恭喜發財呀~~
踏入鼠年祝願大家心想事成、身體健康、日日開心、人工加多多，總之樣樣都好啦。
＊ ＊ ＊ ＊ ＊
琴日冇打日記，因為去完阿媽度食飯成點鐘先返到屋企，真係攰到立即撻左落床做死豬。
琴日返左半晝工，都好彩順利半晝走得，其實一朝早家姐老闆又幾個電話打黎，
不過有兩次又係緊持冇聽電話，果陣我ｏ係度碎緊紙，但我緊持唔聽，
因為我一定要ｏ係放工前碎左堆文件，唔想留過年喇，因為放完假實多野冇咁快可能清野ｏ既，
不過長氣ｏ既家姐老闆，ｏ係我碎緊紙之中打黎一次，然後留左message，
隔左五分鐘又再打黎，果陣我仲未碎完，但我仍堅持唔聽，佢留言叫我覆佢，
冇耐女王經過，都話聽到我電話響左幾次，家姐老闆真係太心急喇，
一日未聽佢電話佢真係一日都未罷休，有時又難怪細佬老闆話忍左差不多三十年∼哈哈∼
碎完紙先覆佢電話，但我都有話佢知我碎緊紙，仲話佢知我一定要毀滅晒佢添，
老闆聽到ｏ係度笑我，其實我都係想話佢知我做野ｏ既style，有時都要比返少少空間我囉。
好彩之後佢冇打比我喇，終於可以放工去行左半日街再去阿媽度食飯。
＊ ＊ ＊ ＊ ＊
因為太攰又太凍，今朝訓到成點先起身，以往年初一多數先去怪獸媽度拜年，
夜晚再去阿媽度拜年，今年因為怪獸媽不在喇，所以可以訓晏ｄ，夜晚先過阿媽度。
起身後煎過阿媽蒸ｏ既蘿蔔榚黎食，跟住突然諗不如今日試下去新口岸過關，
然後先去元朗行一陣先，於是換好衫動身坐地鐵去『皇崗站』再經『福田口岸』過關。
呢個口岸都開始幾個月，但人流一直好少，鬼咩∼坐火車又係駁返去上水，
咁同坐去羅湖過關分別唔大，時間又差不多，但羅湖口岸配套已經成熟，
所以ｄ人梗係唔鍾意行呢邊啦，都唔明ｄ人點設計ｏ既。
今日雖然係大年初一，但呢個口岸真係非常非常冷清，同時間過關ｏ既人都十足十個，
羅湖口岸或者皇崗口岸ｄ關員一定忙到死，但呢度ｄ關員得閒到猛咁傾偈，
因為依家有左ｅ道，所以成粒鐘都唔知有冇一個遊客經過，若調黎呢邊做真係發達。
過晒關之後大部份人係去坐港鐵，但我地就去坐小巴到元朗，
不過因為冇人行去巴士站果邊，都有ｄ驚行錯路，出到天橋望落地下ｏ既小巴同巴士站，
真係車仲多過人，但大家都係去元朗，小巴就比巴士平一半，小巴六蚊，巴士就十一蚊，
所以ｄ人都坐晒小巴，只見巴士度幾乎只有司機一個，
雖然小巴都會兜一ｄ平時冇乜機會經過ｏ既路，但反正唔趕時間，都冇所謂啦，
依家計過由呢邊『福田口岸』到元朗，比由皇崗去元朗又平一半，只係一程六蚊小巴就到，
唔駛駁七蚊皇巴再駁七蚊小巴咁貴，依家物價咁貴，真係要精打細算先得喇。
今日都成點鐘先返到黎，不過唔想太耐唔打日記，所以點都要打埋先去訓。
聽日開始唔駛去拜年喇，終於可以過冬眠ｏ既生活，依家仲係咁凍，
所以由聽日開始決定要ｏ係蛇竇度渡過喇，太好喇∼∼!!! | 
