到左假期尾聲，都要珍惜做豬機會，琴晚都好夜訓，今日又好晏起身，
訓醒望下街外，好難得見到陽光，真係好舒服。

ｏ係屋企煮個麵食之後，睇左陣電視再出街行下，
因為太難得有好天氣，去完超市再去街市，
今晚又打算煲返個靚湯暖下，今次係『羅漢果西洋菜煲豬骨』，又潤佢一潤。

聽日就係假期的最後一日，一個星期的假期真係過得好快，
下次的長假期要到復活節，到時再考慮會唔會再拎假放耐ｄ。

＊　＊　＊　＊　＊

呢幾日整theme 整極都唔滿意，但又唔憤氣，係都要揾ｄ野攪下，
諗諗下個blog 改左雪人都一段時間，可能因為個雪人ｏ係度咁耐，
所以ｄ天氣一路都咁凍都未定，所以諗住幫個blog 換下新裝，
過兩日就情人節喇，一於換個sweet 新裝先比ｄ新鮮感自己，
希望換完新裝天氣都可以快ｄ暖返ｄ就好喇∼∼ ^++++^

呢幾日放假凍凍冇咩特別野做，琴晚想幫自己部手機扮下靚整返ｄ theme，
點知一整唔知時間整到成三點幾，但硬係唔得滿意，今晚等我再整下先。

琴晚夜訓今日當然冇咁早起身，不過唔知係咪心理作用，
琴日飲完下ｄｆ熱湯，今日覺得ｄ傷風好似好返晒咁，鼻水冇乜再流，
可能真係天氣太凍，都係要飲返ｄ熱野會好ｄ。

唔想成日屈ｏ係屋企，晏晝都出去行左陣，雖然冇咩野行，
不過天氣真係依然咁凍凍，有時都慶幸自己唔係生長生活ｏ係ｄ冬天會冰天雪地ｏ既地方，
好似今次一連凍左大半個月，要朝朝一早爬起身覺得好慘，
而且放假都少左出街，若住ｏ係ｄ冬天好凍ｏ既地方，
冬天要凍一段時間ｏ既，我怕我真係要冬眠先得喇∼∼^^|||

今朝原來好鬼凍，好彩仲未要返工，今日公司有一個分行ｄ人開工大吉，
好彩唔駛參與埋一份嗟。仲有兩日就返工，要好好咁享受埋兩日懶蛇生活。

＜＜今日傑作『木瓜百合海底椰豬骨湯』＞＞

＊　＊　＊　＊　＊

呢個新年假除左年初一，足足做左三日超級大懶蛇，
不過今日始乎冇早兩日渴睡得咁緊要，唔知係咪年三十晚開始作傷風，
久不久流鼻水兼打乞嚏，所以攪到個人更加想訓。

呢幾日又凍又攰咩都冇心機整，於是懶懶咁打左幾日邊爐，
真係食到個口都wear wear 地，兼且熱氣到死，
琴日已經拿拿林煲返ｄ『馬蹄竹蔗茅根水』黎清潤下，
今日食完晏再去超市買返ｄ豬骨打算煲下湯，因為呢排真係太燥熱喇，
其實都幾想煲雞湯，因為好耐都冇煲過，但聽講話傷風感冒未清唔好飲媧，
於是再整返上次煲過ｏ既『木瓜百合海底榔豬骨湯』，貪佢清清潤潤，
我呢種超級熱底ｏ既人黎講應該ｏ岩ｏ既，而且天氣凍凍飲返ｄ熱湯好似舒服好多。

好在自己拎多三日假期，如果唔係幾日假都係ｏ係床度過咁，
聽日家姐老闆果邊分行都開工喇，但聽朝會全部去飲開工茶，
如果我返工的話都可能要去，不過我最憎呢種野，唔去又唔比面，
去到又無聊，連家姐老闆都唔會去，之後成個office 一定好鬼嘈，所以更加要攞假，
今次我同女王仲有分行秘書都拎晒假，大家一於都唔出席，
因為我地三個都好怕呢種應酬，唔知ｄ人會唔會覺得我地三個夾埋呢？
不過，我地又真係夾埋媧~哈哈∼

今晚女王去聽李克勤演唱會，唔知有冇撞到好多公司ｏ既人呢？