放假喇，第一件事當然要訓教啦，訓到成點先起身，
之後去左飲茶，好似好耐冇行街，於是忍唔住去羅湖城行左一趟，
其實都有諗過造衫ｏ既，不過又怕一造就一發不可收拾，所以都係忍住左先，
不過反而買左兩對鞋，一對係私文返工鞋，一對係boot 黎，
因為我本身有兩對白色boot，所以買左對深啡色，之後去買埋餸先返屋企，
今日天氣麻麻，都有ｄ雨，好在放假嗟，返工落雨覺得好麻煩。

夜晚睇女王日記，發現公司秘書間開始又有是非喇，
我ｏ係公司做左五年，呢類問題都ｏ係公司會久不久又會出現，
雖然好多野未必係自己ｏ岩晒，不過我地又係要去害人，反而人地周圍唱我地，
佢自己夠冇去反醒自己有冇野唔妥啦，個個人都覺得自己ｏ岩晒架啦，所以都冇所謂喇。

果然真係右護法ｏ既接班人，賤男經理親自揀ｏ既人，賤男揀親ｏ既人ｏ係我眼中都係『騎呢』，
可能佢有特別ｏ既眼光啦，不過呢個同事同右護法相比，真係有過之而無不及，
右諼法雖然剋人憎但同佢相比都仲有骨氣ｄ，右護法同人唔ｏ岩都會唔會去求人，
冇佢咁覺得人地對佢晦氣都仲厚住面皮黎借野，仲要成日借左要人提佢幾十次先肯還仲唔認，
以前仲當佢靚妹好林比人話佢仲維護下佢有時鄧佢肉赤添，
原來當人地做熟左ｄ野識左後就覺得自己叻左巴閉喇，
家陣唔比人話得喇，又話我地對佢呼喝針對佢，又唔諗下之前佢對小朋友秘書咪仲衰，
見人地細個佢又唔鍾意，對人講野鬼咁晦氣，反而人地都唔似佢咁咁小器，
好啦，人地似家咁叻都應該唔駛黎問野喇，仲好，以後大家除左公事上接觸外，
我都唔會再講多句無謂野，借野就更加免問，反正我職責只係對自己老闆負責，
唔似人地依家係咁做好人去拉攏關係，即使傳到老闆度都係咁話，因為都唔會影響佢地，
唔通老闆會因為咁炒左我呀？若果老闆真係會咁做，咁我都唔想為ｄ唔明事理ｏ既人打工喇，
最好請埋果ｄ人啦，等佢一個人做晒全個分行ｏ既野囉，咁咪仲叻過以前右護法囉，
反正人地都依家已經覺得自己好叻喇。

雖然知道呢件事都係有少少勞氣ｏ既，不過我都唔會再為ｄ人激氣，
最緊要日後要小心提防呢種小人就真。

好喇好喇，發洩過後，唔去諗呢種人喇，以免影響放假美好ｏ既心情。

捱埋今日終於放假喇，但放假期預左會好忙，
其實今朝都食飯後都唔算太忙，因為煩煩老闆唔見人，
家姐老闆返黎同佢準備呢幾日要見客ｏ既野，接近中午佢又出左去，
心急老闆又係上晏返過黎晏晝唔見人，所以食完飯後都比想像中清閒，
於是把握時間scan 晒手頭上pending 緊ｏ既野，之後save 返去老闆電腦度，
另外就係要執老闆ｄ form，因為冇我ｏ係度佢地通常都唔識揾野，
所以放假前要執返齊ｄ野要佢地隨手都拎得到，以免佢地嗌晒救命。

本來安排都幾順利，不過發現家姐老闆五點返左黎，仲ｏ係度寫緊份保單，
知佢簽左單實係想我做埋先，因為都唔想麻煩女王咁多，本來咁諗都好ｏ岩ｏ既，
不過ｄ時間咁鬼晏，所以都開行turbo都唔得，冇耐又見煩煩老闆返黎，
心諗死緊喇，好彩最終佢ｏ係度打電話都冇叫我（定係冇發現我未走？），
本來預算夠鐘走人但因家姐老闆返黎而打亂左，
好似次次臨放假都覺得一定要盡量清野都埋安排好ｄ野先放得安心，
因為都唔想ｄ老闆麻煩到其他秘書，有時真係有ｄ似辦定身後事同ｄ秘書臨終托孤咁．．．．
啋！啋！啋！lur　口水講過.....比阿媽聽到實鬧~哈哈~~
結果都成六點半左右先走，因為冇得出門口都要家姐老闆幫我開門送我一程，
（又黎喇．．．哈哈）
終於都走得甩喇，不過放左工都唔理公司野喇，唔知有冇野漏，但有咩放完假返黎先算喇，
呢幾日幾大要盡情抖下先得喇，因為返工實忙到甩褲呢∼

今晚都落幾大雨，同埋好似會涼返少少，好在聽朝唔駛返工，一於話之佢大覺訓咯∼∼呵呵∼

返多兩日就可以放假，不過放假前要努力做野，
今日心急老闆放假，諗住襯機scan 定晒ｄ野，
點知又係人算不如天算，家姐老闆自從單dum 左半年ｏ既大單有轉機之後，
好似塞住ｏ既野暢通左咁，之前有ｄ call 過但又冇乜回音ｏ既客，
好似無啦啦自己浮返晒出黎咁，仲係一浮出黎就中咁，雖然可能係單細細，
但都總叫做有單簽，仲要係一連幾日都有機會簽單添，似乎我同女王ｏ既命運一樣，
一放假老闆就有單簽，唔知係咪我地應該放多ｄ假先ｏ岩呢？

每次家姐老闆一做野，我就立刻忙起上黎，真係效果顯著，
直至上星期我都幾清閒，可以日日都抽到時間出黎scan野，
但今日只係諗住scan 多三個客ｏ既野埋尾，但就做極都做唔到，
因為都好多野要幫家姐老闆準備，好似佢話齋，仲襯我ｏ係度丫嘛，
睇黎聽日應該要由朝到晚都冇得停架喇，
聽日分行秘書放完假返工，佢肯定忙到死，而我放假前又肯定忙，
睇黎我地兩個都要一齊捱下喇。