今朝返工打開左老闆的電郵，
發現有個電郵決定左公司ｏ係復活節假期開工裝修，
仲要所有人ｏ係四月三日六點前將所有野pack 好晒箱，
等裝修工人第二日開工。

其實公司ｏ係復活節黎裝修對同事ｏ既影響的確係最細，
不過我原先打算四月拎三日假接住復活節可能有變，
因為要pack 箱，真係拎起都激死，不過女王提起同細佬老闆講晒放假問題，
佢話老闆提議佢可以星期六返黎執，執完咪可以放假囉，
諗落呢個方法都可行，反正四月二、三號我有三個老闆都去左旅行，
今次我最主要係幫自己同埋煩煩老闆執野，照計我在限期前pack 好野咪得囉，
不過呢個暫時係我構思，都要ｄ老闆應承先得，
但我估照理都應該係怕一個老闆唔肯，自從上次過年撐得咁行，
今次佢可以大氣道理要我留低，不過，我唔理喇，我諗住照同家姐老闆講左先，
睇下佢意見點先再作決定，總之依家煩煩老闆ｏ既野我都唔會咁上心喇，
因為你同佢上心人地都未必欣賞，都係慳返啖氣好過。

琴晚又訓得唔太好，好在返工時唔太眼訓，但依家極眼訓，
所以今日都唔太多野打，其實今日最主要係想話朝早隔離八卦大嬸，
話我知琴晚放工後我個煩煩老闆經過，見到佢比一本簿打開左，
ｏ係度鬼殺咁嘈，又話有冇攪錯，話我咁都得，ｄ野比晒人睇到，
其實果本簿冇咩私人野寫，只係佢寫低比我ｏ既工作，
根木佢自己成日八卦睇人地ｏ既野，所以先咁怕自己ｏ既野比人睇到。

雖然我都知佢好煩，不過我又冇好激氣，因為對左佢幾年，
我都好清楚佢係呢ｄ小事但攪到好大件事ｏ既人，我都習憤，
而且呢期佢太多野令我閔憎，家陣我都開始唔再為佢閔憎，
抱住ｄ放棄態度，反正我覺得同佢根本都係兩類人，無論性格、
處事感態、價值觀都可以話完全相反，我只可以話同佢真係唔夾，
我亦盡可能唔再為佢而閔憎，總之除左工作上都冇乜交流，
再者處理佢ｏ既野要格外留神小心就係，就係咁多，
即使今日八卦大嬸將我對煩煩老闆不滿話佢知我都冇所謂，
我講得出都唔怕佢講，或者呢個就係任性自我ｏ既我喇∼∼哈哈∼∼

是非加不滿講完，真係好眼訓，要去訓喇∼∼∼　

星期日晚本來都易返得著，因為先前訓得多，
但琴晚又因冇開冷氣而訓得唔好，好彩今日都冇乜恰眼訓。

今早家姐老闆同煩煩老闆都好乖冇入單，另外仲有ｄ立立雜雜的工作做，
仲有幫家姐老闆準備埋聽日去做義工ｏ既powerpoint。

中午食lunch 又叫外賣返黎食，因為貪平又貪懶，
幾個人費事出去等位，呢個星期都有同其中一個鍾意史諾比的秘書一齊食飯，
佢係超級電視迷，一向都幾鍾意追劇集，今日大家主要話題都係講劇集，
仲返炒好多陳年舊片同埋ｄ明星ｎ年前做過的劇集，
雖然好多都有印象，但就未必記得劇集或戲名，
至攪笑我隔離新同事仔，人都係得果廿一歲，
但居然成日講得出廿年前的劇集同明星等，
所以我成日都話佢唔知係咪學我報細左廿年，
但佢就成日話會睇重播，但我覺得唔係果個年代ｏ既人即使睇重播，
都未必知邊個打邊個，佢隻野真係超級老人精∼∼∼　^++++^

晏晝聽細佬老闆話揀左房，諗住叫我同女王幫佢度下位做櫃，
立即令我諗返四年前佢第一次入房時果個姿整樣，
又想整”lee ”又想整”路”，果真係一個麻煩仔，
不過後來聽女王話佢又再改左揀準女經理依家坐緊的房，
我地都覺得準女經理房比較好ｄ，一來大ｄ，光猛ｄ又有大窗，
可以睇到維港全海景，真係ｏ岩晒我地隻姿整老闆仔，
我都希望最終佢真係揀到呢間啦，因為今次揀左可能有排坐，
當然要間好ｄ啦，至少人坐入去都覺得舒服ｄ嘛∼∼