今日係過年前最後一日返工，上晝冇乜人返工，做野非常寧靜加順利，
乘機執返同scan 返唔少文件，本來諗住難得今日心急老闆唔返工，
可以入佢房好好咁file 野，不過十一點先細佬老闆同家姐老闆先後返左黎，
老闆返親黎就有野做，攪到我又攤開晒ｄ文件又要做其他野。
今日因為天陰陰有毛毛雨，所以諗住ｏ係公司叫外賣，不過呢排叫開間外賣又令人激氣，
早兩日送外賣哥哥唔識打女王手提電話但怪責女王冇留內線，仲態度差，
已經令女王好激氣，本來諗住試第二間，不過又諗住又比下機會佢地，
點知今日遲落Order o既同事份餐送到，反而我地早叫果ｄ不翼而飛，
於是今日打算打電話去催佢之餘又鬧下佢，最初果阿姐又係話我地冇留內線電話，
於是我要話返佢我地以前不嬲都係留手提電話，本來阿姐都仲係想解釋，
不過我唔理咁多同佢鬧講，仲要反映埋佢地最近成日漏比食具我地，
最後阿姐都認佢地做得唔好，又話多謝我地比意見，後尾再打比女王跟進返ｄ order到左未時，
女王話佢ｄ語氣好好。有時都唔係想鬧人，不過我至唔鍾意人死撐，
唔通我比錢仲要受氣？sorry 依家我唔會忍囉。不過第日考慮下仲會唔會幫襯，
話唔定比佢地black list 左我地係麻煩友，將我地ｄ野加左料先送黎就死火喇。
食完lunch 後諗住快手做左家姐老闆ｄ野再去執野，點知煩煩老闆返左黎，
仲簽左三張單，結果預算襯今日靜ｄ清下野ｏ既美夢又粉碎左，
最終都冇乜清理過野，過完年返工後睇怕都冇乜時間清理，真係無奈。
夜晚返媽咪到食飯做節，一連個多個星期假期終於開始喇，
唔理咁多喇，一於要好好咁享受呢個難得ｏ既假期先得。
| 
