＜＜今次整ｏ既『沙拉骨』都算成功，仲幾好味添！＞＞

＊　＊　＊　＊　＊

踏入假期的第三日，終於的起心肝去整下自已個豬頭，
上次夾完負離子都五個月，頭頂ｄ頭髮已經好巒，不過因為琴年夾得唔好傷左頭髮，
所以唔敢整咁密，所以一路都忍住，今次襯放幾日假都要去整一整喇。

中午本來諗住去飲茶，不過好多人等位，可能天氣太熱個個都諗住去飲茶嘆冷氣啦，
諗住咁多人都費事等，轉左去食燒臘，跟住都準備去整頭髮。
上兩次去開果間雖然個師父ｏｋ，不過整直髮就真係唔係好得，
攪到呢年ｄ頭髮傷得好緊要，其實依家屋企樓下都開左間，但又驚佢貴，
所以最終去左附近一間都係新開ｏ既，今次唔敢貪太平果ｄ，
怕又整得唔好，叫做揀左百幾蚊ｏ既，另外染髮都揀左百幾蚊ｏ既，
但就包埋剪髮，整晒三樣總共三佰幾，但今次係整得最快ｏ既一次，
我兩點零去到，六點鐘都可以走人喇，今次呢間其實都整得麻麻啦，
不過我要求又唔太高ｏ既，只要唔好再整傷就ｏｋ喇，
至於髮型我都唔太講究，但今次叫做將之前ｄ壞頭髮剪得七七八八喇，
為求快ｄ剪走壞髮，所以我都主動叫師父剪多ｄ，
唔知過兩日洗完頭會唔會變型，不過冇計啦，鬼叫我天生巒毛仔咩，
我都唔想成日整負離子，又要用錢又傷頭髮，但唔整ｄ頭髮鬆鬆散散仲煩，
果真係一頭『煩惱絲』。

今晚跟住呢排網上揾到ｏ既食譜整『沙拉骨』，上次整酸左ｄ同埋ｄ排骨唔夠林，
今次試下先將排骨出水再整，加上今次調味掌握得好左，ｄ沙律醬份量又落得ｏ岩，
所以整出黎味道唔錯，真係開心喇，下次又試下第二款菜式先∼∼ ^++++^

因為放假，所以可以晏ｄ訓，琴晚都成兩點先訓，
訓到成十二點先起身。今日餐晏仔去左食甜品果間，
天氣熱食返個凍ｏ既『椰汁西米露』特別正∼！

食完野諗住去睇下ｄｖｄ，但呢兩日超熱，所以都唔行寧願坐兩蚊巴士，
不過去到發現買ｄｖｄｏ既私竇已經冇左，上次仲以為佢只係因為風聲緊停下添，
落去樓下二樓賣ｃｄ同ｄｖｄ果度見到個老闆，問佢仲會唔會開返，
佢話果度唔會開返架喇∼∼OH~~NO!!!唔制呀，
咁我咪買唔返好多經典戲同卡通囉？！雖然果商場二樓都有ｄｖｄ賣，
但冇果度咁多ｏ岩我地口味ｏ既，嗚∼∼真係傷心呀！！

原先有諗過去東門行下，因為天氣太熱，都不宜ｏ係戶外久留，
於是去左附近間百佳超市行下兼買埋餸，放假寧願自己整下野食。

返到屋企check email，見到家姐老闆email 比我，
話揾唔到條信箱鎖匙，我記得果陣比佢時佢唔知係咪放左ｏ係自己櫃桶，
因平時都係我幫佢地開信箱，所以佢地一時間揾唔到，
而且佢地通常好心急，成日眼大睇過濃，不過我見到個email時都六點喇，
唔知最終佢揾唔揾到，但我都有覆佢ｏ既，但可能要下星期佢返工先睇到喇。

聽日又星期六喇，睇下會唔會去整下個自己個豬頭先∼∼

今日係假期開始，第一個節目當然係做豬啦，
起身後去左飲茶悠閒下，然後去花卉世界，
因為要買返ｄ竹比ｄ南瓜、葡萄等『冷』藤，
不過今日真係好熱，熱到即使唔郁都會流汗，
何妨ｏ係戶外仲有猛烈ｏ既陽光，雖然我都有拎遮，但都勁標汗，
返到屋企都覺得自已己經臭晒，連自己都聞到自己ｄ汗臭味，
若果咁ｏ既天氣ｄ老闆們要著套裝出街，比著我真係驚熱到暈低，
好在今日放假嗟。

聽日去邊度好呢？去整頭髮定係去行下街好呢？
睇下聽日天氣點先算啦∼∼