琴日o係公司算係過左美好o既一日，因為大部份時間都可以用黎scan 野，
我好希望放假前幫心急老闆完成一籃文件，不過好景不常，可能越接近我放假，
就越唔可以靜靜地做野。

今朝家姐老闆都有返黎，雖然佢都收爐冇咩新case，但佢應該都返黎再跟下ｄ野，
咁我就放假，都正常ｏ既，不過佢份人優點係做野快手爽手，但缺點亦都係咁，
因為佢心急好想手上ｏ既野，所以亦不斷咁放野出黎，有時都幾有壓迫感，
家姐老闆份人係好，但做野就好嚴緊，所以佢細佬果陣都話跟家姐老闆做野都會幾辛苦，
因為佢要求高，好在我同佢基本上都幾夾，但久唔久都會比佢追到頭暈，
加上佢講野好快，有時都幾傷神。

好似今朝佢不斷睇仲ｐｅｎｄ緊ｏ既文件，但佢好多時佢唔group 埋一次出黎揾我，
做一單就拎出黎一次，但我鍾意坐定定慢慢做，不過佢ｏ既不斷出黎就會不斷打斷做野ｏ既mood，
本來見佢食晏終於走喇，諗住終於可以定定地坐低清佢ｏ既野，然後再抽時間scan 埋籃文件，
再將ｄ文件碎埋，咁聽朝可以準備埋放假前ｏ既野可以放假喇。但係個如意算盤打唔響，
當我做晒家姐老闆留比我ｏ既野，剛攤開個架部開始scan 野時，
家姐老闆一個電話打黎，話叫我寫memo 去追marketing 一ｄ野，
其實呢單野ｏ係朝早幫佢處理的其中一個case ，可能當時佢冇諗起，一諗起就打黎叫我跟，
聽完電話打完ｍｅｍｏ send 左出去，諗住又開始scan 野，過左冇耐又黎一個電話，
又話我幫佢follow 的一個case 有人覆左佢，雖然對方話做已經做好左，
但我地仲未見到做好，衰就衰在佢delete 人地個直線電話，又唔記左人地叫乜名，
但佢又心急想處理，叫我打去總機問，結果我冇打去問，因為都唔知人地叫乜名點問？
結果又係打email 去，朝早email 去晏書又email 去，問黎問去都係同一樣野，
連埋淨話果個case，我今日好似係咁不斷重覆做緊相同ｏ既野 ，
攪到我好想做ｏ既野做唔到，但我知道若果我唔襯呢兩日清左ｄ野，我放假返黎係冇可能有時間做得到，
真係有ｄ幾閔，走左同女王訴左一陣苦，跟住決定將電話較震機，老闆打黎唔接由得佢留言聽返先再做。

果然不出所料，處理完淨話ｏ既野又開始scan 野冇耐，家姐老闆又再打電話黎，
今次決定唔聽，因為家姐老闆好穩陣，一定會留言，今次佢係叫我打比個客，
教話佢打電話問密碼再上網登記可以等佢自己處理保單，我都係電郵左ｄ資料比個客再打比個客，
如是者又攪掂左，跟住又好努力咁scan 野，但我估家姐老闆一定會再打黎，
因為佢怕我聽唔到留言，今次又比我估中，但我依然冇接電話，聽返留言佢叫我比返電話佢，
我等左陣先覆佢，果然佢問我有冇聽留言，我話打左電話又ｅ左比客喇，
可能今次我講得好簡短，老闆諗住我有野做緊，都唔敢講太多野就收左線。
晏晝比老闆幾次ｏ既電話，完全將我ｏ既衝勁打亂晒，攪到我覺得反正都達唔到預計ｏ既進度，
倒不如停下先喇，反正都holiday mood　於是同女王傾左陣偈，我同女王講笑話遲早要幫老闆們set 定，
每人每日限住打五次比我，所以佢地mark 低ｄ野先打比我，千奇唔好好似依家咁，
成日一收線又諗起ｄ野又打黎，真係幾煩，唔怪得我有個同事仔形容，
一聽到老闆打電話鈴聲就話：『又鬼叫喇』大家都覺得形容得好貼切，哈哈∼

