早兩日訓到半夜突然停左一陣電，本來開著風扇，但斷電冇得著，
唔知係咪因為咁傅左被，朝早起身喉嚨有少少唔舒服，死啦死啦，
最怕喉嚨有事，有排都未好返，驚驚∼

可能今日狀態都唔太好，有ｄ攰，家姐老闆就中左招喉嚨唔舒服，
琴朝同佢傾電話時都覺得佢把聲唔多妥，問佢係咪唔舒服，
佢個傻瓜仲做自己未訓醒所以未開聲，點知到晏晝先同我講有ｄ流鼻水就知自己衰左，
哈哈∼睇黎我都可以做大夫喇∼∼

呢三日心急老闆去左深圳上堂，本應諗住想抽時間幫佢準備ｄ Newsletter寄，
不過晏晝有唔少濕濕碎碎野做，最衰就係要幫煩煩老闆兩個客買旅遊保險，
果陣緊家姐老闆ｄ野，同佢地拎完資料，幫佢地上網落單，
點知冇耐又打黎話原來公司幫佢地買左要取消，真係比佢地激死，因為整左係唔可以自已取消，
一定要寫memo 或email 比公司先可以取消，真係比ｄ人激死，
結果攪來攪去白做不特止，仲要額外做多ｄ野又要幫佢地check 住，
仲想話聽日要confirm　係咪取消到，大佬呀，呢ｄ我都控制唔到，
自己攪錯唔通走去催公司同事咩？我打完email 就算喇，我都唔想催人，
因為都要明白ｄ同事都好多野要處理，如果個個都話趕真係想做死人咩？

家姐老闆有個客做裝修工程要買第三者責任保險，但個客又係次次就開工先去買，
但呢ｄ通常要報價，其實個報價同事都好快手架喇，不過琴日人地放假，
今日出到報價都好好，本應幫個客落實做，同埋叫同事幫手快ｄ出cover note 聽日開工，
點知冇耐家姐老闆又打黎話個客話內容有ｄ野改，又要『拿拿林』通知報價同事改野，
臨放工家姐老闆問我收到cover note 未，我check 完未收到，
家姐老闆話催到同事甩褲都要催佢快ｄ出，因為聽日開工，不過我幫手出完email 就算，
ｄ野咁遲整又野改仲要催人，我真係唔敢，實定比人炳，所以都係留左email 算。

所以今個晏晝係咁兜兜轉轉做埋ｄ白做野，攪到又整唔到心急老闆ｄ野，
過埋聽日心急老闆又返黎，好似完全未做到過佢ｏ既野咁，
有時ｄ野一日拖一日，時間就越來越少越來越趕，唉，通常年年呢個時侯都會燥狂症發作。
今晚都係早ｄ訓，費事病埋仲死多幾成。

<<大得好快o既薯仔芽＞＞

＊　＊　＊　＊　＊

始終都係放假最好，可以訓到飽晒先起身，
呢兩日都冇咩特別野做，上下網，自己整下野食咁，
仲有出露台睇下ｄ花花草草咁，之前買左薯仔冇食到，
跟住佢發左芽，但一直都冇放佢落泥，最近一放落泥度真係大到『巴巴』聲，
我諗一日有高到一吋，所以要定期幫佢影下相，
仲有落左ｄ粟米種子，呢兩樣植物都幾粗生，而且我又食ｏ既添，
真係好期待可以食到自已種ｏ既野。

早兩日唔知做乜，夜晚腳抽筋，以往都有試過ｏ既，有時天氣凍隻腳凍都會有咁情況，
通常抽一陣就冇咩事，但早兩日唔知咩事，抽完停陣又抽過，不斷間斷間斷，
自己卒下腳都唔得，後尾都係要勞動怪戰先生幫我卒，佢仲話我做乜唔出聲媧，
費事一陣見到我己經『口吐白泡』，我又唔係『史特斯曼』，做乜會嘔白泡媧，哈哈！
不過話時話都冇試過咁，可能我企ｏ係度睇電視睇左一陣，隻腳可能企得太耐後抽筋，
真係唔認老都唔得，而我由細到大都唔可以企得太耐，所以我都好難做ｄ要長期企ｏ既工作，
以後都唔好懶叻咁企咁耐咯。

果然真係有d 野唔提得，一提左就衰架喇，
琴日都仲話緊放完假返黎難得唔係太忙，一提就衰左，
因為今日淨係晏晝都做到夠晒本，煩煩老闆難得一個朝早做左唔少野，
跟住ｄ手尾就係我跟，家姐老闆返親都一定有野做，
本來星期五ｏ既下午應該有定放假ｏ既mood，但今個晏晝真係充實到暈，
有時急急忙忙都唔知有冇做錯野，不過放工時坐坐下車就諗起有野衰左。

事緣家姐老闆成五時都未走係等下公司有冇份memo 返黎，
若返左佢今晚去見個客可以親手比佢，
但我開左信箱唔見有，於是o係網度print 返出黎，然後『打發』佢走，
可惜原來佢仲等緊我整個quotation，呢個時侯煩煩老闆又返左黎，
密密手想做晒ｄ野走人，所以等到家姐老闆走左先去廁所兼準備收工，
果陣都已經五點四十五分，家姐老闆好好手尾，自已鎖左房門走左，
我諗住放返ｄ野入去之後臨走先再鎖門，點知呢個時侯家姐老闆又打黎，
叫我查左個保費覆埋客先，咁可以安安落落，但打比個客飛左去留言，
我又怕走左後個客先打比我，咁我又點覆到佢個數？於是打返比家姐老闆，
佢叫我fax 去佢屋企，等佢再覆客，於是又急急忙忙上網揾條數fax 比佢再收工，
呢個時侯女王都已經拎左手袋黎接我地收工，原來已經夠晒鐘，於是立即關電腦拎手袋走人，
坐車途中先猛然醒起唔記得幫家姐老闆鎖返房門，又衰左添，
所以話ｄ老闆唔好成日咁晏臨收工最後一分鐘先叫人做野，ｄ野急急忙忙通常容易有錯失，
分分鐘做左等於冇做，仲要衰埋添，其實我都唔知老闆收唔收到我個fax，
都唔理喇，第日都係臨收工先去廁所唔好鬼聽電話好過喇∼∼

所以又一個教訓就係．．．．．唔好亂ｕｐ野，
攪到自己做返夠本喇，係咪衰呢？