琴晚約左人食飯，因為太眼訓緣故，所以都冇打日記。

琴日家姐老闆放完假第一日返工，例必多文件清理，
但我琴日咬實牙根努力咁清理（講到好似好誇張咁．．．），
都清理得七七八八，真係好難得喇。

今日冇琴日果股衡徑，因為有ｄ時間又同家姐老闆傾偈，
聽佢講細路老闆原先諗左左計劃請人返黎幫佢手請人同埋跟某ｄ客，
但新女經理唔太同意，佢同家姐老闆講左原因，不過家姐老闆講返比我聽，
咁我都覺得合理，因為女經理怕細佬老闆行呢個方針，
將來又會惹黎是非或閒言閒語，我都想像到若老闆又再受到呢ｄ事，
雖然佢比以前成熟，但始終都影響心情甚至連帶有其他影響，
所以今次女經理的憂慮我都覺得同意ｏ既，或者再諗下行其他方針，
可能都可以遲到原本打算的後果，唯一係怕老闆開支太大會辛苦囉。

另外都有提起我快將review o既事，我聽家姐老闆講都煩要點都煩煩老闆傾，
最主要係冇左細佬老闆大家都要夾多ｄ錢，其實所謂多ｄ錢，每人都係幾百蚊，
但我知煩煩老闆係最介意，有時我唔係想讚自己好，而係我覺得煩煩老闆請咩人都冇所謂，
做唔做到野都得，至緊要係唔駛比咁多錢，但家姐老闆同心急老闆則覺得比得合理，
佢地唔介意比多少少。我都同老闆講到時睇下佢地傾成點啦，
若最終都係揾返一個人取替細佬老闆果份，但最緊要係果個人唔好係果ｄ算到咁盡ｏ既人，
因為咁樣夾檔遲早會出問題。但都係果句，到時先算啦。

因為家姐老闆聽朝唔返見客，所以臨放工要趕埋個quotation佢地，
臨放工經過之前坐隔離的新秘書度，佢同我講我同佢可能好快要比人迫遷，
因為ｄ吉位都已經比人拎得八八九九，或者今次聽到呢個消息都冇乜大反應喇，
唔似上星期的閔憎，或者明知係遲早的時，有時反而諗若真係想佢早好過遲，
等我早ｄ買張枱搬入老闆房坐，可能仲冇依家咁迫，至少有風景睇下丫嘛，
若老闆真係不幸出年保唔到間房，至少都坐耐ｄ啦。

＜＜肥嘟嘟都好健康的蕃茄仔＞＞

＜＜楊桃樹上的楊桃都開始熟喇，好快又有得食呢∼＞＞

＜＜幫葡萄樹安頓好喇，準備定水管同欄杆比佢”冷”＞＞

＊　＊　＊　＊　＊

呢排因為公司裝修後安排的唔好心情終於爆發左出黎，
好在有假期慢慢調劑返心情，尤其琴日出露台見到蕃茄長左好多枯葉，
於是的起心肝同佢修剪晒，係咁剪呀剪呀，剪完之後覺得佢地靚仔晒，
而自己ｄ唔好心情都好似剪枯葉咁剪晒喇。

琴晚總算訓得幾好，至少冇夢到公司ｏ既野，
今日出去食飯時，順道拎左ｄ種子同埋南瓜苗，
因為上星期應承左附近新開的體育用品老闆娘拎ｄ苗比佢，
佢見到我地好開心，我地仲比左ｄ薄荷苗、三色堇、士多啤梨、波斯菊種子佢地，
因為佢地鋪頭門口有一處小小的空地，可以整個簡陋的茶座同埋種下ｄ花草。

今日又同佢地傾開偈，問佢地會唔會攪團，佢地話會先攪ｄ三、兩日ｏ既團，
最主要都係為團友安排交通、住宿，其餘都係任團友自由活動，
呢種旅行最ｏ岩我，唔駛下下好似ｄ鴨仔咁比人趕來趕去，去ｄ自己唔鍾意ｏ既地方，
而且佢地都有聯絡開呢方面ｏ既野，所以遲下時間ｏ岩都諗住join 佢地玩下，
出去relax 下又影下相，好似好耐冇影過ｄ旅遊相喇。

