琴日因為久唔久諗起公司壇野，攪到訓覺都發夢，真係麻鬼煩。

因為心急老闆放產假，開始要幫手跟貼Ｄ佢Ｏ既野，
不過呢兩日公司個Webmal 死左，攪到check 唔到野又sent 唔到野，
好似”乸手唔成世”喇。

臨食飯家姐老闆趕住出quotation企ｏ係我隔離，剛剛Print 出黎時舊炭粉冇乜，
因為經理琴日開完會話第日呢ｄ係我負責，所以乘機問佢知唔知我地秘書分工最後點，
家姐老闆話”佢地”講盡量唔郁到我，但我話點都郁到我，跟住老闆話晏晝返黎傾。
不過晏晝佢返完黎要交單，好努力咁寫application，跟住清閒少少又有電話揾佢，
再唔係隻前細佬老闆發傻咁成日ｏ係度行來行去，所以都未有機會揾佢講，
因為郁動到我佢點都要知道，而且我亦要反應我ｏ既感受同諗法，
講真到時真係要幫手做我都完全係比面ｄ老闆，因為都唔想迫佢地太難做，
或者睇下聽日有冇機會，我覺得唔報定案先，有ｄ野一定晒案想反對就煩喇。

夜晚食完飯返到屋企，上緊網時間聽到收機有message 收，
我通常都冇咩人send sms 比我，諗住都係ｄ廣告，點知冇耐怪獸拎左個電話比我睇，
我一望都覺得有ｄ突然，原來係心急老闆send 比我，佢話『妹妹』其實２１號凌晨出左世，
重七磅一同家姐好似，因為怕同事長途跋涉，所以冇一早通知，
原來琴朝老闆已經生左，比預產期二月七號都早左好多，雖然都預左佢會早，
呢隻老闆真係丫∼∼上星期佢本來話今個星期開始唔返工，但如果有時間都可能會返下黎，
琴日佢都有比電話我，話唔會返黎，因為睇完醫生叫佢唔好周圍走，
我只係諗快架喇，所以醫生先唔比佢周圍走，而且佢呢兩日都有比電話我，
反而今日晏晝佢曾比個ｓｍｓ我交待公司，臨放工比過電話佢冇接，
我仲同同事講唔知係咪走左去生仔，但後尾佢都有覆電話比我，仲話有ｄ野等佢返黎跟，
誰不知原來琴朝已經生左，都好彩佢真係冇返公司，唔係真係如我同同事講笑咁講，
佢返到公司作動，穿埋水囊要我挽住個水桶陪佢去醫院就慘喇，再唔係要我幫手接生就死喇，
我冇經驗架嘛，嚇死死都似∼∼哈哈∼∼但點都好，佢生呢一胎都曾要訓床成個月，
辛苦左幾個月生左個ｂ出黎真係鬆晒，聽日返工都打返個電話恭喜下佢，
但順便要話過佢先得喇，生完仔都掛住公司ｄ野，真係唔應該∼∼

仲有我ｏ係老闆個email 睇到個新ｂ張相，真係同家姐仔好似，
老闆老公仲將兩個女剛出世ｏ既相併埋一齊，真係好鬼似，我覺得兩個都似老闆，
大大隻咁，但點都好，最緊要ｂｂ健健康康就得喇∼

又到星期一喇，朝早分行秘書會同班經理開會，
其中一個議題就係傾分行秘書職務ｏ既野，其實ｏ係正我個位隔離房開會，
有時細心都隱約聽到入面講野，但係好衰附近ｄ人好嘈影響我聽唔真，
雖然開完會分行秘書都會話結果比我地聽，但人總係心急想八家嘛∼∼

開完會出黎問分行秘書結果點，佢話結果係再冇分行秘書呢個位，
將呢個職務ｏ既野分比我地五個秘書做，兩個兩個一pair，
女王同分行秘書負責每日埋數上板同做report 等，
攪事秘書同地獄經理秘書負責每個星期開會ｏ既powerpoint，
同事每朝開會報分等等，而我因為身份特殊，就安排佢地以為好輕量好簡單ｏ既野比我做，
包括訂printer toner，換toner，printer 問題，
訂文具同埋每月第一個工作日開會ｏ既糖菓零食等，雖然睇落好簡單，
但都要花我時間出街，有時佢地冇乜冇物時又走黎講，我聽到時心諗：
好丫，佢地都明知我衰，若真係做起上黎唔駛旨意催我，我閒先去理啋佢地，
話之佢地投訴，反正我都衰開。

後尾放工坐車時諗諗下，其實我係咪有必要幫佢地做呢？
呢ｄ都係佢地ｄ經理單方面傾出黎ｏ既，雖然煩煩老闆反對唔到，
但我覺得我冇必要聽佢地講，我又唔係佢地請返黎，佢地又冇份出糧比我，
佢地憑乜野旨示我做野？佢地唔捨得出錢請秘書返黎做野，ｄ野咪佢地自己agent 做返囉，
點解要用人地ｏ既秘書黎服待佢地呀？錢又冇份比，而且亦冇明文規定ｄ野一定要秘書做，
佢地揾到錢又唔見分ｄ比我？我做咩咁笨呀？？等我一於同老闆傾下，
睇下佢地點諗，若果我企硬唔幫手做會點？至多兩個老闆ｏ既野我自己殺晒，
我自己計數上板，出去拎文件，反正依家老闆ｏ既野大部份都係我做，
我不嬲都冇咩野要靠人，分行秘書職務本來只係幫所有agent 同內部做一個橋樑嗟，
我負責返我老闆ｄ野囉，有咩咁大不了，ｄ縮骨友想慳錢佔人便宜揾人笨？？
呢個如意算盤冇咁易比佢地打得響，一於要企硬先得∼∼

呢兩日天氣暖左好多喇，而且仲可以訓到日上三竿先起身，
雖然好似好浪費時間，但同平時返工起身時天都未光感覺好好多，
有太陽伯伯ｏ既感覺真係好好多，而且呢兩日天氣好好，陽光普照，
真係覺得好舒服呢∼∼

平時返工極度唔夠訓，呢兩日主要都係休息下，今日仲去左花卉世界，
因為仲有兩個星期左右就過年喇，又係時侯浸水仙喇，其實應該早少少浸添，
不過呢排真係幾攰，都冇專登去買，以往我都係買返黎自己”介”，
但今次時間的關係，同相熟老闆買左ｄ已經介左ｏ既，今晚開始要浸水喇，
唔係怕太遲喇。