呢幾日都夜訓，好彩終於黎到星期五，過埋今晚又可以訓餐飽。
朝早同同事食早餐，今日ｏ既同事明顯態度改變左，
之前已經持續一大段時間的黑面同埋冇野講情況今日冇出現，
冇再問一句答一句，亦都覺得佢肯慢慢傾偈，呢個ｏ既改變希望係好事。
食完早餐上去同隔離分行秘書講同事仔的態度好左，
聽分行秘書講同事仔仲問過若果叫埋小朋友秘書去食早餐佢會唔會去呢？
我都覺得我好似聽錯，唔通同事仔知道自己過份左想同小朋友秘書改善關係？
不過我話小朋友秘書暫時都仲好驚同事仔，不如慢慢黎啦。
今日心急老闆返過黎清文件同埋出quotation，家姐老闆就今朝ｏ係度，
工作唔叫好多但成都要密密手，家姐老闆仲好快手比返ｄ客戶label我，
準備要寄newsletter，家姐老闆下個月大半個月都唔ｏ係香港，
我諗佢都好想我ｏ係佢出發前寄出去，所以我都預今個月一定唔會得閒，
而且今日我同隔離分行秘書都一齊開始左呢個半年一與ｏ既寄信活動，
我諗等女王放完假返黎都可以加入埋我地呢個活動喇。
食晏時小朋友秘書有agent 約左佢食飯，所以今日唔駛湊住佢，
不過臨放工無啦啦打比我，問我陪唔陪佢？又話好耐冇陪佢，
我立即講『乜鬼好耐冇陪』呀？講到我好似冷落緊愛人咁，比佢激死，
我問佢咩事佢又好似吞吞吐吐咁，最終我都冇陪佢，因為又唔早ｄ講，又唔講乜事，
不過我放工上左巴士都有打返比佢，睇下佢係咪又為A-level 唔開心，
佢話本來因為悶冇咩做即興揾我陪，我話我家陣老喇唔似佢ｄ後生女玩即興，
但都叫做同佢傾到到站先收線。
雖然ｄ妹妹仔鍾意揾我傾偈都係信得過我，不過成日說教連我自己都覺得講到悶，
十足一隻死老餅咁，諗起早兩日女王一言驚醒，我話通常話巨蟹座ｏ既人好有母性，
我由細到大都話我冇呢種特性，突然比女王話我ｏ係公司好似ｄ阿媽咁成日要湊女，
先驚醒可能要咁樣黎發揮母性，天呀∼∼點解要咁對我呀
我唔要做阿媽，我要做妹妹仔呀∼∼哈哈！！ | 
