＜＜第一個結果的蕃茄變色喇∼∼＞＞
＊ ＊ ＊ ＊ ＊
琴日放工約左幾個秘書聚舊，因為女王生日都未補返請佢食飯，
今次都係我做攪手，因為知道佢地都好忙，本來做攪手都冇乜所謂，
不過最大問題係走左ｏ既豹紋同事最煩，因為個個去邊食都冇所謂，
單單係佢最難服待，以往我地多數約去旺角食飯，因為諗住大家走都方便，
但今次因為月尾做分行秘書ｏ既同事要埋數會晏走，咁我覺得第二日放假，
即侯晏ｄ都冇所謂，所以諗住叫豹紋同事今次過黎尖沙咀，唔駛ｄ同事咁急趕，
點知個衰野好唔想，又問佢地因乜事咁多野做？我都閔閔地答佢多野做咪多野做囉，
又係話出黎尖沙咀好唔方便，仲係極唔方便，我問佢有幾『極唔方便』呀？
其實ｏ係新蒲崗東頭村果度出黎有幾唔方便？又唔係叫佢上深圳，
佢話咩要行出去坐車，我答佢我以前ｏ係新蒲崗住，ｏ係東頭村讀書，
行去車站要幾遠我肯定知，其實一ｄ都唔遠，我同佢講慢慢坐車出黎，
可能出得黎佢地都差唔多走得，跟住佢又話佢都可能晏走，我問佢有幾晏，
佢話都要六點零，六點零叫夜走？我都已經好閔，同佢講黎我地樓下食，
佢問我果度食乜，點解要去果度食？我話佢鍾意食中餐咁去果度食囉，
上海野都係中餐丫，我知佢好唔願意，我唔比佢選擇，因為佢好麻煩，
我直頭叫佢過黎，佢有幾秒鐘冇出聲，跟住都幾悔氣咁好似應左我，跟住大家都收線。
我真係比佢激爆，我好少會唔就人，但我單單係唔鍾意就佢，
雖然佢份人率直係佢優點，但亦係佢缺點，有時ｄ表現真係令人好唔舒服，
因為大家都成日好就佢，佢淨係鍾意食中餐，之前都叫就佢去打邊爐，
但唔可以次次人地就佢，佢就人一次就唔得，所以我好堅持唔會就佢。
後尾七點左右佢打黎話仲係公司，同我講不如出旺角食，又話走大家都方便，
一陣又話自己呢輪腸胃唔好，唔想食上海野，我話佢又唔早講？但我都一樣唔就佢，
要佢出黎，我知佢都幾不滿，但我都唔理佢，其實我地五個人佢遠得最近，
我地幾個住元朗、青衣、將軍澳甚至我住深圳都未話唔方便。
冇耐其他同事都相繼可以走喇，唯一係要等佢，其實大家都冇所謂等佢，
只係本來我地諗住去果間野一定要齊人先入得，咁我地都係差一個人佢都唔比我地入，
我覺得佢地太巴閉，又唔係唔駛錢，所以提議去另一間店食，呢間係食日本野，
呢度我未食過晚餐，但我覺得環境ｏｋ，同事問呢間係食日本野，
怕唔怕豹紋同事唔鍾意，我堅持話之佢，講真我地幾個有時都想食下日本野，
冇理由次次就佢，跟住諗住打比佢問佢去到咩位置，但我話左唔想打比佢，
我怕我忍唔住氣同佢開火，唯有等同事代勞，後尾豹紋同事黎到時都面燶燶，
講真我唔係好欣賞，若唔係因為大家諗住一齊聚舊駛事攪到氣氛唔好，
我一早就叫咪黎，因為我駛事睇佢面色，比面色人睇我都會，
雖然佢依經咁大個人，但真係下下就佢其實係害左佢，
好在叫做坐落之後大家傾下偈之後氣氛媛和返，大家都叫做有講又笑，
而且琴晚ｄ食物都唔錯，仲食左個雪榚甜品添，但我琴日先前太閔都唔記得幫ｄ美食影返張相添。
不過經過理琴日呢次，若果再同豹紋同事有飯局，我真係唔會再做攪手，
因為佢唔係第一次咁煩，淨係自己有要求要，但又唔想就人，
等人地攪等人地諗地方之後先reject或有意見邊個唔識？我覺得大家出黎聚舊應該係開心ｏ既，
但係佢真係令我好勞氣，所以就算比人話我小器又好，話我衰又好，我都唔會再攪架喇，
因為呢個係我ｏ既宗旨，一次、兩次甚至三次，我可以去就，但係次次係咁我會say no，
冇理由下下要人就你，但又唔理其他人感受，若過out 左我ｏ既容忍限度我絕對會咁做，
大家相處最緊要係開開心心嗟，到頭來要邊個就邊個都唔好，只可以話大家夾唔到，就係咁簡單。
＊ ＊ ＊ ＊ ＊
今日只得一日假，基本上都係休息下，煮下飯仔，上網幫水滴炒賣下ｄ物品咁就過左一日假期喇∼ | 
