幾日有好好打日記，除左琴晚公司分行慶祝成立一齊食晚飯，
做左成晚悶蛋，太夜返黎都冇精神打日記，
早兩日就因為開左兩個國內銀行攪網上銀行攪左成晚，
不過結果都失敗左，可能要用返簡體window 先得，ｏ係開戶口時已經激得半死，
國內同胞真係堅忍的中國人，我地ｄ香港人就真頂佢地唔順。
之前ｏ係淘寶睇中對雨靴，只係３３蚊，加埋運費都係５３，
所以平平地買對黎試下，不過淨係攪比錢都攪左好耐，因為佢地ｄ指示不明確，
累我攪左成兩粒鐘，好彩個賣家都好好人又有耐性，依家終於完成左第一單買賣，
仲同個賣家幾好傾互add 左添，依家期待緊幾日後收鞋，希望唔會失望啦。
今日公司大部份人去左灣仔，所以都幾靜，女王今日聽日都放假，
所以朝早都比靜靜地清下野，隔離分行秘書琴日做架ｏ既死人鋪頭玩左成日，
今日都較多野清，晏ｄ連家姐老闆都去左陪仔覆診，所以都較為靜，
ｏ係清野ｏ既好時機，因為黎緊都幾多野做，仲要幫家姐老闆寄成二佰封信添，
真係諗起都慘。
晏晝四點左右去左一轉天星碼頭，因為要拎野比煩煩老闆，
返黎努力scan 左陣野，五點左右去開信箱就真係嚇親，好多文件收呀，ｏｈ ｎｏ！
都冇乜心機清理佢，反而同隔離秘書傾左陣偈，講返我地兩個分行分列ｏ既歷史，
因為呢個分行秘書係分裂後先入黎公司，另外講近來唔知做乜態度唔好ｏ既秘書，
得呢幾日好似狀態友善返，今日仲好好禮貌笑住咁問我：『你聽日陪唔陪我食早餐嗟？』
雖然上星期我都決定唔再同佢食早餐，因為大家太冇話題佢又黑口黑面再對住真係好難頂，
不過佢今日呢個態度又實在好難reject 佢，所以都答應左，
好似自從兩邊分行分裂左之後，都好耐未見過佢咁好笑容同態度，
唔知係佢醒目知道自己之前做得太過份，還是分行秘書有同佢提過呢？
點都好，始終大家一齊做野都唔想面左左，若果佢態度友善返，
或者大家都可以相處返，就當比個機會大家啦。
| 
