今日又係做懶豬o既日子，因為琴晚夜訓，所以今日訓到接近一點，
之後去樓下超市買左ｄ麵返黎煮黎食，跟住上左陣網再出去買餸，
好在出去時冇落雨。

天氣唔好最好就係留ｏ係屋企休息，而且落雨又冇咁熱添，
聽日唔知天氣會點呢？

琴日先話完過左一個平靜的三號風球，今日竟突如其來掛上八號風球，
果然真係『天有不測之風雲』。

今朝早出門口時都睇過天氣預報，已經所有風球都落晒，
只係預報今日成日都會不時有雨，而且我今朝都幾好彩，
返到公司落下先開始大雨，食完早餐後上到公司聽到同事話已經掛左一號風球都覺得奇怪，
不過亦不以為意繼續做野，只係閔憎公司網死左攪到完全唔可以check 野好唔方便。

因為天氣唔好，所以今日都ｏ係公司叫外賣，食完傾傾下偈同事過黎匯報話就快掛八號，
大家都覺得好驚訝，然後再聽收音機確實後，大家都覺得要準備徹退，
怕太遲走會好迫人。

平時我應該向家姐老闆匯報，但佢放左假，本來諗住執拾好後打比其他兩個老闆，
但今次出奇煩煩老闆打比我，話就快八號，問我公司其他秘書點情況，
我答佢大部份秘書ｄ老闆返左深圳開會，我話我都執埋手尾都準備走，
跟住佢都同我講攪掂就走啦，今日因為一直上唔到公司網基本上都冇乜做過野，
所以可以立即走人，於是幾個秘書一齊走，亦因為打風，所以決定坐火車，
唔想半路塞車，可能我地都較早走，所以都算順利，返到第一次放工買埋餸返屋企添。

夜晚睇新聞先知掛左八跑後交通好混亂，地鐵都迫滿晒人仲要間歇性停止入閘控制人潮，
所以今日早走都咁順利都算好彩，因為今日係星期五，變相多左半日假期，
都算有個得著咯∼∼

懶左幾日冇打日記，因為一連幾晚都幾攰，
今個星期開始家姐老闆放假外遊，早前忙左一個月總算到依家稍為叫做抖下，
不過都好多碎瑣野做，例如幫家姐老闆follow D客，
幫心急老闆執file 準備scan 野等，但始終冇人催促，都係懶住懶住咁做，
希望好好享受今個月的寧靜。

之前熱左好耐，今個星期終於落雨，星期一放工本諗住去探老豆，
點知一放工落雨落到倒水咁，雖然去到佐敦地鐵，但最終都放棄左，
因為要行大斜路，而雨實在太大喇，結果琴晚先再去過，
本仲驚住琴晚打風又會好大雨，但都好彩冇乜雨。
老豆依家氣息同精神都叫唔錯，比剛做完手術時好好多，唯一係血壓偏低，
所以暫時仲係要留院。

今朝起身見到三號風球，但都如我所料唔會再有更高風球，
但今日總算有機會著對水靴返工，可惜係做ｏ既短褲未拎，
若果唔係都唔駛另外帶裙返去換。

雖然呢幾日公司唔係忙，不過放工後都幾攰，好彩聽日終於捱到星期五，
放假我又要好好咁補下眠先得喇。