遲到。朝早全人類開會，開會後覺得人少左，
唔知係咪走左去彌敦道搶火炬，後尾聽同事話由尖沙咀出去，地鐵出口迫到出入唔到，
彌敦道又封路，真係要出去或黎尖沙咀都幾煩。

晏晝全人類又要開會，之後入家姐老闆房，佢細細聲同我提起心急老闆，
我問佢係咪已經知道喇，佢話都係前細路老闆數到傳聞話心急老闆要走，
家姐老闆聽到後有乜好傳丫，直接問佢咪得囉，於是去問過心急老闆求証左知道係事實，
仲知道我已經知道，我話係心急老闆意思佢暫時唔想我講出走，
跟住佢就話覺得之前心急老闆提議我接手幫佢跟客而後佢上司出糧比我，
一如我所料，家姐老闆話呢個方案唔係好方案，因為佢話其實牽涉好多問題，
佢話都要揾次揾埋煩煩老闆傾下黎緊會點，佢話好唔捨得心急老闆，
因為家姐老闆當初入黎做時心急老闆坐佢隔離，當時家姐老闆老公病緊但未過世，
所以覺得心急老闆一直都好幫到同支持佢，所以更加唔捨得，而且同佢兩個又夾，
大家冇乜所謂，好似呢幾年黎佢兩個都好撐我，好似人工都係放假同節日早收工問題，
佢兩個又齊齊同煩煩老闆爭取，所以一直以黎都係二比一為我爭取到唔少野，
若果唔係我都唔會ｏ係度做得開心地過左幾年，我都覺得冇左個好老闆好可惜。
大家傾左一陣家姐老闆話去話返比個八卦公聽（前細佬老闆）心急老闆走係事實。

之後我都有同女王講返家姐老闆已經知道呢件事喇，我諗佢暫時都會有ｄ煩惱，
因為若唔行心急老闆方案，又揾邊個可以補上佢個位呢？
我諗佢都幾明我ｄ衰格野（性格），若揾著ｄ麻麻煩煩、斤斤計較ｏ既拍檔，
不但佢自己唔係咁鍾意，仲怕我因為咁做得唔開心分分鐘唔做添，
但若唔揾人夾，得返兩個人夾錢請我，又要比多ｄ錢出黎，佢自己應該冇問題，
但煩煩老闆未必制，因為煩煩老闆都比較計較ｏ既，
我諗佢都要諗下有乜兩全其美ｏ既方案先得喇，我都希望佢諗到啦。
不過最快都係下個星期ｏ既事喇，點都放左兩日假休息左先算喇。