＜＜買返黎幾個月的大木瓜，終於『瓜熟蒂落』喇，剪呀∼∼＞＞

＜＜大大個木瓜＞＞

＊　＊　＊　＊　＊

今朝返到公司同女王傾緊偈，見到分行秘書過黎揾我，
原來佢話最新個floor plan係安排左我坐ｏ係佢隔離，
咁就真係好喇，因為果度比較近家姐老闆，同女王又近，
借Acces 咭出入同借電話打都比較方便，
仲有附近都有比較相熟的agent，當然係好消息啦，
咁返工都覺得返ｄ人生樂趣，哈哈∼∼

不過．．．．
到晏晝幫心急老闆影印，佢同我講都係想諗辦法幫我揾張Access 咭，
因為佢都知我成日要出入好唔方便，佢咁有我心其實真係好安慰，
但我話大老闆幫手出左頭都唔得，睇黎都比較渺茫，
跟住我諗住傾開，話埋比佢聽我第日會坐邊個位，
但係．．．冇諗過心急老闆ｏ既反應．．．．佢睇左我第日個位的位置後，
問我個位邊個幫我揀架？係咪因為近住家姐老闆同煩煩老闆？
點解冇問過佢架？？當時一聽到，個心立即諗．．．死火，
冇諗到心急老闆介意，其實我新ｏ既位雖然同心急老闆距離最遠，
不過同依家都差不多，但我因為近家姐老闆多左唔駛似依家咁要由北半球行去南半球。

於是我立即安撫話其實同佢都唔相差好遠，若佢要揾我可以打比我，
因為其他兩個老闆都係打電話比我，再者，我呢ｄ本來就冇位坐的人，
話唔定遲ｄ又因人滿之患又要搬走，但心急老闆話就係唔想我成日要搬，
寧願ｏ係佢間房買張枱比我坐，其實我心諗坐佢間房冇問題，
但係輪到佢要千奇唔好出房，若果唔係，我咪又要搬位？
當然呢樣野我唔敢講啦，之後佢話揾家姐老闆傾下。

唉∼∼當時我心諗係咪我衰多口話左比心急老闆聽呢？
不過，就算依家唔講第日佢都一定會知，但係咪知遲ｄ好ｄ呢？
本來諗住去定家姐老闆度告密話心急老闆想同佢傾呢樣野，
我諗同佢講下我自己的意願，都幾想跟Floor plan 坐，
點知咁ｏ岩家姐老闆行出黎，經過心急老闆間房就入左去傾喇，
我唯一係怕家姐老闆費事大家有意見，讓我近心急老闆附近坐，
其實我坐邊都都冇乜所謂，但有得選擇就想坐秘書隔離多過坐agent 隔離囉。

本來又諗住佢地傾完偈後去家姐老闆度八下，不過經過佢房佢又傾緊電話，
同埋唔知係咪我敏感，覺得佢好似冇乜表情咁，唔知會唔會話反影比準女經理聽添，
今次真係覺得件事情又變得曲折左。

唉∼∼自從前大老闆走，真係唔少風風雨雨，依家比我感覺老闆會因各位其主，
唔多唔少會計較左，尤其心急老闆，始終佢覺得佢一對三比其他老闆撬走我，
所以估計今年review 唔知會唔會有人事變化，或者合作上會多ｄ規條，
睇黎大老闆走ｏ既後遺症都唔少，真係唔知煩到幾時，唯有又係煮到埋黎先食啦。

