終於到左星期五喇，呢個星期尾都係密密手冇乜機會掂ｄ聖誕卡，
老闆們都仲未追夠收，心急老闆好似比較近目標，家姐老闆就”鞋””鞋”聲，
因為冇預期中順境，所以呢期六都會同前細佬老闆傾下最後棋子點行法，
我諗佢點都希望盡力到最後。
今朝分行經理例會，分行秘書例要入去寫會議記錄，其實今次佢都預左有唔好ｏ既野，
因為琴日老闆要佢寫低晒佢日常要做ｏ既工作，肯定會比人用黎計算佢係咪咁多野做，
開完會出黎感覺到佢好興，因為ｄ老闆ｏ係度唔方便講，佢初時淨係講左今次連我地都有份，
我第一個反應諗住又係比賤男篤我地背脊，跟住一齊去食飯時要傾，
原來係賤男提出唔好另請分行秘書，叫我地幾個秘書分擔左分行秘書工作。
聽到呢個消息都真係唔知好嬲定好笑，佢呢條超級賤男真係賤到出汁兼超級縮骨，
諗住咁樣ｄ經理就唔駛另外夾錢請分行秘書，反正本身有請秘書ｏ既都出左錢，
叫個秘書做多ｄ野肯定冇蝕底，真係虧佢諗得出ｄ咁低能ｏ既野。
分行秘書話今次賤男突然提出呢樣野，其他經理可能一時間未諗到牽涉ｏ既問題，
所以都冇提到咩意見，最賤係當細佬老闆提起我點樣，因為我情況較特殊老闆涉及兩個分行，
若我做埋呢邊分行野好似對另外心急老闆有唔公平，點知隻死賤男答，
『唔通ｄ report 分左去我煩煩老闆個信箱度我會唔去做咩？』聽到佢呢個回答擺明夾硬黎，
佢真係唔知我性格，唔合理我話唔做就唔做，有本事可以炒我，我真係未驚過，
我知前細佬老闆依家唔係我老闆，唔方便講太多，真係可惜我唔係現場，
若果唔係我真係答佢唔做就係唔做，兼且佢唔知我同老闆之間工作上的分配，
再者想用到我，好呀，問過我心急老闆先丫，佢都憎都賤男死，肯定嘈佢。
聽左呢個消息，我地秘書間都覺得好無稽，除左我地每個秘書做多左野之外，
首當其充最慘係分行秘書，因為佢冇咩減少分行ｏ既工作外，
當佢老闆一個人出錢請佢，一定要做好多佢老闆ｏ既野，仲要幫佢做埋請人，
工作量大大增加，真係揾笨到離譜，所以我都知佢唔係幾開心而且有去意，
咁都難怪ｏ既，比著我都會咁諗，只係若要衰ｏ係賤男手上真係唔抵。
至於我，賤男呢個方案ｏ係我身上係唔work o既，
因為佢唔知道我呢幾年黎同老闆間ｏ既合作係點，大家都係遵守規矩，大家信任，
大家冇去揾大家著數，所以呢幾年黎大家合作都好好，老闆們都好錫住我，
雖然煩煩老闆有時都幾煩，但佢對我都好客氣，我諗家姐老闆知道呢個消息應該都唔會答應，
因為要我做埋分行ｏ既野，變相係用左佢ｏ既野攞著佢著數，若比埋心急老闆知道，
真係拆天都有知，所以我都唔算太擔心，而且賤男又份出錢請我，佢憑乜野可以咁樣決定？
佢又憑乜要我話點做就點做，分分鐘面我都唔駛比佢添。
不過我知道呢件事前細佬老闆一定會同家姐老闆講，等佢地傾完之後再睇下佢地有咩回應，
但有咩回應都好，我一定會同家姐老闆講賤男以往ｏ既惡行，同埋要告誡佢地要防範呢個小人，
因為舊年舊大老闆離職時成個分行一分為二，都係賤男帶頭攪事，
攪到心急老闆同其他老闆唔ｏ岩，家姐細佬老闆等又要咩住『義端』ｏ既臭名，
當大家咬實牙關過左追到數氣氛好左賤男又再攪事，若再聽佢講咁多遲早激走晒ｄ秘書，
分分鐘又攪到兩邊老闆不和，佢地點諗都好，我都要講呢ｄ事出黎，
至少我講我心裏ｏ既感覺感想，唔想老闆們因為呢ｄ咁ｏ既賤人而破壞晒ｄ野。
總之對住賤男呢種人真係想用十八個字ｏ既粗口鬧佢，
再用黑布蒙頭打完佢再推落樓梯再pat 去堆田區，雖然好似好惡毒，
但用左ｏ係佢身上都洗唔到佢做ｏ既賤野，我又等住睇下呢件事點發展落去。
今日呢件事都講左大半日，攪到都有少少冇心機做野添，
好彩聽日後日放假，好好訓個靚教先再算喇。
| 
