<<驟眼睇以為係腸粉o既『芒果卷』>>
<<芒果卷就係粉皮包住舊芒果>>
＊ ＊ ＊ ＊ ＊
終於到左星期六，又係訓教好的日子，琴晚我好乖冇夜訓，因為實在太眼訓喇，
今日訓到九點幾醒左，但係繼續訓到成點鐘。
今日天氣唔錯又有陽光兼且唔凍，之前成日諗住好耐冇食日本野，
想去試下元朗ｏ既日本料理，所以今日就去左元朗一趟。
其實ｏ係深圳都有日本野食，我唔係怕呢邊ｏ既刺身唔乾淨，反而係覺得品質唔夠好，
好似去食自助餐時，佢地總係將ｄ三文魚切到鬼咁簿，食起上黎冇左果份啖啖肉ｏ既滿足感，
曾經記得有次去紅磡崇潔街一間日本食店，食到好肥美的三文魚，
仲記得一啖咬落去真係覺得滿足，仲有份好幸福ｏ既感覺，真係好懷念，
聽聞元朗都有好多間日本店都幾出名，多數都係以抵食夾大件出名，
所以今次去元朗揾食，琴晚去openrice 度睇過資料先試一間，
ｏ呢次去試食呢間的三文魚都ｏｋ，＄48有八片都幾厚，另外叫左個『鮮蟹羔炒餐』，
但冇唔似睇食評ｄ人講得咁好，比較咸同埋乾，唔係咁抵食，另外仲叫左個『盛岡冷麵』，
麵豉湯底味，感覺一般，食過都係『和民』好ｄ，仲有個前菜芝麻八瓜魚，
總共百五蚊左右，我諗下次我會試第二間。
之後怪獸帶我去上次佢家姐帶佢去的一家甜品店，試左一份『芒果卷』幾得意，
初時睇相我仲以為腸粉上面加左芝麻醬，原來粉皮裏面包住芒果肉，真係啖啖芒果肉，
可惜今日晏出去，若果唔係想去埋『流浮山』，好耐冇去過，若去到會買ｄ蠔返屋企整，
但今日已經滿足左個胃喇，最後去街市雜貨店買入ｄ貨，因為好多野係深圳係買唔到，”
又或者係品質唔靚。
本來諗住坐返小巴去落馬洲支線經福田口岸返去，點知去到見大排長龍，
於是去轉坐巴士B1，後尾見到有個B2線係去深圳灣口岸，而我又未去過，
所以襯今日試坐，可惜今日坐的已經天黑，若果唔係經過后海灣時應該有唔錯ｏ既風景。
架車由元朗經過天水圍先再過橋到深圳灣，聽講呢度暫時係唯一實行『一地兩檢』，
究竟點樣係『一地兩檢』呢？我初時以為只係過一次關就攪掂，原來都其也果ｄ都係一樣，
要過完香港關再過深圳關，分別只係冇行得咁遠，同埋所謂一地兩檢果個地都係ｏ係深圳灣，
唔似其他口岸咁，係香港過完關要跨過深圳河到深圳果邊邊再過關，
或者因為咁，我覺得暫時ｏ係度過關ｏ既人都係香港人居多，比較少內地人。
我地過左關先坐２蚊巴士去『世界之窗』轉地鐵，原來經呢個口岸去世界之窗係近好多，
今次深圳灣口岸試行又識多條過關ｏ既路喇。
| 
