<<仔仔送比我o既感謝信>>

<<仔仔臨離別的一刻>>

＊　＊　＊　＊　＊

仔仔終於長大成人自立要離開喇，ｏ係成長中途官網制度經過改變，
本來已經接近成人之際被扣左好多分，而且完全冇晒蜜瓜分餵佢，
真係一度有少少洩氣，好在夠狠心將手頭上本來覺得鍾意ｏ既傢俬拎出跳蚤市場賣左，
依家總算幫佢儲到唔少食糧日日餵佢，所以先有機會大得咁快，
雖然有ｄ波折，但終於長大離開喇，今日開始養左新水滴『貝貝』，
唔知幾時先睇到佢長大後身上ｏ既花紋呢？

今日一返到公司剛食完個飽，家姐老闆就黎揾我，
放低ｏ既係兩個family o既快勞，要幫佢整準ｄ quotation，
家姐老闆ｏ既style通常會一次過準備定幾個plan比客人揀，
而佢ｏ既客大部份都結左婚有小朋友，所以通常一個四人ｏ家座黎計，
當每人出兩份quotation，一個family 就有八份，好多時都唔止一個家庭，
所以今朝一開波頭果個零鐘都係狂出quotation，仲要準備晒有關文件，
家姐老闆話都係應該要做下野，其實係好事黎ｏ既，不過佢一做野我又會忙架喇。

心急老闆今日依然都未見人，唔知佢幾時先返得工？
煩煩老闆今日又有經典野，最近佢地入一張單會獎佢地一支益大多（唔知邊個諗ｏ既！）
今日煩煩老闆入左張單，分行秘書比左支益力多我，我就過去同佢講，獎佢一支益力多，
佢初時問我邊個請ｏ既，我答入單就有喇，點知佢問我冇雪到有冇問題，飲唔飲得？
我真係唔知點答佢，乜一定要雪凍架咩？佢一定睇得廣告多∼∼
後尾佢又比部pocket PC 我，話唔知點解部機唔識郁，
我接左手一睇就知佢ｏ係冇電，因為佢自己經常唔叉電但又唔放低個火牛比我，
但佢自己又唔當叉，次次都係用到冇晒電就問我部機點解唔郁，
跟住我拎左去家姐老闆度借火牛黎叉，原來部機只係剩返３％電，
我然後去話返比佢聽部機係因為冇電唔郁，佢同我講點解部機冇電冇話佢知，
若果果陣ｏ係拎住ｏ係我手，我真係有衝動對住部機講：
『你做乜冇電唔話佢知呀？下次唔好喇。』我都就黎比佢激到嘔電。

琴日因為晏晝補過眠，所以夜晚都唔係好眼訓，
對住部電腦成三點幾先訓，今日竟然比我訓到點幾鐘先起身，
起身梳洗後去左港式快餐店食下午茶，之後去左睇書，
因為到夏天季節都可能會去羅湖做下衫，所以買左本時裝書做參考，
本來諗住去買個袋仔裝部mp3，不過太陽伯伯實在太利害喇，
我睇書果陣ｄ汗都係咁標出黎，自己都覺得自己好臭，
所以都放棄左去買袋仔，去埋超市就返屋企算喇。