因為每朝我都好早返，今朝都有時間去左日本城買左兩個細書架，
仲又買左四個掛鈎可以ｏ係公司張枱度掛住ｄ野，因為咁新都費事整花佢。

今朝先處理琴日收返黎的一大堆文件，都唔知點解家姐老闆次次一放假都好多文件收，
另外今日煩煩老闆冇返，心急老闆晏書又唔返，所以都可以好清靜，
晏晝都可以scan 緊ｄ文件，因為scan 完文件諗住抖下，同女王一邊緊偈，
一邊順便執下自己ｄ野，將好多已經放工好耐又ｏｕｔ　ｄａｔｅ　ｏ既野清理，
點知突然ｄ灯熄晒，初時以為有人唔小心熄左ｄ灯，不過一見ｄ後偏灯著，就知真係停電，
好彩已經scan完野，唔係真係激死，所以話幾時都要養成經常save野的習慣。

好彩今日只係停左接近半個鐘，不過放工後都仲要維修，
今日放工記得要拎走ｄ以前放ｏ係枱ｏ既公仔，因為依家張枱太細喇，都冇位放，
而且又唔知坐得幾耐，費事到時又要執餐飽。

聽日終於星期五喇，今個星期都幾攰，或者放左好多日假加公司ｄ野仲立立亂啦，
好想放假。

＜＜細得可憐的公司新座位＞＞

＊　＊　＊　＊　＊

琴日忙碌左成日，又夜左返屋企，個人真係幾攰，
今日又再繼續如常咁迷茫，始終換左新環境，
個位又細左好多，好多野我都仲未放出黎，但都冇咩位剩，
攪到做野好似頂手頂腳咁，依家用keyboard我都係放o係大脾度打，
因為放上枱都唔多夠位，變左用mouse 時要釣起隻手，長久係咁真係唔掂，
遲下都唔知會唔會真係唔比放私人傢俬ｏ係個位旁邊，
若果真係，呢個咁細ｏ既位仲要放埋個電腦機箱，一個三合一ｏ既printer 連scanner，
到時我真係唔知仲有咩地方用黎做野？

襯住家姐老闆外遊，都要爭取時間清野，若果唔係佢一返工又有排山倒海ｏ既工作，
真係唔敢想像，晏晝開始我先稍為適應返新環境做下野，
不過仲有好多都未清理ｏ既雜物文件等ｏ係家姐老闆房，真係唔係好想去面對。

幾日的開心復活假期過後，今日要返工喇，但最大挑戰係要返去面對裝修後的公司，
因為怕公司大塵同埋唔知變成點，又預左要勞動，所以都食定早餐打底。
上到公司睇到都經已整好晒，不過周圍都係箱，但見到個位真係好細，
唯一好ｏ既係張椅終於可以較高低。

成個朝日都係忙於整位，不過我姿整，想ｓｅｔ好ｄ，所以進度不大，
好多野暫時放ｏ係家姐老闆間房先，煩煩老闆話唔駛我幫佢執，
咁仲好，但唯一攞命係佢話佢有pack 到電話，佢話唔知要pack 媧，
話明會全部野拆晒，又點會留低個電話？真係冇命∼∼不過我都唔理佢咁多住，
繼續執自己ｏ既野同做野，但可能係未適應新位又或者個位太細，
做野時都係唔多習慣，我諗仲要花多少少時間適應。

細佬老闆晏晝返左黎，問佢ｄ皮膚仲有冇事，原來佢發晒ｄ粒粒出黎，
有ｄ似『大蚊爛』咁一撻撻，佢又日又要飛去台灣喇。
臨放工細佬老闆入左房同我同埋女王傾偈，今次佢會講下佢黎緊的工作大計。

佢都好老實咁同我講黎緊唔會再同家姐老闆等一齊請我喇，
其實呢樣我都預左ｏ既，因為依家佢都請左女王，冇理由白比錢請我，
不過佢話黎緊會請多個人幫佢手請agent同埋follow佢某ｄ客，
呢個女仔係家姐老闆ｄ客兼朋友，先前我都同佢有接觸過，
其實老闆行呢個方向都好ｏ既，始終冇咁多時間兼任請人同做生意，
長遠黎講都應該係咁，細佬老闆係大好人一個，亦係一個好老闆，
之前一路同佢合作都開心，就算佢第日唔係我老闆，咁我都想佢將來可以有一番事業ｏ既。

仲有佢都好好咁話諗住同家姐老闆提議，第日佢退出後，
不如唔好揾人取替佢個位，三個人夾好喇，我諗佢可能明白我ｏ既工作量其實唔少，
又可能冇乜合適人選夾份，因為佢都係偏向唔想夾ｄ下下斤斤計較的人，
但若只係三個人請我，咁每個人付出ｏ既錢會多左，
佢預計家姐老闆同心急老闆應該都冇乜所謂，唯一係煩煩老闆未必肯，
因為佢一向對錢都睇得好緊，一向我每年調整人工都係佢有意見，
所以佢應該會想揾人取替細佬老闆個位，因為唔駛比咁多錢，
呢樣野我完全可以理解，若果比我可以選擇我想ｏｕｔ埋煩煩老闆添，
不過都係我諗嗟。今次我諗老闆同我傾都係想比定心理準備我，
或順便睇下我反應啦，最終結果點我諗要遲下等佢地傾完先啦。

我地三個一路傾都傾左成個幾鐘，成七點半我地先走，
因為我地企ｏ係度傾，企到好攰添，今晚晏左返屋企，又比較攰，
打完日記都係早ｄ做豬，聽日繼續努力喇。