每日返工到夜晚都會好眼睏，通常一訓落床都變死豬，
不過呢兩晚都要翻來覆去但都未睏得著，唔知係因為天氣熱左，
還是呢兩日比人激親，攪到有ｄ閔憎，好彩返工都冇覺得眼睏咋，
我諗今晚要開抽濕或冷氣訓先得喇。

今日細佬老闆返左大陸上堂，其他三個老闆又去左九龍灣上堂，
所以今日應該會係happy day，好彩的係老闆都冇乜太多煩野打比我，
係朝早要我幫手訂坐去食lunch，不過佢地又比唔知個餐聽名比我，
好彩依家公司上到網咋，唔係我都唔知點揾。

襯今日公司唔太多人，中午又叫外賣返黎慢慢嘆，
繼早幾日大談靚仔名星之後，今日又笑一個同事仔個老闆，
至攪笑佢仲學佢老闆ｄ騎喱動作，真係成班都笑死。

呢兩日難得較清靜，主要都scan 返手上成堆ｏ既文件，
另外又幫家姐老闆整下個powerpoint，其餘時間又去同女王傾下偈，
美好ｏ既一日就咁過去，好彩聽日又到星期五，
好快又放假喇，yeah yeah~~ (^^)v

今日朝早雖然d老闆有返黎，但又冇乜特別野揾我，
於是我就拎ｄ文件出黎scan，一直到十二點左右拎文件比家姐老闆，
入去佢間房又同佢傾下偈，佢又話為個仔好心煩，
今次係個仔同老師間可能有ｄ誤會，老師可能又handle 得唔太好，
聽日佢上完堂要去見老師，但佢話覺得好心煩，近呢個月覺得好多野都唔順境，
先前撞左兩次車，個仔又成日好多問題，講講下佢又眼濕濕，
我都明佢有丈夫一齊分擔家庭問題，自己又要返工揾錢支撐頭家又真係幾心身疲累，
佢話可惜以前大老闆走左，若果唔係又可以揾佢傾下，但依家又怕阻左佢，
不過我都係鼓勵佢揾舊大老闆傾下，大家若係朋友，佢一定會抽到時間傾偈，
即使係一個email、一個問侯都係好ｏ既，希望佢快低ｄ唔開心野啦。

晏晝食完LUNCH 依然清靜，今日真係好難得可以靜靜地Scan咁多野，
其間接近四點去同女王傾左陣，仲話難得今日咁正，點都都係自己衰多口，
都話呢ｄ野唔亂講得，冇耐接到煩煩老闆電話，佢同我話有個好消息話我知，
等我仲滿心歡喜，以為佢會話我知我張Access 咭上訴得值，
點知係話我知早幾日揾唔到個客的身份証依家記得ｏ係邊，
係幾個月前本來個客申請轉agent，但到最後冷靜間限日可以留得個客，
當日成五點幾先黎話我知，份form 一定要果日比到公司，
佢話個身証副本ｏ係我度。

煩煩老闆ｄ野例到最後一分鐘十萬火急先做，呢件事我係好有印象，
但個客ｏ既身份証副本我全冇印象，我都唔記得當日係因為太急冇影印，
還是比返老闆定係點，但我手頭上應該係冇。但最弊個客依家要取消張單，
一定要提供身份証副本先可以拎錢，我同老闆講，當時佢冇話我聽個客將會斷單，
所以我冇刻意影低身份証，雖然佢冇怪責我，話下次咁ｏ既情況要留返record，
但佢覺得公司應該有個客ｏ既身份副紀錄，但我覺得就唔係咁簡單，
或者佢覺得個責任已經落返我度，所以冇乜太大反應卦？

不過今次我又煩點樣補鑤，至怕係補唔到，雖然我唔可以推晒我冇責任，
但老闆一早又唔同我講，而且下下都攪到咁遲先處理，真係比佢玩死，
我呢個老闆最大的武器就係佢ｏ既冇記性，呢樣野真係殺我於無形，
久不久就比佢激到吐血同玩死，好似琴朝先親手比左一堆宣傳單張佢，
晏書佢可以話我冇比過佢都得，雖然處理佢ｏ既野我都盡量小心，
但有時真係防不勝防，冇計啦，聽日唯有試下去補鑤啦，攪唔掂我都冇計，
至多比老闆話囉∼∼唉！！！嘔血！！

今朝返到公司繼續完成琴日未做完的Quotation，
好在係家姐老闆通常都會好識做一早比定ｄ野我做，
唔駛我要急急趕趕，雖然佢性格好急，但呢方面就同佢夾到。

接近中午收到公司一份訂裝得好靚的基金投資報告，
咁樣ｏ既報告agent 們都一早好想有，
因為咁樣出去比客睇真係會專業ｄ，唔駛下下我地去逐份執＜
攪到成日唔齊，我見有咁正ｏ既野，老闆一定鍾意同埋想要多ｄ，
於是就問隔離八卦大嬏係咪要經佢先可以申請，
點知八卦大嬸話比我聽佢做埋今個月就唔做，唔知下一手會點，
其實我都冇問佢點解唔做，又冇問佢之後點，但佢自己無啦啦話比我聽，
我估佢份人咁八都忍左好耐喇，佢話自己做唔切ｄ野媧，
其實我都冇咩回應佢，只係繼續叫佢幫我問下係咪佢申請，
我咁冷漠佢一定好失望，但我覺得，佢做呢個位能力真係有問題，
下下要靠關係，要靠其他人幫佢先完成到好多野，但至弊佢自己又得罪ｄ秘書，
咁都冇計啦，其實佢存在都要幫佢手做野，所以對我地黎講都好似冇乜太大分別。

食lunch 時成班秘書又傾ｄ靚仔明星，你一言我一語有時都好攪笑。
晏書唔太忙碌，後尾同女王傾左好多想當年，有時諗返細個ｄ野都覺得攪笑。
放工出左去旺角行街，雖然都出左好多春裝，但天氣都仲未穩定，
暫時都係睇住先啦，一於等出糧先出手∼∼嘻！