琴日因為訓左大半日，今日精神都補充返好多喇，
而且都冇訓到咁晏起身，十點幾起左身後出露台淋下花，
都淋左成半粒鐘，之後先去飲茶，唔知點解硬係唔飲過茶唔似放假咁。

今日係清明節，不過今日冇去拜山，而今年ｏ既清明節，
都應該係我有印象中最涼ｏ既一個清明節，因為以往的清明都有ｄ熱。
去飲完茶仲去食野甜品先返屋企，之後上左陣網再去超市買野煮飯，
就咁平平凡凡咁又過左一日假期。

呢排真係超級攰，琴日執完野搬完野真係攰到飛起，
今日訓到接近一點先起身，去港式快餐店食晏加睇報紙，
不過睇左一陣又開始眼睏，自己都諗係咪真係攰成咁，
但可能都同天氣有關，今日都仲係天陰陰，有時落雨仲凍凍地添。

為免變成一條大懶蛇，所以都出去行下，又係去睇ｄｖｄｏ既時侯，
新牒唔多，不過見到近來女王同史諾比同事好鍾意追的『海猿』，
６隻牒加一隻花絮牒再加一隻電影牒，都係好平，
唔知若比佢地見到會唔會立即買左佢呢？嘻嘻!

本來諗住去超市買野返屋企今晚煮飯，不過行完牒鋪天色好暗，
好似想落雨咁，但又冇帶遮，所以都係返屋企，夜ｄ至多出街食，
不過返到屋企又覺得眼睏，結果又爬上床訓左兩粒鐘，
假期的開始就過左超級大懶蛇的生活喇。

今日係裝修前的最後一個半晝，雖然朝早都涼涼地唔多想郁，
不過都要捱埋呢半晝。返到公司心急老闆都比左幾個quotation比我幫佢整理，
冇耐都佢走喇，臨走仲話冇咩比我跟喇，叫我快ｄ執埋自己野，
到十二點可以後走人，所以我都立即作最後的清場。

雖然話唔太多野執，但係瑣瑣碎碎野好多，
好在假期後家姐老闆放幾日假，所以好多野我可以暫時放ｏ係佢間房度，
隔離新秘書同埋女王都有幫我手執野搬野，忙左成個朝早，
終於都八八九九，大家都可以ｏ係十二點左右走人，
因為難得大家一齊咁早走，所以幾個秘書相約去 hea下。

隔離新秘書之前都提過想去唱ｋ，而我、女王同短跑女同事就想碌ｌｉｎｇ，
後尾話今日日子咁難得，不如一次過滿足晒ｄ願望，
於是先去唱ｋ再去碌ｌｉｎｇ。

其實兩樣野我都好耐冇玩過，今日因為冇時間限制，
呢個ｋ lunch令到大家都好滿足，由十二點幾唱到四點幾，
唱都唱到有ｄ眼訓，後尾短號女同事個囡囡參加完學校活動過黎join 佢，
之後四大一細咁去左黃埔碌ｌｉｎｇ，女王同埋新秘書碌左一局，
我同短跑同事碌左兩局，好難得玩一次麻，雖然真係幾手軟，不過真係好盡興。

暫時公司裝修忙左前半part，亦因為咁多左一日半假期（希望最終真係賺左啦），
變相提早左放復活假，發左幾晚關於公司ｏ既夢我諗因為假期的到黎，
應該暫時會結束，我會盡量好好咁享受呢幾日假期，
之後返工後先再忙埋果下半part 喇。