琴日算好景左一日，今日就一般多野做啦，
朝早終於同家姐老闆提起關於我張Access卡事，
佢話準女經理幫我問過，但暫時未有回應，但我覺得實在太過份，
因為我份form係一月尾遞上去，期間先得email 過三次，
但依然冇回音，我同老闆講唔係怕牽涉到佢地，我一定會投訴，
後尾晏晝老闆覆返我，話我份申請唔批，因為佢地資格唔夠，
又話大秘書都試過send 野比佢地部門，但竟然話冇收到，
最後佢地先唔知ｏ係邊度揾返出黎，細佬老闆ｄ agent 都曾有呢ｄ經歷，
我覺得佢地處理上有問題，但係點解要我地去承受後果？
不過今次大老闆秘書話提議不如叫大老闆幫手出面，睇下有冇機會得，
事到如今都唯有ｏ係咁啦，唔係仲可以點？

中午約左隔離新秘書其中一個老闆食飯，今次食飯感覺上有ｄ政治成份，
因為直覺上係佢會問下我關於新秘書ｏ既野，雖然佢同我講約我食飯都冇咩原因，
但結果話題當然有涉及新秘書。

呢個 agent 以往同佢關係都冇咩點，佢話覺得咁多秘書中同我最好傾，
咁我同佢之間都冇咩ｏ既，或者唔涉及利益衝突，不過原來佢請左秘書後，
見到佢對秘書要求都幾苛刻下，不過當然佢問到我做秘書ｏ既野，
我都係照直講我工作上ｏ既情況，同老闆之間點樣合作，當比佢一個參考都好ｏ既，
當中我都同佢提個秘書其實都幾乖，同埋佢係新人黎講工作量都幾多，
不過佢都有佢見解，但最重要一個point 係佢都幾怕蝕底，驚死幾個人夾錢請一個人，
若好似我咁四個老闆唔分時段做野，唔知個秘書會做咩野，會唔會做少佢果份，
其實好似佢咁諗都冇咩得講，我唔可以話佢唔ｏ岩，不過感覺上佢唔係好信得過個秘書，
好彩我幾個老闆唔係咁，或者佢冇諗過有時做人太過計，人地一樣會同你計較。
不過呢ｄ野我冇講ｏ既，每人有每諗法，每人角式亦唔同，所以我都唔想講多錯多。
唯有希望佢遲ｄ信得過個秘書多ｄ，唔好嚇走人啦。

呢兩日天氣急劇轉涼，氣温急降成十度，今晚都幾大風兼有雨，朝早又唔想起身喇∼

今日所有agent 去晒上堂，難得有半日清靜，
忙左足足一個星期，終於可以抖陣氣，
所以我冇放過呢個咁難得的機會，好勤力咁清野，
結果朝早都清左唔少堆住的工作，晏畫仲可以scan少少野。

本來家姐老闆晏晝會返黎，因為黎緊幾日都唔係咁得閒，
點知佢大仔上體育堂扭親要老闆去接佢，
但佢又令老闆激氣同傷腦筋，所以老闆打黎講公事之餘，
都向我訴左少少苦。

做人父母本來就唔係件咁易ｏ既事，有時旁人都好難幫到咩手，
唯有聽下同比少少意見咁啦。不過亦因為家姐老闆冇返到黎，
所以我先有機會抖少少氣，若果佢返親黎我又冇機會停喇。

聽日隔離新秘書其中一個老闆約我食lunch，唔知因咩事呢？
以前一直都覺得佢幾nice，對我又好客氣，
點知佢請左秘書先發現佢做事係非常之咁執著同幾吹毛求疵，
今次食飯唔知會有咩目的呢？係想問我新秘書ｏ既野，
還是因為我有時教佢秘書而多謝我呢？始終依家會諗多左囉∼

琴晚都好先訓，因為飲左好多水，朝早迫住要上廁所，
果陣都成十一點幾，不過返上床依然訓得著，仲居然訓到一點幾，
自己都服左自己，不過記得發夢ｏ係公司食完晏，
唔知點解著緊ｏ既鞋唔見左，唯有去揾鞋買，但公司果頭ｄ鞋鋪又貴，
但唔著鞋又怕比人笑。我都唔知點解會發呢ｄ夢。

起身去食野都成兩點，所以去左甜品店食飯加甜品，
食完後經過街市先買定餸，跟住去左剪髮，
上次去剪髮已經係聖誕ｏ既事，都有兩個月，仲要修剪下ｄ損壞頭髮。

今次冇去之前去開果間，唔見佢貼住有特價，
我唔係好鍾意去ｄ入到去先慢慢講價的鋪頭，價錢好似海鮮價咁，
ｏ係街上遊走左一陣，去左一間未去過的髮廊試下，
個價錢我都覺得合理，後尾個髮型師話我髮質較乾，
不如用隻好ｄｏ既染髮劑，都係多廿蚊，咁我都覺得ｏｋ，
後尾埋單前見張單價錢唔同，驚佢屈我，於是問下佢，
原來果個係原價，個髮型師比個dicount我，咁先安落返，
比原價平左成七十蚊，可能人地都睇得出我呢ｄ寒友唔平唔幫襯。
今日淨係剪髮加染髮兩個幾鐘走得算快手，
不過一日ｏ既假期就咁訓左加去剪下髮咁又冇左ｌｕ∼∼