＜＜早兩日買返黎的小葡萄樹＞＞

＜＜呢ｄ唔知係咪將來ｏ既葡萄呢？＞＞

＜＜之前煮餸後留低的南瓜核，依家變成小苗可以落土種喇∼∼＞＞

＊　＊　＊　＊　＊

黎到復活節假期的最後一日，亦係呢個假期天氣最好的一日，
算得上係陽光普照，風和日麗，氣温亦好舒適，
為免今晚太過訓唔著，所以都早左少少起身，不過，所謂早少少，
都已經十一點左右。起身後去露台淋左陣花，跟住都出去食飯。

今日都終於叫見識過呢度ｏ既上班族食飯時段，因為平日晏起身，
所以去到附近港式快餐店都係食下午茶，人亦唔多，但今日撞正lunch hour，
都叫做滿座，而且平日買完”飛”揾位坐就得喇，因為有店員幫你拎埋野食，
但今日人多，要同香港去快餐店一樣自己拎野食，不過佢地ｏ既lunch hour人雖然多，
但同我地平時返工食晏時ｏ既人流仲係相差好遠，至少佢地有我地等咁耐位。

食完野睇完報紙準備返屋企，經過一處琴日先發現開左ｏ既『體育用品公司』，
呢類鋪頭ｏ係深圳都較為少見，所以今日去睇一睇。
或者係新開ｏ既緣故，又或者係呢類鋪頭唔太流行，入面賣ｏ既野唔多，
有運動鞋、爬山鞋等，仲有睡袋背囊等，而且都唔係內地牌子，
本來諗住望一望就走，不過有個職員／老闆娘好好招呼，又倒左兩杯水比我地，
好似立即走又唔係幾好，於是咪傾幾句囉，呢個老闆娘原來係教師，
咁ｏ岩見佢有張海報有班人ｏ係『布達拉宫』前影相，於是問佢地有冇攪團旅行，
個老闆娘話有呀，其實佢地打算得七月攪團去『絲綢之路』，
而佢地都係班”咩”背囊去自助遊的人，通常會夾埋幫自助遊發燒友一齊去，
（終於知道呢度經常提起係『騾友』點解，問左老闆娘，即係我地講ｏ既咩背囊自遊行ｏ既人），
其實佢地呢種旅遊方式都幾ｏ岩我地，想當年牛我地都係咁樣走上大陸玩，
同埋我地鍾意去一ｄ冇咩旅行團到的地方，咁先可以享受旅行樂趣，
若第日佢地有ｄｏ岩ｏ既地方，話唔定跟埋去都未定∼

之後我地都提議佢快ｄ整好個網站，考慮下招收會員，
仲有可以利用佢鋪頭出面空地整ｄ小茶座比ｄ會員或同道中人坐低飲杯茶閒聊下，
又或者掛ｄ旅行相／風景相出黎吸引下人添，
另外，我地仲話下次行過可以拎ｄ仲有好多ｏ既南瓜苗比佢地種，
可以有多ｄ自然田園氣息添。（講講下好似就晒我自己鍾意ｏ既野咁？？）
點都好啦，第日行過得閒都可以去吹下水ｏ既∼∼ ^^|||

返到屋企打開email，收到家姐老闆o既email，
因為佢聽朝太清早已經出發去機場，所以早前都話左出發前會email 比我講低ｄ工作，
不過一睇都有好幾樣野，至於文件就例交比細佬老闆帶返黎比我，
但係佢話原來細佬老闆聽日要去睇左醫生先再返公司，又係因為佢ｏ既皮膚問題，
呢樣野都一路困擾左細佬老闆好耐，一直都好似冇太大好轉，仲原來早兩日半夜要去睇門診添，
好似都有ｄ麻煩咁，聽日再睇下佢點啦。

唔知公司裝修好晒未呢？即使裝修好都應該會立立亂架喇，一返工實有排忙 lu ~~

＜＜琴日新買返黎的『非洲紫羅蘭』＞＞

＜＜三盆『寶貝』黎張大合照＞＞

＊　＊　＊　＊　＊

琴日懶懶冇打日記，而琴日最主要記係去左花卉世界，
今次又冇收穫喇，我又買左一盆『非洲紫羅蘭』，
我以往ｏ係香港都好似曾經種過，但奈何好似種乜都唔種得長，
但早前買的兩盆好難得開得好靚又出好多花，所以攪到我好有興趣種唔同ｏ既品種，
而且ｏ係呢邊買都只係十蚊一盆，唯一係呢排冇乜特別品種，但都唔緊要啦。

另外用２０蚊買左一盆『葡萄』，真係超值，平平地又買黎試種下，
希望遲下又有收成。仲有因為呢排屋企露台開始慢慢變成蔬果園，
因為可以食到自己種出黎ｏ既野會開心ｄ，所以琴日見到有ｄ菜種諗住買黎試下，
剛剛見到有『芫茜』種子，本來好大包，但間鋪將佢分成細包咁賣，
我見三蚊雞諗住買包返黎玩下，點知果度個職員不但冇收我錢，
仲另外送多包『芹菜』種子比我，今次又做左『無賴』添，哈哈∼
不過最主要係我地基本上次次去親呢度都有幫襯，幫襯到ｄ職員都認得我地，
有時仲會識做計平少少比我地添，所以今次一行洗左少少錢但有收穫，真係開心。

＊　＊　＊　＊　＊

放假前細佬比過電話我，話今個假期會上黎行下，
所以今日中午左右佢過左黎，於是一齊去飲茶，
跟住上黎我屋企坐左陣後同佢一齊去購書中心睇書，
始終訓夠左都係好好多，今次冇睇書睇到眼訓，唯一係企得耐有ｄ攰，
我地睇到六點幾，於是直接去食飯，食完飯仲帶佢去食甜品，
有好地方當然要介紹下佢啦，等第日若同ｄ朋友仔過黎玩都『知訂』丫嘛。

話咁快呢個假期又到尾聲，做埋聽日懶豬又要收拾心情返公司做苦力喇∼

今日繼續過大懶豬的生活，因為都訓到成十二點幾先起身，
中午出去食完飯，順道去埋超市買定今晚晚餐材料，
返到屋企諗住整理下個露台，準備將我以前買返黎做餸的南瓜，
將佢ｏ既種子留起，依家已經出晒芽，所以都要落大盆咯，
不過有人食完飯返到屋企飯氣攻心爬左上床做豬，而我則上左陣網，
但到隻懶豬叉完電起身，又輪到我上網上到眼攰爬左上床，
一訓又訓到六點幾先起身煮飯，結果今日又冇整到，
呢幾日放假好似就只有食同埋訓教，
不過耐唔中放假過下呢種豬生活其實都幾好，唔抖夠遲下又點再戰江湖呢？