<<2008北京奧運紀念存摺>>

＊　＊　＊　＊　＊

琴日對我黎講早左起身，又行左唔少地方，仲浪費左接近一個鐘，所以都幾攰，
雖然今朝都係十一點左右醒左，但又係訓下醒下咁訓到一點幾先起身。

奧運第二輪申請截止前最後一次有機會去銀行開戶口，所以都諗住再試下，
不過今次醒左，經過銀行拎左輪侯號碼先再去飯，我拎個號碼時前面有三十一個號碼等緊，
所以我都冇諗過要食快ｄ，餐飯食左一個鐘，再過去時仲有十三個號碼，
佢地ｄ速度真係幾『快』呢，好在我之前幾個號碼ｏ既人都走左，
所以今次唔駛再等咁耐，唔駛半個鐘就到我喇。

今次開戶手續算順利，只少唔駛要鬧人，之前去有間開戶話我填錯資料要我行開再填過，
攪到我扯晒火要鬧人，人家明明好高貴架嘛，係要撩起人把火先得安落ｏ既。
仲有佢地開戶好攪笑，明明要比証件佢地，但我個戶口英文串法唔係跟我個回鄉証，
而係用普通話拚音英文串法，真係咁都得ｏ既，若係咁駛乜要人証件呢？
到時真係有咩手續或拎錢時，一對証件個名咪唔ｏ岩囉??真係"R"爆頭!!
國內真係經常有好多你諗唔明又意想不到ｏ既野∼∼

攪妥手續後返屋企放低ｄ野，然後再落樓下剪髮同染髮，想整好耐ｏ架喇，
整完立即舒服左，因為整髮今日都冇煮飯出街食就算喇。

聽日又要返工喇，假期過得真係快呢∼∼

今日聖誕日放假，不過好出奇訓到十點幾醒左，一路唔肯起身至十一點，
假期例牌要去飲下茶先得安落。因為今日內地唔係假期，所以都ｏ係附近行下街，
去左吉豬島同埋購書中心睇書，另外就係諗住去銀行開會戶口。

其實我ｏ係呢度開戶口都唔係有咩用途，只係諗住又用黎抽下奧運門票，
之前一直都有諗過去開戶口，但內地人做野ｏ既速度實在難頂，
而且星期六、日ｏ係冇得開戶口ｏ既，早前放大假又唔願拎時間出黎做呢ｄ野，
因為預左要攪半日，今次因為奧運第二輪抽籤，所以諗住的起心肝去攪下啦，
諗住開完戶口先再去買餸，但等到半途我都係放棄左，因為我等左四十五分鐘先做左十個客人，
但果陣仲要等二十個先到我，佢地做野真係超慢，我真係投晒降，雖然話有得坐ｏ係度等嗟，
但我都唔想咁樣坐Ｏ係度虛度青春，我好配服我地Ｄ國內同胞真係『堅忍的中國人』，
Ｄ人做野咁慢都忍得到冇投訴，認真好野，佩服佩服，但咁樣又點會有進步呢？？

或者聽日再去望下會唔會人少Ｄ啦，若果唔係都係要放棄喇。

今日係平安夜，但都依舊要返工，好彩通常都有得放早，
琴日聽天氣預報話今日會涼返，但又比我預期暖，可能冇乜風啦。
朝早返到公司好靜，因為ｄ agent 可以唔駛返工，
老闆們一早話左比我聽今日可以放半晝，但我都預計唔會咁順利，
果然不出我所料，原先家姐老闆請左今日假，諗住佢會唔返黎，
點知佢都好早返左黎，仲簽左單添，但因為份單仲差ｄ資料同埋身份証副本，
所以未交得住，但老闆就同我講低先，希望佢走之前可以收到ｄ資料，
另外又要幫佢出定ｄ Update o既quotation，要幫佢追文件，
雖然唔係話真係好多野做，但係今日咁ｏ既心情真係唔想做。

本來半晝可以走得，但因為約左同分行女經理食飯，所以點都要食埋呢餐黎先走。
今次分行女經理係叫晒我地分行ｏ既秘書食飯，應該係過節叫做同我地聯誼下咁啦，
但分行女經理一向比較cool，所以對住佢不嬲都有ｄ拘緊，唯有係咁挖野講。
好彩有果個攪事秘書ｏ係度，佢一向口水多又鍾意表現自己識好多野，
都冇乜所謂啦，由得佢講囉，我係咁二得閒搭下咀就算，緦之務求餐飯快快食完就算。
初頭以為女經理會襯人齊提下日後分工ｏ既野，但竟然冇提到媧，都好！！

食飯時收到前細佬老闆電話，話家姐老闆拎到欠果ｄ資料，
一定係家姐老闆叫佢幫手跟，因為諗住我已經走左，不過我會返上公司，
所以話比佢聽等我返老闆再跟，返公司途中仲撞到家姐老闆，於是一齊上去，
等佢寫返好晒ｄ資料比我影印完諗住攪掂，點知煩煩老闆ｏ係度，
可能見家姐老闆揾我跟野都怕執輸卦，又話揾唔到ｄ file 叫我幫佢揾，
佢ｄ野成日放ｏ係佢面前都話揾唔到，我都好明白佢，是但啦，冇理由幫得家姐老闆唔幫佢，
結果磨到三點左右就攪掂晒，再同分行秘書傾左陣先走。

之後出左深水埗會隻怪獸，然後再去馬鞍山怪獸哥屋企搬返ｄ野上黎，
不過由深水埗坐巴士入馬鞍山，仲耐過我平日放工返屋企，足足要成個鐘有多，
所以依家更加發覺其實ｏ係呢邊住用ｏ既交通時間未必耐得過住香港，
唯一係車費貴少少嗟，而且呢度又特別凍，若我住馬鞍山仲覺得辛苦，
以前搬上黎時仲有好多機暫留左ｏ係怪獸哥度，都阻左人咁耐都要拎返走，
不過應該要走多一至兩轉先拎得晒，之後怪獸嫂都算早放工，
所以一齊出去食埋晚飯先走。

今晚係平安夜，可以靜靜地過真好，熱鬧都係留返比ｄ年青人喇，我老喇，
黎緊兩日假又可以休息下喇，太好喇∼∼

希望大家都有個快樂聖誕啦∼∼