＊　＊　＊　＊　＊

同場加影『哥斯拉大戰木瓜獸』（有人好無聊之作）∼ ^^"！

＜＜哥斯拉同木瓜獸之相遇．．．．＞＞

＜＜哥斯拉樸向木瓜獸．．．．．＞＞

＜＜哥斯拉同木瓜獸打作一團．．．．＞＞

結果係點呢？．．．．．．本來有人想影埋哥斯拉個頭比木瓜獸咬住兼吞落肚，
但因費事整爛個木瓜，所以冇影到．．．．． ^^"
所以結果由讀者去想像喇．．．．．

係咪好無聊呢？？哈哈∼∼∼

今個星期正式踏入裝修前倒數一星期，不過同事會都未全面執野，
若有時間ｏ既同事就清下ｄ垃圾，其實我都大把野清，不過未有時間。

今日家姐老闆覆我話煩煩老闆肯比我連住復活節放假，咁好死？
都唔知係咪諗住叫我用自己假期放果三日，
因為本身公司係叫我地三號下午開始就裝修，最好唔好留ｏ係公司ｏ既，
或者係我將煩煩老闆諗得衰左，但先前幾次佢諗ｏ既野實在難令我唔咁諗佢，
不過講真依家我又唔想拎假喇，因為事實都好多野要執拾，
依家計劃下星期一煩煩老闆去左大陸玩，咁果日我全日幫佢執野，
第二日半日如無意外應該可以執左自己個位ｄ野，若下星期放假，
我今個星期要做得好急喇，而且咁樣放假好似有少少心掛掛添，
所以都係算吧啦，或者聽日再同老闆講返，
除非煩煩老闆又有令我意想不到的建議啦。

今晚果然訓唔著，上網周圍遊走，見到一個關於『九型人格』ｏ既網站，
諗返我地公司ｄ  agent入職或上堂都有類似測試，睇下每個人的性格同分析，
有助佢地對人際關係有改善，我個細佬老闆都有去上呢ｄ course，所以今次見到都好奇去做下測試，
唔知呢個測驗係咪真係正宗九型人格測試，但我又覺得個結果真係幾似我媧。

我係『第九型』∼∼　平和型（隨和豁達，樂天知命）

性格分析：

您通常是溫暖、友善、忍耐、隨和、不好競爭，以及愛說話。您偏好和平、有組織、可預期而舒服的生活。
您喜歡配合環境，因而很難知道自己的優先次序，變成跟隨別人所希望而去做事，有時候甚至模仿別人說話的腔調、
用詞，以及身體語言。

優點：
非常主動，具有眾多興趣和嗜好。您喜歡與人為伍，可以為了別人而發揮最具生產力的工作成效。

缺點：
您會「自我遺忘」，失去了什麼是對自己真正重要的覺察力。您很容易分心，即使一個人時，
亦有可能把高度優先的事情留到最後才做。看起來很像是拖延，但並不故意。

愛情：
您一旦擁有了關係，不會想到分離，而且會承諾去經營恆常不分離的關係。您既忠誠又慷慨，
可以不帶妒忌或競爭心去支持並慶賀伴侶的成功，當伴侶的需要浮現時，更能給予回應。

您的憤怒最有可能在親密關係中顯現。因為當您迎合別人時，自己就消失了。
「我有好長一段時間不知道自己的感覺，總是一片空白。當她投射出她所認為我感覺到的事情時，
我們便陷入爭吵。我痛恨這種情形，但是對於引發我找到自己想要什麼確實有幫助。」

安定方位：成就型
在安定的狀態下您會變得很專一，能在短時間內完成許多傑出的事。

壓力方位：忠誠型
當面對感情的壓力或情緒對抗時，您會變得充滿恐懼，意識到所潛在的威脅，不但變得退縮，甚至唯命是從、
好鬥、彆扭而且更頑固。

建意：
問問自己的想法，而非顧慮別人的意見
注意您對改變的不適感，學習歡迎新事物。
注意您的頑固和被動式抗拒

最渴望：和洽相處
最恐懼：有紛爭，有衝突
最難達到的美德：果斷 (Right action)
最難克服的執念：懶惰 (Sloth)

＊　＊　＊　＊　＊

如果大家都想知道自己係九型人格中邊一型，不妨入去玩下丫∼∼
http://www.parttimegroup.com/PartTimeLove/Assessories/NineType/_Paper1.aspx