一日未家姐老闆未出發，一日都未有得停，
琴日又係好多野做，家姐老闆應該都知我做到傻傻地，
所以琴日佢都話今日盡量唔出現等我抖下氣，
今日果然佢冇返，終於都叫做有ｄ機會抖下氣，
雖然話抖氣，其實都係利用今日較為清閒去寄ｄ newsletter，
於是一邊摺信內信封，一邊scan野，唯有盡量利用ｄ時間。

臨放工煩煩老闆話想同我傾下關於我打email比內部時語氣問題，
佢話覺得我雖然可以表達想講ｏ既野，但語氣唔較溫和，有ｄ orderｏ既口吻，
當然呢ｄ野見人見智，但我覺得用email 應該係清晰簡單，毋需咁多正統ｏ既書信形式，
但我覺得好似佢舉例ｏ既case係內部同事自己疏忽做漏野，
我通知佢地更正都冇咩唔妥，我又唔係鬧佢，但老闆意思仲想我叫對方若有咩需支援請覆電，
但我覺得真係冇咩要支援，不過ｏｋ，最緊要佢講出黎，佢鍾意咁ｏ既形式可以就佢，
咁以後我幫佢覆email 會用晒佢今日同我講ｏ既口吻，慢慢幫佢鵰花，
不過可能要得我得閒ｄ先得，若好似呢排ｏ既工作量我諗都冇咩可能幫佢慢慢鵰，
因為我仲有大把家姐老闆ｏ既case，仲有接近二百封newsletter，
仲要幫心急老闆攪部scanner兼且分分鐘要幫老闆format部電腦仲要裝機，
我諗我真係冇幾多清晰ｏ既頭腦同時間去慢慢打email，所以話我衰都係咁話。

仲要捱埋最後呢個星期等家姐老闆上機後先有機會抖，唉！真係斷氣！

又到左星期一喇，朝早家姐老闆未返，不過一早有電話到，
但至少唔會有人拎住ｄ野出黎，所以暫有機會入去file 左一陣野，
因為實在太多太多野未file，真係見到都頂唔順。

晏晝三個老闆都分別有ｄ瑣瑣碎碎野做，一路都冇得停，
臨放工都仲有堆文件要留返聽日清，但聽日心急老闆個外甥女黎scan野，
所以聽日又要分時間去睇下佢同埋要執下ｄ文件去碎，真係超多野做。

臨放工諗住放返ｄ野比家姐老闆，點知一入去又走唔返出黎，
因為佢又要訴下苦，呢排多野做但又唔多順，佢又就放假，所以好煩，
佢又話同前細佬老闆傾左陣，細佬老闆又發脾氣，不過我對左佢地咁耐，
佢兩姊弟ｄ性格都略知一二，家姐老闆份人心急，樣樣都好想快ｄ完成先安心，
所以好多case 會催促細佬幫佢問內部，咁的確會催到身邊ｄ人都好辛苦，
講真我都係其中一個，但佢地姊弟間相處係咁，有時鬧下，但其實又鬼咁好，
或者真係每家人有每家人的相處方法，外人都係好難完全明白。

希望聽日又唔好多野做到吊頸啦。

琴晚掛住上網成三點先訓，今朝訓到十二點幾，
上左陣網出去食下午茶，天熱依然超熱，平時都費事周圍行會返屋企，
不過今日話晒係我牛一，所以都唔想好似困住咁叫做出去行下，
本來諗住自己去行下ｏ既，諗住隻怪獸有野做，不過隻怪獸話話晒我『牛七』媧，
點都要陪下我咁話媧，於是去左睇左陣書，行下賣遊戲機ｏ既地方，
仲有去女人商場，本來我仲諗住行下ｄ電腦同電子零件野，
不過行行下隻怪獸話有少少手軟腳軟，大家都諗住可能天氣太熱，
有時ｄ商場人太多，冷氣又唔夠焗親，於是去『麥噹噹』買杯野坐低抖下，
之後都費事行喇，諗住去超市買ｄ野今晚食ｏ既，不過一路都見隻怪獸都唔多妥，
雖然ｄ男子通常都比較捱得好少出聲，但都明顯係唔多妥，
返到屋企都立即要訓落床抖下，果陣先發現佢原來成身都好『興』，
睇黎應該係發燒，ｄ男子就係咁架喇，唔舒服又唔出聲，不過我同佢都係果ｄ大水牛，
唔舒服通常都係先休息訓下，若果未好返先會食藥睇醫生，原來佢話可能琴晚冷親，
因為捱夜唔夠訓再開行冷氣，所以中左招都未定。

所以今日牛一比平時都過得更平凡，可能依家年紀大左喇，
生日對自己黎講唔再似以前咁覺得咁重要咁特別，唔一定要熱熱鬧鬧，尤其搬左黎深圳住之後，
依家我覺得果覺得生日好巴閉ｏ既人真係極不成熟，諗起上次公司同事話要請一日假，
就係為朋友生日出去玩，我覺得咁真係好無聊，好似生日大過天咁，真係ｄ唔成熟小朋友先會咁。

記得以前生日會好想出去玩下，因為ｏ係香港地方細，樣樣節奏快，困得多好想出去抖下氣，
太耐唔出去抖氣會發閔憎燥狂，但搬左黎深圳之後，除左返工之外，ｏ係呢邊節奏明顯慢，
人亦冇咁燥狂，但呢兩年都覺得生日可以ｏ係平凡之中過一樣可以開心，或者真係一把年紀喇，
我覺得最重要係健康同開心，要去玩要去食飯都唔一定要等生日先嗟，有時間有錢幾時都可以做，
所以今年的生日願望都係希望自己同埋身邊的人可以開開心心、健健康康就足夠喇。