今日真係破左紀錄，ｏ係張床度磨到接近兩點先起身，
起身後都冇出去，整左買左一排ｏ既螺絲粉食，
之後又走左去上網。

今日成日天氣都唔穩定，久不久都落起大雨，
下個星期好似成個星期都落雨，返工就真係麻煩喇，
所以都好想買返對水靴，我知道國內網上有得買，
都唔算好貴，連埋運費都係百幾蚊，唯一係怕佢會貨不對版，
不過，百幾蚊都可以試下ｏ既，至多ｏ係呢邊著嗟，
我見有ｄ網都有人集體買左，唔知口啤好唔好呢？
遲ｄ調查下先。

晏晝有人代勞去買餸，所以難得成日都冇出過門口，
更加容易變左肥豬。

個blog 張相又開始望到悶悶地，今日的起心肝換左張，
比返ｄ新鮮感自己先得。嘻！

唔覺唔覺又一星期喇，聽日又到星期六真係好喇，
過多個零星期又放大假，就叫做清晒今年ｏ既假期喇。

呢兩日都好好彩返工放工都冇遇上大雨，
朝早全人類去晒開會時又到左秘書開會時間同女王、分行秘書等傾左陣偈先會野，
本來都算幾清閒，反而越晏越越多野做，因為有好幾個quotation 要出，
同埋有ｄ文件要處理。

晏晝心急老闆有打比我講公事，之後佢話想下星期一返工，
本來今日想返黎個比老公阻止，我叫佢不如再抖下，但佢立即似小朋友咁，
猛叫唔制，又話好悶，連成套大長今都煲晒，仲睇左好多小說喇，
我呢個老闆真係勤力怪，成日擔心工作想揾錢，所以大家先更擔心佢身體，
真係比佢激死，若果唔係晏晝家姐老闆唔ｏ係公司，
我又同佢講等佢打比心急老闆勸佢抖下。

琴晚好攰好攰十點幾就訓左喇，所以今日精神都還好，
聽日放假今晚又可以放縱ｄ夜訓喇∼嘻！

今朝四點幾落好大雨，行雷仲好大聲，雖然我都醒左一醒，
不過實在太眼訓喇，所以都係大昏迷。

呢幾日好多人去左旅行，少左人氣，加上外面落雨，ｄ冷氣好似比平時凍左好多咁。
今日工作唔算忙，煩煩老闆淨係返黎交單，
心急老闆放假依然未返，先前佢話屋企又事，但琴日同佢傾偈，
話醫生叫佢呢兩日都唔好返工，聽到後洞悉到ｄ野，
今日同家姐老闆提起心急老闆，我講左我洞悉到係ｄ好事，
結果家姐老闆都話我都估中左，心急老闆有左ｂｂ，不過有左冇耐，
怕同人講會小器兼未穩定，所以抖下都係好應該，尤其心急老闆呢ｄ咁心急ｏ既人，
一下唔小心就大件事喇，咁原來佢係有喜事唔係真係屋企有事，
咁都好ｄ，唔駛咁擔心。

家姐老闆今日成日都ｏ係公司，因為本來約左客又比人放左飛機，
成日佢都好似吽吽竇竇，之後又同佢傾下偈，佢話細佬呢排心情唔多好，
因為同阿媽有ｄ唔開心，聽左佢講都好明白，ｄ阿媽有時太小器，
有時侯唔明白ｄ後生環境同情況，我阿媽有時都係咁，
後尾又比細佬老闆個ｂ女ｄ movie我睇，個ｂｂ唔覺唔覺都半歲喇，
呢個時侯係最好玩ｏ既，偈偈下又幾個字，有時都覺得除左做家姐老闆ｏ既秘書，
仲好似做埋家事信箱咁，因為久不久都會聽下佢講屋企人同ｄ仔ｏ既野，
有時都幾攪笑，我諗若細佬老闆知道佢家姐乜都爆比我聽，佢一定要抗議，
因為我知道晒佢ｄ瘀野同衰野呢∼∼嘻嘻！

ｏ係難得清靜的日子下，都有機會去碎左少少文件，實在太開心喇∼∼