足足成個星期唔夠訓，又足足成個星期好多野做，
終於都捱到星期五。

朝早襯全人類去開會靜靜地，叫做同女王傾陣偈，
之後又繼續密密手做野ｏ既生涯，
可能家陣吽緊病，琴晚又攰到死咁濟，
今朝都唔太清醒，遇著聽家姐老闆電話，
真係要合上眼關閉所有function，將全副精神聽佢講野，
因為家姐老闆份人又係心急，講野速度好快，
精神好ｏ既時間都冇問題，但遇著今日咁ｏ既狀態，
真係聽左等於冇聽過，好多野都唔記得，
加上頻密的電話同埋做唔停ｏ既工作，
今日心情都有ｄ閔。

好不容易先捱到放工，今晚約左ｄ靚女秘書同事聚舊，
今日總共六個人，其中三個已經離開左呢度，
本來話ｏ係尖沙咀食，最終又係去左旺角打邊爐，
好多時吽感冒時又遇著飯聚，但又忍唔住講野，
結果又開始聲沙喇∼

又變老牛喇∼∼∼

真係唔知攪乜鬼，呢排都真係好忙，
尤其家姐老闆返工做野，就一定唔駛驚冇野做。

其實琴日已經好多野做，所以都未清晒野，
今日都係密密手清野，隔離新秘書又係好忙，
有時兩個傻佬都自言自語，又或者互相講下笑，
叫做調劑下心情。

聽晚約左ｄ走左ｏ既秘書聚舊，
大家又可以有機會傾下偈喇。

呢幾日都上網都花時間ｏ係個新Blog 度，
又申請左隻狗仔『旺旺』黎養，晚晚都好夜訓添，
或者ｏ係唔多夠訓，家陣吽緊傷風，都係自己攞黎衰咯，
今晚一定要早返ｄ訓喇∼∼∼　

今日成日都唔少野做，尤其老闆ｄ”奪命追魂call”，
真係人都癩癩地。

因為要去銀行入branch fund，怕月尾銀行人多，
原先係諗住自己去完銀行先食飯，
唔想咁趕頭趕命，點知阿囡走黎話同我食飯，
本來都已經拒絕佢喇，點知聽佢講左一句：
『我聽日唔駛返黎喇！』
『吓？！』我覺得有ｄ突然，
但唔怪得佢老闆淨話好似叫阿囡比返ｄ野佢，
不過因為忙所以冇乜留意。
雖然上星期佢老闆都捉住我傾過下，
話阿囡做野唔係好得，不過真係冇諗過佢真係咁快行動，
仲要係今日通知，聽日就唔駛返。

今次阿囡當然唔係好順氣，而且一直話佢老闆好麻煩，
咁呢樣野我都知，因為過往佢老闆ｄ秘書都係成日訴苦，
阿囡做得唔好都係事實，但係佢老闆我亦都唔欣賞，
舊年隔離豹紋同事又係比佢無情的請走，
再加上舊年大老闆離職佢密謀準備上位，
又成日以熟叫細佬老闆幫佢手，
工作上又成日打女王主意，
份人又心急仲有ｄ無理，其實幫佢打工真係比佢用到凸，
所以我對阿囡老闆印象真係越來越差，
唯一係兩姊弟老闆同佢又鬼咁熟，
有時間都要小心說話。

今次阿囡本身都有唔ｏ岩，
不過真係冇諗過只係一個月就過唔到喇，
希望佢今次受過教訓，第日做野都係要小心盡職ｄ啦。