今朝未夠鐘就收到家姐老闆電話，以為咩事，原來係想揾分行女經理，
個傻老闆琴晚去簽完單，份建議書漏左ｏ係個客屋企，因為個客同分行女經理住得近，
家姐老闆諗住叫個客放ｏ係女經理個信箱，等佢今朝拎返黎，
但好衰唔衰女經理好少放假，就係今日放假，結果份單要等聽日先入得，
鬼叫自己烏龍咩！！
因為女經理冇返，中午諗住ｏ係佢間房食飯，點知間衰外賣公司唔知做乜，
等左大半個鐘都冇黎，結果要落樓下快食，呢餐真係快餐喇。
聽分行秘書話分行女經理約我地分行ｄ秘書２４號食晏，真係好怕呢ｄ飯局，
我地估計一來係聖誕同我地食餐飯，二來可能會講下黎緊ｄ秘書ｏ既新任務，
因為老闆仲未追完數，我都唔想問呢件事住，反而今日女王有機會同佢老闆傾偈，
一傾都傾左好耐，初時見女王出黎面紅紅以為佢好勞氣添，
原來係佢塊面無啦啦紅左，而佢問完老闆ｏ既結果，將分行秘書ｄ工作分比其他秘書，
似乎係事在必行，只係差未知細節，其實我地幾個都真係覺得係壞消息，
佢地為左想慳錢就加ｄ秘書工作，對秘書黎講冇選擇餘地。
而女王都問過我ｏ既問題，佢話因為我涉及心急老闆係第二個分行，
所以我有可能唔駛分黎做，但係就要ｄ老闆upline 秘書做，
咁即係要女王幫家姐老闆做，而煩煩老闆就要分行秘書做，真係聽到都發忟，
即係我唔做就要佢地做埋我果份，真係好絕，賤男真係賤男，
仲要話點樣分工由賤男黎諗，佢算到咁盡，即係死棟啦。
分行秘書自從上星期開完會知道呢個消息都已經唔開心，今日聽到事在必行，
知佢更加唔憤氣，似乎佢今次真係去意已決，仲話定比我地聽，如果揾到新工，
分分鐘唔一個月通知就立即走人，話知佢老闆死，其實攪到咁有時都幾心ｕｐ，
本來好地地，又攪走一個秘書，我ｏ係呢度幾年，都睇到唔少唔錯ｏ既秘書好心淡咁走，
有時真係唔明果ｄ人點諗，點解唔可以體諒人多ｄ？下下都為自己利益去諗，
當然，呢個世界冇話冇左邊個會死，請過一個可能人工平ｄ，分分鐘聽話ｄ添，
不過我真係唔想佢地再叫ｄ秘書黎問我野，真係教都教到冇癮，
就算教得幾咁好，同佢地相熟後，可能又做得唔開心走人，佢地有冇檢討下自己？
好似我可以ｏ係呢度留低幾年，就係因為ｄ老闆對我好，點解我ｄ老闆可以做到呢？
依家ｏ係呢個新大老闆管理下已經唔服氣，樣樣有佢地話冇我地話，處事又唔公平，
點知又論到分行攪埋呢ｄ咁ｏ既制度，真係同舊大老闆當政時ｏ既安穩日子相差好遠，
而且我都唔係咁鍾意而家大部份分行ｄ agent，若果唔捨得ｄ老闆對我咁好，
我都唔係好願對住呢個班底，雖然出黎做野身邊ｄ同事來來去去，
有舊ｏ既離去，新ｏ既又黎，但睇住咁多ｄ同事唔開心咁走，真係覺得無奈，
預計過埋年幾乎我地熟ｏ既秘書都會做到心淡走人，可能會剩返我同女王ｏ係度相依為命，
當然情況冇變就係，因有賤男一日ｏ係度，第日都唔知仲有諗出ｄ咩衰野出黎，
當ｄ世界有ｄ衰人存在當政，ｄ好人、善良ｏ既人就唔會有好日子過，
唯有過得一日得一啦，有機會我都會同家姐老闆傾下ｏ既∼∼
| 
