琴晚放工去左女王屋企攪機，因為佢上唔到網，揾寬頻公司黎check ，
連到上網但又非常非常慢，攪到個幾星期上唔到網，好橙，所以叫怪獸一齊上去佢度，
點知女王媽好鬼客氣，返夜班ｏ既佢專登請左假揾我地出請我地去食飯，
食完飯後都攪到好夜先走，依家估計可能張Network 卡有問題，所以要揾張咭下次先再上去，
因為夜走琴晚都點幾鐘先訓，家陣人老左真係咋左，呢個星期因為有節目夜訓都幾攰，
又攪到熱氣牙肉腫，原本今晚細佬有Coupon比我去酒店食自助餐，
因為太攰又牙肉腫怕冇乜心機食唔到野，所以都係留返下星期再去。
今朝一早家姐老闆打比我，約我同女王食lunch，因為佢話過追到數請我地食飯，
到食飯時出到電梯大堂撞到心急老闆，佢今日冇約人食lunch，
聽到家姐老闆話請我地食飯佢又話要請埋一份，所以結果一行四人一齊食。
我其實都好少可同老闆食飯，咁耐都係試過一兩次，同呢兩個老闆都有野講，唔會有咩壓力，
原本諗住襯今次同家姐老闆食飯時篤下人背脊，講下依家分行裏面ｄ牛鬼蛇神，
因為家姐老闆呢兩日都好激氣，情況都我地少少相同，在不被通知下要佢負責教ｄ新人，
但家姐老闆唔係經理，間中叫佢同ｄ人分享下經驗ｏｋ，但要佢個個星期佢覺得好困擾，
當然我又唔放過機會講我地秘書要分野做ｏ既事啦。
不過今日同心急老闆一齊食，又費事向佢提起，怕佢一下激動作動要生仔，
所以大家都係傾閒偈多，今次我又食左甜品『心太軟』，一係唔食，
一係一個星期食兩次，肥死！！
因為今日冇乜精神，做野都不太有狀態，但最開心係收到通知張Access card 用得返，
立即開心咁去試下，仲記得舊年一月十五日唔用得，到今日差不多足足一年，
終於守得雲開見月明喇∼∼
今晚都有約內地朋友仔食飯，所以都冇得太早返屋企，好彩聽日星期五喇，
放假我一定要好好叉返充電先得喇∼ | 
