放假呢幾晚，晚晚都追男親女愛（一次播６集），所以晚晚都好夜訓，
一訓就訓到成點鐘先起身，今日本來都想去飲茶，
不過都係因為晏起身冇去，所以最終又係去左附近間港式快餐店。
今日唔知係咪假期尾聲，ｄ人開始返晒黎，所以人多左ｄ，
本來諗住佢地揾位，我去買完野食拎埋報紙過去一齊邊食邊嘆報紙，
行埋去個位前見佢同個人傾偈，淨係睇背面又認唔出邊個，
而個款又唔似係內地ｄ朋友，行到過去一望先知係以前讀攝影時的同學，
原來佢同老婆去完按摩過黎呢邊食野，ｏ係香港都唔會撞到，
反而咁遠ｏ係呢邊撞到，於是大家一齊坐低邊食野邊傾偈。
原來呢個朋水都經常會過黎深圳，話唔定第日會多ｄ機會見，
之後帶佢地上左屋企坐下，佢老婆又係好鍾意ｄ花花草草，
所以見到我個露台好鍾意，冇法啦，香港真係吋金呎土，
大家住ｏ既地方都好迫，真係只有ｏ係呢邊先有機會揾到少少自己夢想ｏ既生活，
難得今日有客人，仲比朋友個老婆親手去剪我地棵楊桃樹上的楊桃一齊食，
可能真係樹上熟ｏ既特別好味，呢兩個楊桃都好甜。
大家傾左陣佢地就走喇，因為佢地今晚約左人。
可能呢排夜訓太熱氣，ｄ牙肉腫完呢邊腫果邊，攪到都冇乜心機食野，
係就係自己攞黎衰，不過難得放咁耐假嘛。
做多一日懶豬就要開工大吉喇，聽日都唔可以咁晏起身，
唔係夜晚訓唔著就大件事，後日開工先眼訓就弊喇。
丫~~差d唔記得今日係初七『人日』，即係人人都生日，
咁祝大家『生日快樂』哪！嘻嘻！
| 
