呢排比煩煩老闆激親，不過我都話比自已聽，
好多野唔好咁上心，訓醒覺就冇事。
朝早心急老闆過黎揾過我，話好唔好同家姐老闆傾下幫我爭取張Access 咭，
於是我話佢聽家姐老闆已經幫我爭取左，不過失敗，
佢話我咁樣出入好唔方便，我都話冇法啦，至多返工ｏ係門口企下跟人尾入去，
去廁所或出去交單咪問女王或同事仔借囉，都唔死得人ｏ既，
老闆又提過佢自己upline 會請秘書，我估唔知係咪揾佢幫手，
不過我覺得麻煩到人就唔好喇，其實心急老闆都好有心想幫我爭取，
所以心裏面都舒服左好多，雖然我知道結果都係爭取唔到，
但至少佢地有為我出力同好有我心，其他老闆都係對我好有心ｏ既，
都好安慰喇。
冇耐拎返野比心急老闆，入去見佢同煩煩老闆傾緊偈，
我估有講張Access 咭ｏ既野卦？拎完野就出返去，
冇耐煩煩老闆行過用佢招牌式笑笑口嬌俏咁黎問我：
『你張Access結果點呀？』我聽左個下真係有ｄ興，心諗你仲走黎問我？
不過我當然會按住把火跟住好淡然咁答：『上訴失敗左啦！』，
佢跟住再問我：『咁你點呀？』嘩！真攞命，仲問我？我真係唔識比反應佢，
因為真係好想打佢，但當然都係心諗嗟，跟住深呼吸一口再答：
『點？咪返工ｏ係門口等，出入去廁所問人借咭囉，唔係仲可以點？』
『真係好無奈呀！』佢做住都好似鄧我慘ｏ既樣，真攞命，真係粗口都想講埋，
若果佢唔係我老闆，真係睇下我炳唔炳佢？家陣係黎安慰我定刺激我？
不過，ｏｋ，話之佢，我話過都唔會再為佢咁上心激氣。
晏晝煩煩老闆陸續有正野，佢簽左張單返黎，但其中一張表格竟然用左舊form，
佢話好慘呀，佢度竟然仲有舊form，但又唔可以話比個客聽，焗住要簽，
我心諗又想乘機黎話我害佢呀，係佢自己成日懶環保唔駛我執新form比佢，
我咪話佢不如第日等我每次執新form 啦，
費事佢自己度或屋企ｄ舊野比佢唔知幾時拎左出黎用，我咁講立即封定後門話我冇錯，
之後佢就叫我出去”哎”下cashier 收呢張單啦，我答佢：『哦！好呀！』
但我一定唔會做，我話過要我唔會再幫佢去做呢ｄ咁肉酸ｏ既野，因為人地一定唔會收，
隔離八卦大嬸聽到，問我點解唔答佢人地唔會收？我話我唔會講，咪由得佢囉，
咁答佢我以前都試過，但佢會覺得你肯去試或唔想去做，所以我依家都費事講。
到五點幾老闆打黎問我cashier 有冇打比我，人地又唔知我電話點會打比我丫？
佢話都知自己衰大頭蝦比錯表格人簽，但又真係唔想再揾個客簽名，
我心諗咁又點嗟？咁樣錯野佢都唔係第一次啦，就算佢認衰都係咁話。
可能煩煩老闆知我唔高興對佢語氣好冷淡，所以今日對我鬼咁冤氣搭住我膊頭講野，
以往佢都試過有時激嬲我會想扮返friend，不過經常重犯冇得原諒，
總之我都係照做返我份內事算喇，我唔鍾意大家要表面做得咁假，假黎假去，
若佢第日唔滿意我表現可以唔夾我，我都冇乜所謂喇，總之都係一句啦，
盡量都唔好再為佢唔開心，有其他老闆對我好都滿足喇。
| 
