<<挖出黎的小薯>>
<<D 小薯係咪好"的式"呢??>>
＊ ＊ ＊ ＊ ＊
今日訓到十二點幾先起身，琴日冇去飲茶，今日去飲返，
晏書都幾好陽光，暫時冇乜凍ｏ既感覺，不過話今晚開始凍，聽朝仲話得１１度，
咁凍凍點返工呀？？好”橙”架，但照計聽日都應該有得早走，
最差打算都放四點，不過聽晚會去怪獸家姐屋企，因為佢除夕日生日，
所以幾乎年年都ｏ係佢度同佢屋企成家人一齊過除夕喇。
上個月種落泥種ｏ既薯仔都有收成喇，不過好細細粒，唔知係咪方法唔ｏ岩呢？
暫時挖左幾粒出黎，覺得好得意，因為未試過親手ｏ係泥度挖著仔，
仲有一棵薯仔仲生長緊，唔知呢棵會唔會有大ｄｏ既薯仔收成呢？
＊ ＊ ＊ ＊ ＊
因為聽晚都預左好夜返，未必打日記，所以提早一日黎個２００７年回顧先∼∼
回顧今年我整體覺得都係開心多過唔開心，所以真係覺得好幸運喇，
工作上終於同前細佬老闆分左手喇（唔再幫佢手），不過我地當然係好和平果隻啦，
大家只係唔再係『上司同下屬關係』嗟，我依家仲可以以『長輩』對住佢添呀，問佢驚未？？哈哈！
依家有女王已經服待得佢好好喇，有女王幫佢都好放心，而我回復返當初入黎呢間公司時咁，
服待三個女老闆，工作量應該可以減低返輕鬆返ｄ，而又好慶幸ｄ老闆都對我好好，
出年年中ｏ係呢間公司就快六年喇，時間真係過得快。只係公司後期分行裏面某秘書唔再friend，
所以依家分行裏面已經冇以前咁和諧喇，但唔緊要啦，我都係幫三個老闆手嗟，
其他人話之佢，不過就要睇下下個月會唔會通過，將原本分行秘書ｏ既職務分晒比ｄ秘書做，
話唔定又掀起風波。
自從搬左過黎住都兩年，我覺得ｏ係呢度生活得幾開心幾適應，遠離香港好似壓力減少，
而且因為要早起身的原故，將以前晚晚夜訓ｏ既壞習慣改左，早睡早起ｏ既感覺都唔錯丫？
而且仲有機會做ｄｏ係香港冇乜機會做ｏ既野，就係種植植物喇，對我黎有新鮮感又學識左唔少野添。
過多兩日就係新一年，今年冇乜太大感觸，或者因為時間快得令你冇時間去感觸，
０８年北京舉行奧運，我幸運地抽到門票，所以都好大機會去北京一趟，都好耐冇去過遠行喇，
除左北京，始終都好想再去日本一趟，上次去日本都相隔十年喇，唔知幾時有可以實現到呢？
新一年亦最想世界和平，希望身邊每一個人身體都健健康康，生活過得開心，同埋識得珍惜多ｄ，
無論係人或者物都係，有錢冇錢都唔係最重要喇，因為好多野冇左，真係有錢都買唔返。
好喇，ｏ係度預祝大家新年快樂，有個開心ｏ既假期∼∼
Happy New Year！！！\(^o^)/
| 