因為佢地新開張，個網要聽日先駁到，我地問內地幫佢地setup 個網同埋放hosting 要幾錢，
原來要大拿拿千八蚊，所以我地話幫佢地手setup，因為都唔係好難，
佢地鬼咁開心，聽日會去幫佢地攪，夜晚又話要請我地食飯添，
有時間大家交流下旅行心得都會幾開心，因為大家都總算係鍾意旅行的同道中人，
話唔定第日有更多機會接觸或合作都未定呢∼∼

終於都到左星期五喇，呢個星期好以過得好快，但又好似過得好慢，
因為對我黎講好似冇乜做過咩野咁，每日都係抽時間做下野又執下野，
其實真係好多瑣瑣碎碎事情做，但有時又冇乜心機，因為ｄ做野ｏ既架步始終未安頓好。

聽大秘書話下星期鬼佬ｃｅｏ會過黎巡視，咁即係又要走鬼，
但為我個電腦機相同scanner 係放ｏ係個位隔離，但因為係走廊位唔可以加野，
當然遲下耐ｄ可能則則膊過骨，但剛裝修完上層黎巡視實要執正，
所以真係攪到我地不勝其煩，我諗諗下，下個星期正頭將台電腦同scanner 暫放入家姐老闆房，
等鬼佬巡完先拎返出黎，我寧頭冇電腦用住，都唔想浪費時間將ｄ機線插來擠去，
而且放ｏ係自己個位真係腳又伸唔到，坐又坐得辛苦，唔想咁攪到自己腰酸骨痛，
兼且留地方比自己處理下文件好過。

自從舊年年尾公司換左鬼佬CEO，作風同以前唔同左，鬼佬主張要快睇到成績要賺到錢，
好多野又捉得緊左，就好似越來越難幫ｄ秘書拎位，又捉得正唔比亂申請ACCESS 卡，
老闆唔夠title一定唔駛諗冇情講，好似我就係一個好例子。而公司ｄ坐位就越改越細，
一味想請多ｄ人，細佬老闆仲預期，遲下分分鐘做唔到數，連ｄ agent都冇位坐，
即係若你要留低，就一定要幫公司搵到錢。

雖然我入黎呢間公司做野時，老闆都已經同我講佢地唔夠title 幫我拎位，
若人滿晒可能會冇位坐，但當初入黎時冇乜野做，自己野又唔多，所以都覺得冇乜所謂，
而且以前地方真係大ｄ，亦有唔少空位，所以做左三年左右都冇發生過問題。
但依家我地呢邊越間越細，ｄ位細左又少左，已到有人滿之患，
我真係隨時冇位坐，加上呢排成日搬黎搬去好煩，真係攪到越來越冇歸屬感，
試問返工時唔可以正常出入門口，連一張基本ｏ既工作枱都冇，真係唔敢想像咁樣叫做返工，
雖然依家ｏ係度我係最耐年資ｏ既秘書，但將來反而最大可能我係唯一冇位做野ｏ既秘書，
(part time 秘書不計），因為其他秘書老闆都夠晒title 幫佢地拎位，
有ｄ雖然依家冇，但將來有機會有，都仲叫做有ｄ希望，而我就唔會喇，
我打呢份工都不求會有職升，亦唔需要有咩ｔｉｔｌｅ，但求平平穩穩，
同老闆同事關係良好，開開心心過一日就夠喇，但真係冇諗過，
居然會為有一張基本ｏ既工作枱，可以正常出入公司而煩惱。

我ｄ老闆雖然成績一向唔錯，但佢地講求平穩唔打算選擇升職並唔係錯，
只係公司要用呢種政策，佢地都覺得無奈，但始終做野果個係我，
做野唔方便又真係幾影響工作態度同心情，如果唔係老闆ｄ房又係分分鐘會冇左，
我都寧願好似心急老闆咁講，買張枱坐入佢間房做野，肯定寬敞過依家，
又唔駛驚分分鐘比人攞走個位。所以呢排我都成日同同事講，
真係到左最差地步，我怕我真係因為冇枱做野同唔可以出入門口而唔做呢份工，
因為實在唔係一個正常ｏ既工作環境，即使老闆唔差，關係好，但都抵唔到日日ｏ既唔方便，
若果真係咁，我諗都冇人試過用呢個做辭工理由。

唔知點解今日真係特別閔，可能呢排真係執野執來執去執到燥晒？
個工作環境越變越差？還是因為今日係黑色星期五的關係。
總之好在聽日放假，唔係肯定爆炸，生人勿近！！∼∼　.\ /.#