兩日偷懶冇打日記，因為呢個星期都夜訓，所以都幾攰，
好在琴日晏晝ｄ老闆們冇打電話黎，所以我可以一路scan 野，
一邊寄newsletter，仲可以一邊同女王同埋分行秘書傾偈，難得寫意。

積埋成個星期的眼訓，琴晚又係夜訓，所以一訓落床就不醒人事，
今朝到十一點幾比個電話嘈醒，原來速遞到左，
心急老闆ｏ既雨鞋送到黎喇，我將佢同我先前買果對比，
其實真係分別唔大，之前果對好似係比較黃左ｄｄ同埋冇咁『令』，
但講真要拍埋對比先睇到，所以我真係唔覺得咁差，而且到落雨先著，
幾靚ｏ既鞋都會污糟晒，所以問題不大。琴日我又拍多對鞋返工鞋，
個牌子好似好勁，係『Gucci』，４３蚊，當然唔係真架啦，
不過我鍾意佢鞋頭有蝴蝶，圓頭平踭，仲有覺得對鞋幾軟，
反正我上次入左２００蚊仲有錢剩，所以又試下買囉。

今日又係超級熱，中午去左飲茶，貪佢冷氣勁，之後都返左屋企喇。
今晚屋企隻怪獸去露營，因為果個開體育用品ｏ既朋友呢兩日攪團去camp，
但得一個女人要帶成十零個人，仲有佢對露營都幾生手，
所以隻怪獸都叫做去幫下手，本來佢地都問我去唔去，不過大熱天時都唔好講笑喇，
雖然夜晚絕對冇問題，不過太陽一出真係熱力沒法擋，
我呢個超級怕熱鬼已經唔係當年十幾廿歲為貪玩乜都冇所謂ｏ既人喇，
所以都係寧願留ｏ係屋企好過，至多遲下秋涼先再考慮。

難得今日一個人，心血來潮想整『菜肉雲吞』，自己好少整因為懶，
但又好耐冇食過阿媽整ｏ既，想食唯有自己整，可惜的ｏ係呢度買唔到好ｏ既雲吞皮，
ｄ皮真係薄到張紙咁好似爛，如果唔係都整得ｏｋ架，當然冇阿媽果ｄ咁好啦，
但都好過冇囉。

聽日襯佢未返可以自已去拎衫，唔知做成點呢？著唔著得出黎呢？緊張！！

<<貝貝ｏ係草原上黎一招”巴黎鐵塔反轉再反轉”.....>>

＊　＊　＊　＊　＊

琴晚ｏ係屋企食食下飯突然停電，其實夏天都預左會有呢種情況，
因為到到都開左冷氣谷行晒，分分鐘ｄ電力頂唔順，
好在一個強勁電筒一直都放ｏ係檯頭，唔駛摸黑，而且琴晚都好大風，
都唔覺好熱，最好彩都只係停左十五分鐘左右，若果夜晚仲未有電，
分分鐘要走出露台訓先得喇。

今朝一早家姐老闆的工作源源不絕，因為佢下個月大半個月去左美國，
所以佢一心都會想ｏ係放假前清左好多野，同埋盡量跟進左先，
其實咁ｏ係好事黎，只係今個月我一定會工作量大增，又唔可以慢慢做，
務求ｏ係家姐老闆出發前跟進好。

食完晏幫心急老闆做左五單旅遊保險，跟住家姐老闆打黎要做兩單，
剛做好諗住scan 野時煩煩老闆又打黎，佢都唔執輸做返一單，
只係一半個晏晝就做左八單旅遊保險，果然一踏入暑假就係旅遊旺季。

琴日因要幫心急老闆處理一單送件去上海ｏ既case，講開搵國內速遞公司，
我話我ｏ係江蘇運左對雨靴到深圳都係廿蚊，傾開ｄ雨靴心急老闆話我地公司樓下賣好貴，
我都記得成五佰幾蚊一對，我話我買果對只係３３蚊，佢立時眼睛發光話咁平，
我問佢著幾號鞋，原來佢同我size 一樣，我記得個賣家之前仲有對，
所以琴晚一返屋企就問個賣家，佢都暫時都仲有，不過佢就成日話我果對唔好，
覺得好唔好意思，所以堅持新呢對鞋唔收我錢，我都話唔駛架啦，佢又叫我唔好同佢爭，
所以是但啦，費事拉拉扯扯，但我若唔收老闆錢，佢又實唔肯，
個賣家話叫我當老闆送比我媧，但咁講法等於我之前買對鞋都唔駛錢，
咁真係唔好意思，希望第日ｏ係個賣家個網度見到有另外靚靚的雨鞋再幫襯下佢啦。

＜＜用３３蚊買返黎的雨鞋，我已經覺得好滿意喇＞＞

＊　＊　＊　＊　＊

星期一o既朝早，返工時雖然只係七點幾，但太陽已經好猛烈，真係好熱。

今朝都好靜，因為唔駛開會，女王放完大假返黎，大家當然要吹下水先。
襯朝早靜靜地都盡量scan下野，遲下打算叫女王細妹過黎幫心急老闆做Part time，
因為心急老闆有左ｂ，預左今年可能冇力博殺，一追唔到數就要出房，
心急老闆做左十幾年，文件多到嚇死人，所以都要電腦化，將ｄ文件scan晒佢，
所以打算搵女王妹幫手，scan 得幾多得幾多，因為我真係冇可能抽到時間去清理。

今日我知道拍左ｏ既雨鞋送到黎，所以放工食完飯都好心急返去睇。
見到對鞋我又唔覺得好唔妥，都叫做ｏｋ啦，跟住上網數，再同個賣個講返收到貨同比左錢，
個賣家成日好唔放心我會失望，佢話賣出咁多鞋都ｏｋ，單單係我個對好唔得，
但我又唔覺得，或者冇對比啦，而個賣家成日覺得好唔好意思，話要送返對好ｄｏ既鞋比我，
佢真係太客氣，不過是但啦，推人地好似又唔比面，佢問我鍾意乜色，
我覺得人家送ｏ既都唔好咁多要求，叫佢話事得喇。
難得第一次交易就搵到個好賣家，都真係幾幸運呢。

＊　＊　＊　＊　＊

今日發現水滴『貝貝』已經變左色，好似同對雨一樣有『波點』呢！