＜＜珠胎暗結的楊桃ｂｂ＞＞

＜＜頭頂多左片葉ｏ既”貝貝”>>

＊　＊　＊　＊　＊

大熱天時郁一郁都成身汗，出去行街更犀利，
今日出去食完晏仔去行左陣電腦、手機商場，返到屋企已經覺得好似好攰咁，
可能天熱真係太熱，於是又訓落床訓左個晏教，雖然呢兩日都訓到十一點起身，
但似乎訓埋呢個晏教先好似真真正正叉足電咁。

訓左個零鐘到六點，睇完新聞落去wal-mart買野，
天熱太熱都冇乜心機煮野食，所以都係煮麵食算數喇。

今日出露台淋花時先發現棵楊桃樹原來『珠胎暗結』，
好幾個好細好細ｏ既楊桃ｂｂo係d花o既上面，棵楊桃之前買返黎時已經有果，
今次第一次自己種到佢開花結果，都覺得幾開心，但最近天氣熱左又懶左，
都少左打理個露台ｏ既植物，我諗遲下要黎一次大清理，清左ｄ棵左ｏ既植物先得喇。

＊　＊　＊　＊　＊

今日去探水滴『貝貝』時，信箱收到水滴官網ｏ既信，話我第一隻養ｏ既水滴『小白』生日，
係媧，真係唔提都唔記得今日ｏ係養左水滴剛一年，依家都養緊第三代，今日又發現貝貝變左身，
頭上多左塊葉，而佢亦進入左成長的最後階段喇，佢大得咁快都係因為日日要餵佢食豆。
我諗好快都可以養第四代，但可惜暫時官網都冇出第五、六代或之後的水滴，
可能遲下可以將四代ｏ既水滴每一種類都可以只少養一次喇。

呢個星期總算都有少少時間比我抖下，但心急老闆部電腦都係令人好頭痕，
不過都係放左假先下星期再算。

琴晚同幾個秘書去左打邊爐，今次係因為我同埋豹紋同事牛一所以一齊聚下，
豹紋同事次次見親我地都好似好開心咁，可能平時真係一個人對得四幅牆太多，
琴晚最好笑係豹紋同事講佢唔鍾意著絲襪，成日都扯爛絲襪，
但佢ｏ既講述再加上想像佢平時ｏ既舉動，真係笑到我地眼水都標埋，
雖然佢隻衰野好多時都好鬼煩，但耐唔中都有ｄ好笑野ｏ既。

琴日食到九點幾就散喇，因為酒樓又要做夜場，我見時間都尚早，
所以去左旺中行左陣買左對返工鞋先返屋企，返到去都已經好攰喇。

今朝十一點幾醒左，之後去飲茶，跟住自己去左羅湖城一趟諗住又做下衫，
不過今日老闆娘好好生意，好多人好揾佢拎衫同造衫，
好在我今日一個人又唔趕時間，睇左陣雜誌再去買布，返去鋪頭又坐左一陣先到我，
今次我打算造兩件上衫同埋一條短褲，因為近來天氣太熱唔想再著外套，
而上次佢話得幾滿意，所以今次再去幫襯，希望今次都會滿意啦。

做完衫都ｏ係羅湖城行左陣，又買左一對返工鞋，只係四十幾蚊都幾平，
剛出完糧買左兩對鞋做左幾件衫，洗完錢人就最開心左，
始終辛苦完一個月買ｄ野比自己當獎勵，咁黎緊又返工先有動力加嘛∼∼哈哈！

買完鞋坐地鐵返屋企，跟住就去行樓下琴日先開幕ｏ既”wal-mart”，
搬入黎呢度住接近兩年，呢個超級廣場終於都開左喇，真係望到頸都長，
以後買野都唔駛行咁遠落樓下就攪掂，不過唔好處就係呢度樓價租金肯定標升，
因為方便嘛，所以真係有利有弊囉。通常ｄ人鍾意新屎坑去幫襯，真係好多人，
今日行左陣，不過人攰攰地都冇乜心機慢慢行，因為地方太大，
香港ｏ既超市地方真係相差太遠，以前我都未行過wal-mart，
整體黎講貨品質素冇吉豬島好，但對我黎講勝在近，所以日後應該都好多幫襯機會。

今日行左大半日都幾攰，好在聽日仲有一日假抖下嗟∼∼

呢排返工比較難捱，因為太多野做，琴日清緊ｄnewsletter，
今朝家姐老闆有返黎，不過我都有反映呢排多野做，所以做到懵下懵下做錯野，
我諗家姐老闆都知道，猛話我陰公，之後都識做ｄ生日咭問我放ｏ係我度定係佢度，
我梗係話放佢度啦，我果度真係連做野都冇地方。

晏少少家姐老闆走左，可能佢都知我多野做，下星期六晚佢就飛喇，
可能要追ｏ既野大概都定晒，有早兩個星期咁忙，咁我都總算有時間又清下ｄ newsletter，
不過硬係覺得今日似星期五，不過原來都係星期四咋，
真係好想快ｄ返埋聽日休息下。

聽晚同同事有飯局，為左就『豹紋舊同事』去打邊爐，
有時都唔明點解次次都要大家就佢，
如果今次唔係同事仔做攪手我就唔想去，下次我又真係唔想攪喇。