琴日勞碌左成日，條腰都攰攰地，唉∼老喇老喇∼∼

今日努力咁清埋琴日未清好ｏ既野，因為同老闆講左我下星期放假，
雖然佢未正式話ｏｋ，因為未通知埋其他老闆，但多數都冇咩問題，
但一講左放假就覺得好多野要努力ｏ係放假前做定，費事等我放假時ｄ老闆不知所措，
食完飯返黎整理埋下個月ｏ既生日咭，跟住好努力咁去家姐老闆房貼laber，
襯老闆出左去，而且家姐老闆心急，可能好快會開始送ｄ新年禮物出去，
費事黎緊唔得閒整，因為近年尾真係今日唔知聽日事，隨時忙到甩褲都得，
於是的起心肝係咁『貼、貼、貼、貼、貼．．．』，一口氣幫家姐老闆ｄ禮品貼好晒label，
跟住仲要幫心急老闆同煩煩老闆整添媧，至煩係煩煩老闆，
因為依家ｄ地方太細，佢ｄ禮品都唔知塞ｏ係邊好，聽日佢返黎見我將個箱放ｏ係佢張枱度，
肯定又呱呱叫，但冇地方都冇計架∼∼

聽日女王放完假返黎，不過後日又到分行秘書放假，之後又要我喇，
大家都一來清假，二來放定假充定電準備作戰都好ｏ既∼

又放左三日假，真係好唔捨得，開始好期待放大假喇。

今朝返工個個去開會，仲以為會幾靜，諗住襯靜靜地準備下個月生日ｏ既野，
點知佢地開完會後開始多濕碎野，唔知點解老闆們放假咁勤力，
家姐老闆簽左兩張單加一張醫療同意外保險，心急老闆都一口氣交三張單，
連前細佬老闆都有交單，不過我冇睇佢交幾多，因為女王放假，佢直接拎份單比分行秘書，
佢仲話要麻煩分行秘書幫佢望下有冇填錯野，話秘書冇返工好慘媧，
分行秘書好醒目問佢影印左未，答案當然係未啦，好彩我仲記得佢個影印密碼，
因為若問返當事人都冇用，我諗佢都唔記得，
而細佬老闆一早已經懶唔好意思咁黎叫我幫佢出proposal，
仲要比錯紙仔（資料）我添，好在佢早發現拎返個ｏ岩ｏ既比我，
若果唔係我快速幫佢做左又錯架喇，算啦，見係佢咋，第二個唔幫佢整架∼嘻！

今日食完飯返公司望到一箱箱大紙箱ｏ係走廊，似乎係ｄ大幅送到黎，
四點左右終於分發到我地到，跟住分行秘書好快手咁盡量分發出去，
因為今年冇地方放，唔想阻住地方，所以今日成個晏晝都好忙碌咁做做下野又去收下貨，
好多我都暫時收埋ｏ係老闆房都未得閒執，睇下聽日有冇時間先啦。

一見到堆新年禮物到晒，又真係一個惡夢開始，
所以一於唔埋咁多，下個星期放定個大假充定電再衝刺！！

呢兩日都冇乜出過街，琴日除左去街市買野外，今日直頭冇出去，
成日都留ｏ係屋企上下網。

夜晚睇左套早前買ｏ既DVD『變型金剛』，呢套以前係卡通黎，
印象中真係好耐喇，仲記得以前電視有賣過『變型金剛』玩具，
駕車可以變成機械人，不過我成覺得鬼佬野都係比較笨笨重重，
冇日本ｄ機械人咁型。不過今次呢個電影版有好多電腦特技，
ｄ機械人做得好自然靈活，而且仲好有日本ｄ機械人感覺（如高達等），
冇左以前鬼佬ｄ笨拙感覺，套戲比想像好，睇黎我都係比較鍾意睇ｄ科幻片。

今晚做『交響情人夢』大結局，因為之前睇左原裝版本，有對比之下覺得相差好遠，
一來又係ｃｕｔ左ｄ情節，二來畫質差好遠，原版應該係用高清黎拍ｏ既，
三來經左配音，感覺冇原裝咁好，原裝真係一氣呵成，臨尾真係睇到好感動，
所以更加要睇返原版先得喇。

聽日又返工喇，開始期待放假喇。