今日係初四喇，好多人都要返工喇，好彩我暫時仲可以享受多幾日假，
而且初四好多鋪頭都陸續開會，雖然仲未全部開晒，但都多左好多。

中午去飲茶，雖然酒樓呢段時間收加一，不過若ｏ係香港有ｄ都唔止，
而且過年ｄ職員都仲要返工，我覺得比多少少都合埋ｏ既，
飲完茶去左買ｄｖｄ，其實佢地今日都未正式開工，所以好快只買左三盒就走。

之後仲有時間，所以打算去街市行下，因為今日係初四，
我估都會多返ｄ檔口開檔，果然比早兩日多左，本來買開ｏ既魚檔未開，
試下幫襯第二檔，呢檔有ｄ新鮮鱸魚，一ｄ都唔貴，大約都係十蚊條，szie 又唔細，
諗住過年第一次煮飯，想年年有『魚』，所以一次買左兩條，
本來諗住買ｄ豬”月展”煲下湯，買開果檔肉檔未開，試下第二檔，
點知個老闆想當我水魚，鬼咁細塊同我開價十二蚊，
我先前去吉豬島見到靚ｄ咁上下大細都只係七蚊左右，
雖然我個樣蠢嗟，都唔好咁過份丫，若果以前我會怕唔好意思唔買或講價，
依家明知要比人當懵丙就啋佢都傻，所以唔鬼幫買佢，至多食第二ｄ囉。

返到屋企仲早，走去著機唱下ｋ，真係好耐冇唱喇，家陣把聲都唔多得喇，
食完飯又上陣網，夜ｄ又去睇『男親女愛』嘻！！

＜＜只係１０蚊的『皮蛋牛肉粥』＞＞

＜＜好滑滑的『薑汁撞奶』＞＞

＜＜合桃露豆沙湯圓＞＞

＊　＊　＊　＊　＊

因為放假又做夜訓鬼，琴晚又一口氣睇幾集『男親女愛』，
依家睇返依然覺得好笑，訓到十二點幾起身，又上左陣網先出去揾食，
今日我提議去琴日揾到的甜品店食野，反正都有其他野食，
去到都兩點幾人唔多，我地首先叫左個『凍雙皮奶』比佢試下，
因為我琴日試左，佢話幾正，然後有『椰汁西米露』，我覺得好夠椰汁味好正，
跟住佢先叫左個『皮蛋牛肉粥』，拎到黎發現係一個小砂鍋，１０蚊咁又幾抵呀，
我拎埋張菜牌睇到好耐，呢樣又想食，果樣又想食，其實我好想試下炒飯或炒烏冬，
不過ｄ熱氣未清，所以叫左個『上海雲吞』，不過佢ｏ既雲吞size 唔大，
雖然有１２粒都覺未夠喉，而且１２蚊相比下好似冇咁抵。

我都未食到一半佢又叫左個『薑汁撞奶』，味道真係唔錯，好滑滑，
等食完後再黎一個『綠豆沙』，味道唔錯，不過內地人整綠豆沙整到太沙（爛到溶晒），
變得口感差左少少。最後隻甜品怪仲要叫多個『合桃醣豆沙湯圓』，
今次佢話湯圓ｏｋ，但合桃露唔夠香。食到呢度都要賣單，
幾樣野加埋６０蚊５毫，整體黎講我覺得相當唔錯，雖然甜品份量唔叫大，
價錢在內地黎講唔叫平，但對我地黎講都覺得幾平喇，
而且內地好難揾到或食到咁近似我地香港口味的糖水／甜品（我估係香港人有份投資開）
而且種類又多又特別，營業時間又長（早上9:00 - 凌晨3:00)，
第日識揾地方食宵夜喇，至少好過香港好出名ｏ既『滿ｘ甜品』，呢邊都有間，
不過價錢同香港差唔多，基本都成廿幾蚊，其實我一直唔覺得呢間ｏ既甜品特別好味，
覺得都係名過於實，依家有新地方可以食飯連埋甜品糖水一齊食，
行得遠少少，第日仲可以考慮去街市買餸時買埋甜品返屋企食添，
諗起都開心，嘻嘻（好為食！）

