＜＜依家已經有五盆非洲紫羅蘭，旁邊仲浸緊好多苗呢＞＞

＜＜生多一片葉出黎的『芫茜』，ｄ葉開始同成長後相似喇。＞＞

＜＜新買的葡萄上的籽＞＞

＜＜今日買返黎的１９吋新芒，真係超平呢＞＞

＊　＊　＊　＊　＊

琴晚顧住上網，攪到成四點先訓，今日雖然訓到接近十二點，不過都好似未夠喉。
琴晚之所以咁夜訓，係因為走左去水滴網頁度做生意，
因為依家個官網冇左商鋪果一ｐａｒｔ，唔可以ｏ係官網度買賣，
轉為揾個跳蚤市場比ｄ水滴爸媽做買賣，但依家好我覺得好難執到分，
若執都係執得一分，若執到ｄ傢俬又唔可以好似以前咁賣左去就算，
若拎去跳蚤市場就賤賣，所以都要諗下方法揾蜜瓜點，
所以我都將一ｄ較為稀有ｏ既種子物品拎去賣，賣之前都仲要留意人地ｏ既出價，
琴日成功賣左一樣野賺左二千分之後，先有本錢去揾ｄ較珍貴的物品出售，
所以八到好夜先訓，今朝都未賣出物品，不過食完晏行左陣返黎之後，
一入去見到八千幾點，就知道成功賣左幾樣野，有兩樣野入貨價錢低，
賣出去有錢賺，立即覺得好有成功感，有種投資成功的感覺，
現實中我絕對唔敢咁大膽去投資，不過今次唔係自己錢，而且都要幫我水滴揾食，
依家我可以邊投資，邊有食物餵住隻水滴，只少唔會咁怏餓親，
希望可以揾多ｄ點數比隻水滴啦。

夜晚去左附近剛開鋪頭的朋友度食飯，同埋佢地ｄ朋友傾下偈，
又過左一晚，內地人同我地有一樣野唔同，佢地真係有好多時間傾偈，
我地香港人由朝忙到晚，冇咁多時間慢慢傾呢，仲傾到我有少少想訓添∼∼ :P

今日仲買左個１９吋 LCD 芒，只係七百幾蚊，真係平到唔信，
可惜公司冇地方，若果唔係放個１９吋芒不知幾正。

聽晚約左班舊秘書聚舊，好似好耐冇見，呢排公司咁多變化，
我諗肯定有排傾呢∼∼

＜＜其中一盆新買的『非洲紫羅蘭』＞＞

＜＜兩蚊買返黎的小花盆，都幾可愛丫＞＞

＊　＊　＊　＊　＊

琴日好懶冇打日記，因為放工後去左行街，原來行街都幾攰，
好耐冇乜買過衫，好似餓左好耐咁，所以出左糧無論如何都要去買ｄ野慰勞下自己，
不過都好似唔係好夠時間行，因為琴日晏左走，順道等埋之前坐隔離個新秘書先走，
所以匆匆忙忙都係買左件簿外套同埋條裙褲，仲好好多野想買，不過要等下次先。

琴日本以為ｄ老闆去上堂可以清閒返ｄ，不過都有電話黎要做ｄ dum時間ｏ既野，
後尾仲等我去幫家姐老闆執房搬櫃攤到周圍都係野時，家姐老闆話有個客會上黎，
哎吔，間房立立亂點叫人入黎？諗住借細佬老闆間房頂住檔先，
好彩個客都話唔入黎喇，可能人地都怕醜。

臨放工經過心急老闆間房，佢同幾個夾錢請人打電話ｏ既同事傾間偈，
跟住佢地無啦啦叫住我，我入到去心急老闆話想同我『針針』，
問我做唔做『秘撈』？我咪問佢地點『秘』法？心急老闆話佢地想設計一張A4 size ｏ既野，
入面有介紹文字同埋有ｄ圖等，佢地話若出面揾人設計要成一千蚊，
所以諗若我係做不如比錢我賺。

因為以前幫細佬老闆有時都會做呢類型ｏ既野，加上我都有少少興趣試下，
同埋因為係心急老闆有份，所以我都覺得冇所謂ｏ既，反而都係放假先做，
有錢收當然就更好啦，其實比多比少我都冇乜所謂ｏ既，都係賣人情比心急老闆，
因為佢一向都對我幾好，可以幫下佢手都好，若他日佢做成生意仲好添呀。

＊　＊　＊　＊　＊

今日訓醒去左飲茶，跟住去左花卉世界，今日天氣好好，陽光充沛，
不過埋拎遮都唔知有冇曬到起斑添呀，哈哈！
平日星期六都應該有ｄ人去行下，但今日好靜，原來今日ｄ內地人要返工返學，
因為下星期係『五、一黃金週』，佢地黃金週前後的星期六、日都係要返工，
其實真係幾揾笨，只係將ｄ假期放埋一齊，感覺上好似放成個星期，
實際上都只係三日假期而已，超級揾笨！

今次又有收穫，我買左兩盆新ｏ既『非洲紫籮藺』，一盆另外品種的葡萄，
一大包泥同埋粟米種子，因為拎唔到咁多野，唯有下次先買花盆。
我個露台好快就會由花園變菜園架喇∼∼嘻！！

琴晚十一點左右本來已經好眼訓，不過因為琴日晏晝收到手電公司收費短訊，
比個銀碼成三百幾蚊好驚嚇，所以雖然眼訓都想查埋張帳單先，
點知睇到一條數，立即醒晒，因為成二百幾蚊漫遊費。

事緣有一日我返到香港返工唔記得飛返線，家姐老闆打我電話飛左我大陸個電話，
但果電話咭ｏ係香港都用到，本來諗住傾幾句都ｏｋ，點知咁ｏ岩家姐老闆講個仔ｄ野，
所以越講越耐，其實我都應該同佢講話轉過個電話，不過佢講到咁興起，
諗住算啦，至多用左張電話咭費嗟，雖然都有丁點肉赤，但反正我都到期增值，
呢張咭我都好襯用，之後都忘記左呢件事。直到琴日睇到呢條傾左３１分鐘ｏ既數，
足足二百幾蚊，真係痛到入肉，好後悔當初冇停到個電話，不過，後來諗諗下唔多對路，
冇理由會咁貴，因為我飛左線唔應該計漫遊費，本來今日諗住打去問下，
不過聽日兩個老闆唔ｏ係度，等我聽日坐定定先再打電話去交涉，早幾個月前都曾計錯我數，
好彩發現左上訴返，佢地仲主動每月九折比我，今次希望都可以上訴返，唔係實肉赤死。

今日兩個老闆冇返，心急老闆晏晝先返，所以難得較清閒，
所以有機會scan 下野，有時傾陣偈，久不久有呢ｄ日子比我清下野平和心情就好喇，
聽日淨返心急老闆ｏ係度，其他去上堂上成日，希望都可以好似今日咁，
等我又去file 下野執下野，然後準備心情放週末啦。