終於到左星期五喇，雖然今個期放左一日假，但都一樣過得好耐咁。
朝早全部人開會，又可以同ｄ秘書傾陣偈先開工，不過之後覺得自己好燥火，
事緣秘書收晒ｄ『班會費』後比完我地分行ｏ既財政煩煩老闆後，
又要將ｄ錢比我處理去入銀行，係要排隊果隻，次次一收到都覺得好煩，
唔係我斤斤計較，始終呢ｄ『班會費』係公家野，唔應該係我去做，
雖然煩煩老闆係負責財政，但我理應都係只幫佢做佢自己業務上ｏ既野，
而且銀行入錢唔係最煩，最煩係我仲要打收入支出表，雖然有收據，但實質係點用我未必知，
因為我唔係『經手人』，好多時打完比老闆之後同分行秘書講唔ｏ岩，
之後分行秘書又要黎話返比我聽邊度唔ｏ岩要改，轉轉折折真係浪費時間，
今日仲聽到煩煩老闆話最好９號之前做好，講真要做一定做好，唔係好複雜，
但要限我時間我就唔多鍾意，因為要就佢去旅行前整好丫嘛。
冇耐煩煩老闆又比張紙我打，話用黎『比佢地』記錄做到幾多數，我果刻好想問：
『佢地』係指邊個佢地？不過我都係冇問到，
因為我怕聽到我唔想聽到ｏ既答案（全分行同事）而黑面，所以算，反正打好少野。
之後家姐老闆又拎住一大堆用過ｏ既廢紙同埋我次次幫佢出quotation 後執埋一套的申請書，
佢話比我將ｄ廢紙做環保紙（做fax紙）同埋將ｄ申請書裏面ｏ既form 分返開放返去『藥櫃』，
然後問我放ｏ係邊，我一見到已經好閔憎，我果張得一呎半ｏ既位仲邊度放得到？
所以我答冇地方放，放住後面張枱先啦，不過冇伸手接到，家姐老闆拎住堆紙有少少唔知點好，
唯有話我放住ｏ係我部scanner 上面先。我等佢入左房就成堆pat 住ｏ係後面個位，
冇耐就成堆拎左去垃圾桶。
其實我並唔係唔想環保，但環保對我黎講實在要犧牲太多太多時間，亦冇咁多地方，
我要慢慢將ｄ紙起晒釘，另外ｄ申請書要將每份裏面不同ｏ既表格抽返出黎，
同類型ｏ既放埋一齊先再拎去大藥櫃放返好，試問我果呎半檯做野都唔夠位，
仲邊有地方攤開放幾隻form，再唔係執到一半佢地又一堆文件拎出黎，真係ｄ野放都冇地方放，
唔通放ｏ係個頭度又或者放ｏ係個Pat 度坐住？佢地自己ｄ野想執乾淨就pat 晒出黎我度，
雖然幫佢地執呢d都係我份內事，但我自己ｄ野未清好都亂糟糟，
就快變成垃圾婆咁比一堆堆ｏ既垃圾圍住喇，都唔體諒下人地ｏ既？真係好鬼閔憎。
不過，我都食完飯之後都好ｄ，繼續做自己野，臨放工去煩煩老闆個out tray 度拎ｄ文件，
見到我幫佢打果張表上寫ｏ既野覺得好想笑，因為老闆寫住『好！！只需再更改一些，thanks!』，
跟住我比分行秘書同女王睇，佢地都ｏ係度笑，仲竪起手指公同我講『Good』，
我就笑唔通比老闆發現左我今日發癲所以tum 下我？？我諗緊返去若同怪獸講，
佢實又講係果句：『人地怕左你喇！』，哈哈！不過算啦，我當老闆tum 返我喇，
咁就原諒佢一次咁多啦，下次唔好喇∼∼∼ ^++++^
今日又超級長氣添~~ :P
| 