食完糖水我又扮嚮導帶佢坐車去吉豬島，呢排街市仲未開齊檔，
又見ｄ壽司好多都賣２蚊一件，好似我鍾意ｏ既三文魚、鰻魚、八爪魚等壽司都係２蚊，
於是今晚又打算食壽司做買餐，又有個人咩都要買得多，總共買左２７件壽司，
好彩我都咁拆得嗟，但我覺得抵過出去食任何果ｄ，
買完之後飯飽食醉，拎住ｄ收穫返屋企喇。

＊　＊　＊　＊　＊

呢個悠長o既假期又過左一半喇，好多人聽日已經要返工喇，
放假ｏ既感覺真係好，所以我都要好好咁享受埋呢幾日假。

<<吉豬島買返黎的大大盤壽司>>

＊　＊　＊　＊　＊

今日又係訓到日上三竿先捨得起身，
本來諗住去附近間港式快餐店食野兼睇報紕，
點知要初四先開媧，乜ｄ人咁懶架？？^+++^
後尾唯有走去酒店間西餐廳食下午茶啦，
唔知係咪呢度ｄ職員換左人（經理），家陣呢ｄ真係好唔掂，
好懶散，邊有人客仲ｏ係度食野，ｄ職員自己坐晒ｏ係度傾偈架，
普通食市都仲話丫，呢度話晒都叫酒店，
後尾有排女職員自己又卦住玩，笑到鬼咁大聲，
雖然有唔只一個經理物體叫過佢地唔好咁大聲，但好明顯係冇用，
幾個女仔依然玩到好忘我，直至ｄ女仔比我凌厲ｏ既眼光射左一下，
反而佢地先收歛左，果ｄ經理完全管理唔拈，你話死唔死丫？
最攞命係我地叫個經理賣單時，個經理咋睇唔到我地，
跟住我地大聲叫『唔該』，佢仲問我地做乜，佢真係想開年定喇，
雖然我地都有一排冇去幫襯，但若果繼續係呢排經理同職員ｏ係度，
真係又唔駛去喇。

食完野我諗住想去街市睇下有冇野賣，但又想去吉豬島行下，
但又唔知有冇開，費事兩個一齊白行一趟，於是我自己去，
但我又懶行，於是試下坐巴士，因為我鍾意坐巴士平得黎可以認下路，
結果坐左三個站就到吉之島，好彩有開，於是我入去逛左成粒鐘，
但諗住再去街市都冇咩買野，跟住再坐返巴士去行市，
雖然落遲左一個站，不過就比我揾到一直想去試下的甜品店，
因為睇書同上網都有提呢間甜品店唔錯，雖然只係得我一個人，
但都去做下試食兵團，睇下ｄ野食得唔得，我叫左聽聞唔錯的『順德雙皮奶』，
雖然感覺冇好正ｏ既感覺，但都ｏｋ，而且睇菜單仲有好多其他甜品，
仲有弼、粉、麵、飯，種類都唔少，揾日又過黎試埋其他野都好。

食完甜品去左行市，不過有一半鋪冇開，攪到都冇乜心機買野，
因為怕ｄ野唔夠新鮮，至多夜晚出去食野，若早知呢度冇咩買，
就係吉豬島買壽司，因為早兩日都買過黎食，都ｏｋ，尤其等到佢特價時段，
上次買左一大盤原價８８，特價都係６２，買黎食下過下隱都唔錯，因為好耐冇食喇。

呢幾日放假可以周圍娟下周圍八下都覺得好好，
可以認多ｄ路同埋做下ｄ平時冇乜時間做ｏ既野，放假真可愛∼