唔知係咪呢幾日落雨天陰陰，所以特別眼訓，
琴日都唔太晏訓，不過都好似訓未夠。

今朝十點左右見家姐老闆拎住我ｄ資料，應該係傾我review o既野，
不過我記得煩煩老闆又要開經理會格？點知原來煩煩老闆真係唔記得今日傾我review o既野，
結果家姐老闆同心急老闆兩個人都傾左一大輪，接近食飯家姐老闆同我傾返結果，
佢話佢地唔會主動揾人替細佬老闆果份，基本人都係維持最初我入職時三人請我，
其他細節佢地話稍後會再傾，因為我要六月先正式review，
若果只係服待佢三個固然好，但睇黎佢地亦會保留加人的機會，
不過又係果句，到時先再算啦。雖然本來同細佬老闆合作埋下個月，
但我覺得明知佢退出要白白比埋我果份，都幾無謂，
除左煩煩老闆外，心急老闆都叫不如下個月唔好叫細佬老闆出我個份錢喇，
所以今個月應該係最後一次收細佬老闆人工，諗返不經不覺都同佢夾左四年幾喇，
雖然有一年幾時間變左由女王幫佢手，但名義上佢都係老闆，
但下個月起我ｏ係呢度應該唔再用細佬老闆黎形容佢喇，
應該變為『前細佬老闆』，定係『細佬前老闆』呢？等我諗諗先∼∼

今日唔知點解幫隻mouse換完電之後，隻mouse 搭左女王隻mouse 條線，
變左隻mouse 無啦啦ｏ係度自己郁，最攪笑係女王同電腦時隔空控制我隻mouse，
不但開左我某個file 仲複制左添，真係笑死，今日都係攪佢唔掂，
聽日試下拎第二隻mouse 返黎試下，睇下會唔會正常返啦。

今日好彩返工時冇乜雨，因為朝早時天色黑到就要跌落黎咁，
仲落傾盆大雨，所以都曾一度掛起紅雨。

中午約左以前分行秘書，都成個幾月冇一齊食飯，
本來上個月約食飯都攪唔成，女王餐生日飯都未食，
所以約佢地下星期一晚出黎一聚。不過又好彩係約左舊書食飯，
若果唔係準分行女經理會叫埋我食飯，政治飯都係唔食好過食。

晏晝偶爾傾下偈，一路做住Ｄ沒完沒了Ｏ既工作，
坐隔離分行秘書話比我地聽，新分行Ｏ既CODE 出左喇，
亦即係話，由舊年大老闆請辭後一分為三，
到今日叫做正式分開獨立晒喇，新分行分別誕生喇，
家姐老闆同煩煩老闆的分行係『３２１』，都幾好記丫，
得唱歌仔：『１２３、３２１、１２３４５６７．．．．．』，嘻嘻！

聽日三個老闆約埋傾我Ｏ既野，唔知結果會點呢？

今朝返工出門口時冇乜雨，不過到關口後就落得好勁，
ｏ係車度沿路都好大雨，好彩ｏ既係落左車返公司段路冇乜雨，
都算好好彩喇。

今日都好多野做，有ｄ野係星期五臨放工收返黎ｏ既，
但今日都未得閒清理。今日同家姐老闆傾開，問細佬老闆結果有冇請果個朋友，
老闆話結果都有請，上星期仲同埋佢去見個大客添，
唔怪得上星期家姐老闆個朋友著晒成套套裝上黎啦。
另外家姐老闆都話星期三約左煩煩老闆同埋心急老闆傾關於我ｏ既野，
因為細佬老闆會退出，黎緊會係維持三個人定係另揾一個人替代細佬老闆位置呢？
當然家姐老闆想維持現狀，但煩煩老闆就想比少ｄ錢，
若另揾人又會怕果個人會斤斤計較，所以我都知家姐老闆都會有ｄ煩ｏ既，
我都想只係幫三個人手，咁做野可以細心ｄ，若要招呼多一個人，
我諗每日都要做自閉女，都唔方多機會傾偈喇，
後日等佢地傾完好快會知道個初步結果喇，希望係理想ｏ既結果啦。

下個星期尾除左煩煩老闆外，幾個老闆都去瑞士旅行，
希望到時可以襯佢地唔ｏ係度一個星期，可以抖返陣同埋清下ｄ野啦。
（次次都係咁諗，但最終都係冇咩清到．．．無奈．．．）