唔願起身的星期一又到喇，但今日都比星期五好一ｄ，
至少都冇咁唔舒服。朝早快快手將上星期未做好ｏ既工作做好，
以免再積壓工作。好彩都算順利清得七七八八。

晏晝清左ｄ野，於是快快裝返個新program，
因為家姐老闆買左部三合一的新printer，其實佢都應該唔多識scan野，
睇怕多數都係我scan 野多，當然要裝返ｄ方便我自己ｏ野啦。

不過至怕冇時間去裝program，通常都唔多順利，
但都總算攪掂，襯仲有半個幾鐘先放工，
立即快快手去家姐老闆房幫佢裝好部printe，因為佢都好心急，
免得好快時比佢催促，今次好彩好順利攪掂左，聽日先再幫佢試機。

自從搬左個新日誌，見佢可以自己設計版面，
成日都好想整靚個日誌，於是上星期晚晚都好夜訓，
最終感冒收場，本來諗住今日都要早ｄ訓，但又係忍唔住想整，
家陣叫做揾左個覺得幾靚ｏ既skin，大概整好左，雖然未盡完美同滿意，
暫時叫做心息左，沉迷電腦真係自己攞黎衰，
聽日一定要早返ｄ訓（希望忍得住啦）

依家放假一日真係未夠喉，點都要訓多日先得。
中午去完飲茶之後去左睇DVD，因為仲有兩星期就過年，
今年都打算拎埋大假，放假ｏ係屋企最好係煲下牒，
難得都有唔少收穫，買左幾隻卡啦OＫ ＭＴＶ，
仲有幾隻星爺舊作，放假若冇咩節目可以慢慢睇牒。

行完後去左超市買左ｄ野準備今晚煮下飯仔，
今日都係好平凡咁過左，又要準備聽日要努力工作喇。

＜＜兩盆非洲紫羅蘭＞＞

＊　＊  ＊　＊　＊

呢幾日唔太舒服，所以好攰一訓落床就訓著，
雖然今日訓到十一點幾先起身，不過依然都幾攰。

中午去飲茶，跟住去花卉世界，
仲有兩個星期，所以ｄ鋪頭都準備好多年花，
去開幫襯的鋪頭，見到好多水仙頭，
雖然有我先前ｏ係香港買的咁靚，
但勝在夠平，個老闆娘賣六蚊一個比我地，
所以我地揀左十個，仲買多一個大盆黎裝，
之後我見另一間買開的鋪頭有另一款『非洲紫羅蘭』，
上次ｏ係度買左盆開得幾好，所以我買多一盆另一隻款的。

後尾行行下本來見有間有一盆盆的鬱金香，我估都唔會好平，
於是問下幾錢，個職員望一望我，答我三十五蚊一盆，
我當然冇買，閒人話我人地見我個樣就實開得高價，
後尾再經過時，我叫佢試下去問幾錢，
個職員見到佢就答３０蚊一盆，又比人笑喇，
哎吔∼！！唔通我個樣真係蠢ｄ？？

先前見個花場好多一盆盆又一支支ｏ既植物，
不過唔知係乜，依家就知原來係『牡丹花』，
牡丹有『花中之王』的稱號，但一直覺得佢好似好老土咁，
不過聽聞都幾貴，我地問過原來係逐個花心黎計錢，
本來我地都係問下嗟，
不過幫襯開個老闆娘鬼咁好幫我地去問個朋友度問價，
佢朋友又係好熱誠咁帶我地去花場度睇，
我地諗住過年買ｄ花黎應節都好，但又怕貴，
果個人仲同我地去買花盆添，
本來我地諗住求其一個cheap cheap 花盆就ｏｋ，
但果老闆又話唔襯，結果去買左個花盆，成七十蚊，
盆花二佰蚊，不過都有成三十個花心，
本來都有少少肉痛，不過，都算啦，過年買ｄ花應節都好，
而且ｄ牡丹若ｏ係香港買都真係幾貴，
仲有個花盆都幾有中國味道，第日都可以拎黎種第二ｄ野，
所以先覺得好ｄ，費事比某人話我孤寒囉！

因為今日都仲係幾攰，所以冇煮飯出去食飯，
亦唔知係咪未好返，對住電腦一陣都覺得有ｄ頭痛，
我諗今日要再好好地抖抖先得喇。

＊　＊　＊　＊　＊

依家個士多啤利已經熟喇，而且仲有好香好濃ｏ既士多啤利香味添，
不過暫時未摘佢落黎，因為摸落仲係比較硬，
等佢再熟ｄ”林”ｄ先再摘，
希望唔好比雀仔捷足先登啦∼∼∼