終於又過左一個星期，最開心又到星期六，因為可以訓個飽。
琴日放工同三個朋友仔食飯，大家都冇見大半年喇，
今次終於去到旺角的一間樓上CAFE，因之前兩次都曾訂過但最後去唔成，
不過今次去到冇預期中好，因為之前在網上睇過食評話環境唔錯，
但我地覺得都幾似Ｄ西餐廳，因為唔係坐梳化而係坐卡位，
至於食物方面都唔錯，我食的一個大蝦雞卷都幾好味，因為係Set dinner，
有埋飲品同甜品，ｏ係cafe 黎講價錢唔叫貴可接受。
食完野去行左陣潮流特區，兩個朋友仔都有收穫，之後大家各自歸家，
因時間尚早，又難得出左旺角，所以想去旺中行下，我想買個返工袋，
因為依家用開果個開始殘同埋袋裏開始爛，因為同其中一個朋友仔同路行去太子，
我話想去行旺中，朋友仔都陪埋我去，而我都買左個袋，跟住大家邊行邊傾到太子先分手，
我諗下次聚會可能都會半年後喇。
＊ ＊ ＊ ＊ ＊
今朝訓到好晏先起身，因為今日得一個人，所以去左食下午茶，
之後出羅湖拎衫，今次效果都ｏｋ，拎埋今次衫真係已經夠晒呢季著喇，
遲下應該秋天或冬天先有機會再去做喇，拎完衫順便去睇鞋，
上次新買對鞋落雨浸完水ｄ皮爛爛地喇，平丫嘛，係咁上下喇，
今次都有收穫，四十幾蚊有交易，都平過ｏ係香港買ｏ既，反正果ｄ都係內地做ｏ既。
返去順便去街市買埋餸选返屋企，但好鬼熱，一唔落雨就熱喇，
不過返屋企後冇耐出面係咁閃電，仲行雷落好大雨添，咁先叫做涼返ｄ。
聽日又可以訓晏ｄ，黎緊個星期連煩煩老闆都去埋旅行，所以都要珍惜埋呢個稍為清閒的星期，
再下個星期家姐老闆放假返黎，肯定有排忙，不過，到時都唔知會唔會被人迫遷左ｌｕ。
| 
