終於到左大年初一，今日係我ｏ既拜年日，依家我通常一日走晒兩場，
咁之後就可以真係抖下。
訓到十一點先起身，食左少少野就出發，過關真係少人到唔信，
第一站係元朗，同佢屋企人飲茶，雖然我地係飲下午茶時段，但果間酒樓又係少人到庳，
唔通ｄ人真係出晒去玩，去晒拜年又或者琴晚玩得太夜訓未醒？
飲完茶去佢家姐屋企坐，之後六點左右出發去我屋企，
不過去得元朗當然要買返ｄ老婆餅做手信，我覺得好過買糖果。
今晚食完飯同爸媽傾開偈，講返以前佢地年青時ｏ既事，
又去揾返ｄ佢地後生時的陳年舊相出黎睇，仲記得我以前細個好鍾意拎出黎睇。
老豆自從身體差左之後，行動大不如前，所以少左出街，可能坐得ｏ係屋企多，
淨係睇電視會悶悶地又吽吽地，不過一同佢傾返『想當年』，佢當堂成個生猛晒，
滔滔不絕咁講返好多以前ｏ既野，其實呢ｄ野真係自細都聽唔少，
不過細個時聽會覺得悶，因為好多地方、人物、甚至歷時背景都唔熟，
聽時真係只有用自己的想像力，不過當自己年紀漸長，以前又陪佢地返過鄉下，
見過以前只係從相片或者佢地形容的親戚，所以好多野都明白好多喇。
原來聽佢地想當年，同埋想像佢地後生時ｏ既野都幾有趣味，
或者我自己都年紀大喇，我自已都鍾意想當年一樣，時間真係過得好快，
回頭一望已經匆匆幾十年，真係好似過左冇耐咁呢∼∼
老豆可能傾得太興奮，平時佢唔會好夜訓，今晚佢同我地傾到接近十二點添，利害！
唔知係咪真係氣候改變，今年過左一個超熱的年初一，真係熱到出汗，
今日竟然要著短袖衫，開風扇開冷氣添，唔通第日香港真係變成冇冬天？
| 
