＜＜今次收成最大個的蕃茄＞＞
＜＜今日采收的蕃茄＞＞
＜＜酸酸甜甜好開胃的『話梅炆豬手』＞＞
＊ ＊ ＊ ＊ ＊
黎到星期一喇，襯呢今日非紅色假期，晏晝打算去行下『東門』，
其實我都唔太鍾意去下呢度，因為人太多又雜，ｏ係度行街比較要小心，
上一次去行東門應該係舊年復活節喇，果次我拎左大假又係襯平日人少去行下。
雖然我唔鍾意行東門，但畢竟呢度係深圳，想買較潮較ｉｎ但又平價的時裝精品集中地，
所以都想去行下，睇下會唔會買到ｄ平靚正ｏ既野。
今朝食晏前先去露台采收左幾個蕃茄，由開始種到依家三個月左右，
雖然唔係個個都好大個，不過可以有收成已經好開心喇。
之後ｏ係附近食完晏先出發去東門，坐兩個站地鐵去到，
不過天氣都唔多穩定，偶然會落ｄ雨。今日其實想睇下衫同鞋ｏ既，
但我都唔打算花太多時間去行，主力都係集中一、兩個商場，
行左冇耐買左件衫，開價三十八還到三十蚊交易，見間鋪ｄ人都唔算開天殺價先幫襯，
不過今日睇唔ｏ岩心水ｏ既鞋，今次黎東門仲有個原因係想睇下有冇靚水靴賣，
但好似唔多覺眼，還是有我見唔到。
行左個零鐘就走喇，本來想坐巴士，不過有ｄ雨費事迫，都係坐返地鐵，
今日打算再去吉豬島，買唔到鴨掌都係唔心息，我諗因為今日唔係假期，
所以ｄ貨品冇一掃而空，終於買到鴨掌喇，仲買左ｄ鮑魚姑試下炆添。
不過今次去吉豬島仲有個發現，就係吉豬島果個『中信城市廣場』裏面開左個地鐵商場，
以後由我屋企附近ｏ既地鐵站去吉豬島，可以經地鐵一路穿過商場過去，
唔駛行地面要過馬路，尤其夏天時，雖然唔係好遠，但曬住好攞命，
咁以後方便左可以多ｄ去吉豬島行下同去超市喇。
＊ ＊ ＊ ＊ ＊
今日因為時間唔夠所以炆ｄ鴨掌唔夠淋，所以打算今晚再放落真空煲再炆耐ｄ聽日再食，
不過另外試整左一味『話梅豬手』就幾成功，我自己就覺得好好味，
本來諗住整南乳炆豬手，個天氣熱好似又唔適合，琴晚上網唔覺意發現呢味餸，
鍾意食甜酸味道ｏ既我真係ｏ岩晒喇，天氣熱食最醒胃，材料價錢唔價又唔難整，
最重要都係花時間去炆下佢，味道我覺得都幾似ｄ薑醋豬腳薑，係冇左薑味，
味道酸酸甜甜好送飯，我連ｄ汁都用埋黎撈飯添，好正！
依家我識整就唔駛下下要等人生完仔先有得食喇∼∼好野∼嘻！ | 