雖然家姐老闆同我講，聽日冇乜特別野叫我十二點鐘走，但好似今日咁情況，
我諗都幾難，佢地必定盡量ｏ係我放假前跟好多野，雖然我知道老闆覺得我重要，
之不過，三日嗟，都死唔得人ｏ既，若果我放耐ｄ都唔知點算∼∼　∼＿∼

今日食完飯後跟住已經搬左上樓上ｏ既秘書上去參觀下佢地個新office，
可能ｄ間格唔同左，上到去覺得ｄ野似好新鮮但好似又好熟口面咁，
斷佢地搬左上去之後，黎緊都唔知係咪到我地果度裝修，唔理喇，
放完假先算喇。

又到星期一喇，不過今日坐車都明顯少左人，我諗唔少人都開始放年假喇。
返到公司好靜，因為ｄ agent 開始放假，佢地應該冇乜必要都未必返黎，
若返黎應該都冇咁早，所以朝早一返到公司就同女王同埋分行秘書雞喙唔斷，
因為分行秘書冇去Annual dinner，所以要將當晚情況講比佢聽，
尤其攪事秘書ｄ擦鞋野，相比起黎我地真係唔襟撈喇，一ｄ都唔識擦老闆鞋，
點似人家見佢ｄ老闆一接到獎立即做歡樂小姐咁幫老闆行半個場去拎盒黎裝，
我地就淨係識得坐ｏ係食。其實我個煩煩老闆應該請攪事秘書先ｏ岩，
一個鍾意擦鞋，一個鍾意比人擦，勁夾呀。

今日本來同ｄ秘書ｏ係公司叫外賣，之後去參觀剛搬上第二層秘書ｏ既『新居』，
正想落Order 際，家姐老闆問我地有冇叫飯，想約我同女王去食晏，
好彩老闆早打黎一步，如果唔係就落左Order。

老闆話見就過年咪同我地食下飯囉，於是大家又傾下偈，同家姐老闆比較好傾，
好多野都叫做唔駛好避忌，今次聽佢講左唔少分行女經理ｏ既野，
原來佢以前都幾慘，真係要好靠自己努力，不過講到最近分行間ｏ既分歧，
家姐老闆都話佢好慘，不和ｏ既人都同佢好friend ，佢夾住ｏ係中間，
唯有盡量唔涉入其中。

食完晏之後繼續scan 下野，呢ｄ咁靜ｏ既日子真係好難得，
今日ｏ岩ｏ岩煩煩老闆又有返黎，家姐老闆乘機同佢講若佢年三十都唔返，
不如比我放半晝，可能今次當住我面問，所以煩煩老闆答冇所謂，
家姐老闆蠱蠱惑惑咁又幫我攪掂左喇。咁返多一日半就放假ｌｕ∼∼

琴日落左成日雨，又濕又凍，今日終於見到陽光喇，
有機會做豬當然唔放過機會訓到成點鐘先起身，然後先去食野，
食完野怪獸話想去花市，但唔知點解成日意識係去花卉世界，
好彩冇啦佢上左巴士，因為佢都覺得好似冇理由坐果間巴士，
之後聽清楚先知佢係想去深圳果個花市，哈哈∼∼猛咁比人話我十下十下唔知聽乜，
可能天氣太凍凍壞左個腦都未定∼　^++++^

好彩我舊年去過一次，雖然唔記得坐幾號車，但記得ｏ係邊度坐車，
因為舊年同某人臨出發前鬧交（唔知點解成日大時大節總要鬧下交先安落），
唔同佢去我咪自己去囉，所以我都叫去過一次，反而佢未去過。
今日天氣真係好好，有陽光唔覺得太凍，呢邊ｏ既花市攤檔係多，
不過唔算有咩特式，都只係湊下熱鬧去逛下，都冇收穫，接近五點就坐車返去。

因為琴晚仲食剩野，所以今晚都又係打邊爐，淨係補左少少野同埋烏冬，
咁又解決一餐喇。

返多三日又放假喇，不過天氣咁凍真係唔想返工，希望呢三日冇咩人返工最好，
可以靜靜地咁過埋到放假∼　ｙｅａｈ！