星期五喇星期五喇，終於都到左星期五喇（傻左！！）
今個星期都凍左好幾日，朝早起身真係極其痛苦，不過好似話黎緊呢兩日會暖返ｄ。

星期五都例冇乜ｍｏｏｄ做野，朝早有個旅遊講座，今年家姐老闆同心急老闆都有份去，
好在家姐老闆有時間自己去聽唔係我去，因為去聽一粒鐘都幾浪費時間，
聽完自己又冇份去媧，今次佢地去杜拜，所以四月應該都有幾日ｆｒｅｅ，（但願如此啦）。

臨食飯聽到家姐老闆同客講電話幫個客ｂｏｏｋ去驗身，諗住佢會好心急叫我ｆｏｌｌｏｗ，
所以都駛事未夠鐘出去食飯，所以叫女王佢地行先，之後我走時諗住打電話比女王，
但響左一陣都冇接電話，我仲以為女王聽唔到電話響，後尾想再打時，
先發現原來自己撥錯電話，打左比走左幾個月ｏ既小朋友秘書，因為佢兩個英文名都係”ｃ”字頭，
我諗小朋友秘書可能返緊學冇聽電話，自從佢走左之後只係打過一次電話比我，
我估佢睇到我打過比佢，佢可能會好開心咁覆電話比我，不過當佢知道我其實係打錯電話的話，
肯定會扁晒咀，果然食完飯返公司冇耐，小朋友秘書果然打比我，佢好開心咁問我打比佢有咩事，
於是我如實咁話其實我係打錯電話，果然佢立即扁咀，雖然我睇唔到，但聽都聽得出，
但我同佢講，雖然我係打錯電話比佢，但呢ｄ係天意，若果唔係咁，佢又點會比電話我呢？
跟住我地傾左一陣，大家講左少少近況，佢話下個星期一過黎同我地食晏，
都好ｏ既，佢走左之後都幾個月冇見，若佢下一次有機會再過黎，睇怕都唔會咁人齊喇，
因為過完年之後有秘書會唔做，話唔定剩返我同女王都未定，所以襯人齊就要聚下喇。

夜晚因為隻怪獸去左佢家姐屋企攪電腦，所以放工自己一個去左旺角行街，
好似好耐世紀冇出去行喇，聽日唔駛返工可以慢慢行，今次收獲只係買左一盒臘腸，
等過多兩個星期出左糧先再帶彈藥去過∼∼

呢兩日覺得凍左，尤其琴晚ｏ係屋企好似越坐越凍咁，
亦可能因為凍，個人好眼訓好想訓覺，所以都又懶左一日冇打日記，
朝早起身真係好留戀個被竇，點解人冇得冬眠ｏ既？？（超級懶人的諗法）

今日ｏ係公司都唔算忙，不過凍凍地個人真係幾想訓，
所以都冇太大衝勁去做野，聽家姐老闆話過年前佢都就收得工，
若果真係我都會清閒返，但願如此啦，上個月忙左成個月又就黎過年，
我都冇咩mood 做野喇。

返埋聽日又可以做下懶虫，今晚依然凍凍，都係早ｄ打晒日記早ｄ上床ｌｕ∼

今朝起身覺得比琴日凍左，而且今晚又要夜返屋企，所以都決定著定羽絨穩陣ｄ。
返工有少少雨，好彩有拎定遮，朝早因為全部agent 去灣仔聽新產品，
所以office 淨返ｄ秘書非常非常之寧靜，實在太鍾意呢種感覺喇，
而且家姐老闆話晏晝去扮靚靚去電睫毛又唔返更加正，
所以又可以做上個月冇時間做ｏ既『瘦身』，大家唔好誤會係我去瘦身，
而係幫心急老闆ｄ文件scan 左去之後，有ｄ可以唔駛保留ｏ既拎去碎，
因為未scan 前ｄ file 十分肥厚，整理完之後成個file 纖瘦晒，
所以我十分之樂意做呢樣野，好彩心急老闆舊年好數可以保住間房，
咁我都只少有一年時間幫佢scan 野，所以依家成日一得閒少少就scan 野，
好想呢個偉大工程早日有完工ｏ既一日，黎緊下星期開始心急老闆放假待產，
希望會冇咁忙啦，不過就要幫佢follow D客，但係至怕打電話架喇∼∼

今晚去左銅鑼灣某酒店食自助餐，坐地鐵過到銅鑼灣，突然發覺自己好似ｎ個年紀冇過去，
而我又發覺自己至少有兩年冇ｏ係香港食自助餐喇，若果今次唔係細佬有coupon比我，
斷估我都唔會無啦啦過去食，不過兩個人都要補貼百三蚊，但同全數六佰蚊相比，
都叫做抵ｏ既，不過就要怪獸蝕埋車錢囉。

依家真係有心無力，都食唔得多野，好彩唔係比全數嗟，唔係就蝕晒本。
九點零食完行路去灣仔碼頭坐車過黎，返到屋企都係十一點都算幾快，
襯未ｏ係好攰打埋日記就去做豬ｌｕ。