放完三日假返工，唔知點解真係超級唔煩郁，返到公司都唔多想做野，
完全未進入狀態。其實都係放多左一日假嗟，又會懶成咁ｏ既？
好似都唔止我係咁，同事們好似都有咁ｏ既症狀，唔知係咪同天氣有關？

今日都唔太多野做，只係唔多願做，所以都冇太多野做好，
過多兩日全部agent 又去ｄ咩『營銷大會』，又可以清淨大半日，
實在太好喇∼

夜晚國內有節目介紹『奧林匹克』歷史，好詳盡，仲有好多運動員ｏ既感人場面同體育精神，
幾好睇，點解香港唔會有類節目ｏ既呢？一味太商業喇，好在呢邊節目都好多選擇！！

今日都好大風，唔知聽日會點呢？

＊　＊　＊　＊　＊

今日終於查到我抽中邊場奧運賽事喇：

2008年08月20日

田徑賽事　：
男子800米第1輪
女子鏈球決賽
男子5000米第1輪
男子撐竿跳高及格賽-A/B組
男子110米欄半決賽
女子200米半決賽
男子200米決賽
女子400米欄決賽

2008年08月23日

田徑賽事　： 男子標槍決賽 女子跳高決賽 男子800米決賽 女子1500米決賽 男子5000米決賽 女子4x400米接力決賽 男子4x400米接力決賽

唔．．．睇唔睇好呢？仲要考慮好多野．．．．．

<<終於記得拎返個"蝦毛芝芝" 布丁出黎整 ＞＞

＊　＊　＊　＊　＊

話咁快又到假期的最後一日，時間真係過得快，兼且開始踏入十月份年尾，
諗返九月好似過得好快又冇咩建樹，或者好似家姐老闆都冇咩單入，
連我都相對靜左，對我黎講係好事咯，不過，出年就死喇，睇形勢似乎難逃搬房ｏ既命運，
連我自己返工日日活ｏ係隨時比人迫遷的陰影，都係過得一日得一日啦。

琴晚（今朝成四點幾先訓）訓到一點起身，怕訓得太多今晚訓唔著，都唔夠再訓，
起身落樓下食ｄ野，之後返屋企上網，再出去買餸整野食，咁又過左一日喇。

之前同同事ｏ係公司樓下『城市超級』貪得意買左個”蝦毛芝芝”布丁粉，
見佢十零蚊，有得整野食又有兩個公仔模，所以買左個諗住整黎玩，
放放下都唔記得左，今日先的起心肝拎出黎整，雖然味道都係一般，
始終最主要都係貪玩貪得意，食起上黎都覺得開心ｄ囉∼∼嘻嘻！！

p.s. 我隻水滴『栗頭』仔今日原來條領帶唔同左色同埋多返對黑襪仔著，
       差ｄ都冇留意佢ｏ既改變添！！

琴晚聽埋電台節目『恐佈熱線』，再上左陣網先訓，都成三點鐘，
結果今日訓到三點幾先起身，我仲以為睇錯鐘，真係又破紀錄。

其實都咁晏先起身，所以都冇食到野，之後去左超市同街市買野，
然後先返黎整野食，之後邊食飯邊睇電視，好平凡咁過左一日，
不過放假可以訓到咁飽真係開心喇∼∼